Read Uzbek Muqaddas Kitob Yuhanno 13 Bible Online

Yuhanno 13 - Uzbek Muqaddas Kitob bible

Yuhanno 13

¹Fisih bayramiga oz qolgan edi. Iso bu dunyoni tark etib, osmondagi Otasi oldiga boradigan vaqt — soati kelganini bilar edi. U dunyodagi Oʻzinikilarni yaxshi koʻrar edi, ularni oxirigacha yaxshi koʻrdi.

²Kechki ovqat payti edi. Shimoʻn oʻgʻli Yahudo Ishqariyotning diliga iblis allaqachon Isoga xiyonat qilish niyatini solgan edi.

³Iso esa Otasi hamma narsani Uning qoʻliga berganini bilar edi, U Xudodan kelib, yana Xudoning oldiga qaytayotganini ham bilar edi.

⁴Shunday qilib, Iso dasturxondan turib, ustki kiyimini yechib tashladi. Sochiqni olib beliga bogʻladi.

⁵Keyin togʻoraga suv quyib, shogirdlarining oyoqlarini yuvishga tushdi. Beliga bogʻlagan sochiq bilan ularning oyoqlarini artib quritdi.

⁶Iso Butrusning[125] oldiga keldi. — Hazrat, nahot oyoqlarimni Siz yuvsangiz?! — dedi Butrus.

⁷— Hozir nima qilayotganimni sen bilmaysan, keyin tushunib olasan, — dedi Iso unga javoban.

⁸— Mening oyoqlarimni ikki dunyoda ham yuvmaysiz! — dedi Butrus. — Agar oyoqlaringni yuvmasam, Menga qarashli boʻlmaysan, — dedi Iso.

⁹Shunda Butrus dedi: — Hazrat, nafaqat oyoqlarimni, qoʻllarim bilan boshimni ham yuvib qoʻying!

¹⁰Iso unga dedi: — Choʻmilgan odam faqat oyogʻini yuvsa bas, u tamoman pokdir. Sizlar ham poksizlar, ammo hammangiz emas.

¹¹Iso Oʻziga xoinlik qiladigan odamni bilar edi, shuning uchun: “Hammangiz ham pok emassizlar”, dedi.

¹²Shogirdlarining oyoqlarini yuvib boʻlgach, Iso ustki kiyimini kiyib, yana dasturxon oldiga yonboshladi. Soʻng shogirdlaridan soʻradi: — Hozir nima qilganimni tushundilaringmi?

¹³Sizlar Meni “Ustoz”, “Hazrat” deb chaqirasizlar va toʻgʻri qilasizlar, chunki Men xuddi shundayman.

¹⁴Agar Men Hazratingiz va Ustozingiz boʻla turib oyoqlaringizni yuvgan boʻlsam, sizlar ham bir — biringizning oyoqlaringizni yuvishingiz shart.

¹⁵Men sizlarga nima qilgan boʻlsam, sizlar ham oʻshani qilishingiz kerak. Men sizlarga oʻrnak koʻrsatdim.

¹⁶Sizlarga chinini aytayin: qul oʻz xoʻjayinidan ustun emas, elchi ham uni yuborgandan ustun emas.

¹⁷Agar gapimni uqqan boʻlsangiz, bunga amal qilinglar, shunda baxtli boʻlasizlar!

¹⁸Iso gapida davom etdi: — Mening gaplarim hammangizga tegishli emas. Men kimlarni tanlaganimni bilaman. Muqaddas bitiklarda: “Nonimni yegan kishi Menga qarshi bosh koʻtardi”[126], deb aytilgan. Bu soʻzlar bajo boʻlishi kerak.

¹⁹Men buni sizlarga hozirdan, yuz bermasdan oldin, aytib qoʻyyapman. Toki yuz berganda, Masih Men ekanligimga[127] ishoninglar.

²⁰Sizlarga chinini aytayin: kim Men yuborgan odamni qabul qilsa, Meni qabul qilgan boʻladi. Meni qabul qilgan esa Meni Yuborganni qabul qilgan boʻladi.

²¹Iso qattiq iztirob chekib, dedi: — Sizlarga chinini aytayin, orangizdan bittasi Menga xiyonat qiladi.

²²Shogirdlari esa U kimni nazarda tutayotganini bilmay, gangib bir — biriga qarab turar edilar.

²³Shogirdlaridan biri Isoning yonida yonboshlagan edi. U Isoning sevikli shogirdi[128] edi.

²⁴Butrus oʻsha shogirdga: “Iso kim haqida gapiryapti, soʻra — chi”, deb imo — ishora qildi.

²⁵Shunda u engashib, Isodan: — Hazrat, u kim? — deb soʻradi.

²⁶Iso javob berdi: — Men bir burda nonni kosaga botirib kimga bersam, u oʻshadir, — dedi. Soʻng burda nonni botirib, Shimoʻn oʻgʻli Yahudo Ishqariyotga berdi.

²⁷Yahudo burdani olar — olmas, shayton uning ichiga kirib oldi. — Qiladiganingni tezroq qil, — dedi unga Iso.

²⁸Dasturxon atrofidagilardan hech kim nima uchun Iso bu soʻzlarni Yahudoga aytganini tushunmadi.

²⁹Pul qutisi Yahudoda boʻlgani sababli, ba’zilari: “Iso unga, bayram uchun bizga kerak boʻladigan narsalarni sotib ol, deyapti yoki, kambagʻallarga bir nima ber, deyapti”, deb oʻylardilar.

³⁰Yahudo esa oʻsha burda nonni olgan zahoti tashqariga chiqib ketdi. Tun edi.

³¹Yahudo chiqib ketgach, Iso dedi: — Inson Oʻgʻlining ulugʻvorligi ayon boʻladigan vaqti keldi. U orqali Xudoning ulugʻvorligi ayon boʻladi.

³²Xudoning ulugʻvorligi Inson Oʻgʻli orqali ayon boʻlar ekan, tez orada Xudo Inson Oʻgʻlini Oʻz ulugʻvorligiga sherik qiladi.

³³Bolalarim! Endi Men sizlar bilan uzoq boʻlmayman. Meni qidirasizlar. Yahudiylarga aytgan edim, sizlarga ham aytyapman: Men boradigan joyga sizlar borolmaysizlar.

³⁴Sizlarga yangi amr beryapman: bir — biringizni sevinglar. Men sizlarni qanday sevgan boʻlsam, sizlar ham bir — biringizni shunday sevinglar.

³⁵Agar bir — biringizni sevsangiz, sizlar Mening shogirdlarim ekaningizni hamma shundan bilib oladi.

³⁶Butrus Isoga dedi: — Hazrat, Siz qayerga ketyapsiz? — Hozir Men boradigan joyga sen orqamdan borolmaysan, keyinchalik borasan, — dedi unga Iso.

³⁷Butrus soʻradi: — Hazrat, nega hozir orqangizdan borolmas ekanman? Men Siz uchun jonimni berishga tayyorman!

³⁸Iso javob berdi: — Sen rostdan ham Men uchun joningni berishga tayyormisan?! Senga chinini aytaman, xoʻroz qichqirmasdanoq, sen uch marta Mendan tonasan!