Read Uzbek Muqaddas Kitob Yuhanno 15 Bible Online

Yuhanno 15 - Uzbek Muqaddas Kitob bible

Yuhanno 15

¹Iso shogirdlariga dedi: “Men haqiqiy tokman, osmondagi Otam esa bogʻbondir.

²Hosil bermaydigan har bir novdamni U kesib tashlaydi. Hosil beradigan har bir novdani esa, yana koʻproq hosil bersin deb, xomtok qilib tozalaydi.

³Men sizga aytgan soʻzim orqali sizlar allaqachon tozalanib boʻlgansizlar.

⁴Men bilan aloqada boʻlinglar, shunda Men sizlar bilan aloqada boʻlaman. Tokka ulanmagan novda oʻz — oʻzidan hosil berolmaydi. Shu singari, sizlar ham Men bilan aloqada boʻlmasangizlar, hosil berolmaysizlar.

⁵Men — tok, sizlar esa novdasizlar. Agar Menda boʻlsangizlar va Men sizlarda boʻlsam, koʻp hosil berasizlar. Mensiz hech narsa qilolmaysizlar.

⁶Kim Men bilan aloqani uzsa, novda kabi, tashlab yuboriladi va quriydi. Bunday novdalarni esa yigʻib, oʻtga tashlab yondirishadi.

⁷Agar siz Men bilan aloqada boʻlib, soʻzlarimni qalbingizga jo qilsangizlar, istaganingizni soʻranglar, sizga beriladi.

⁸Sizlar koʻp hosil berib, Mening shogirdlarim ekanligingizni isbotlaysiz. Bu orqali Otam ulugʻlanadi.

⁹Osmondagi Otam Meni qanday sevgan boʻlsa, Men ham sizlarni shunday sevdim. Sevgimga sodiq qolinglar.

¹⁰Men Otamning amrlariga amal qilib, Uning sevgisiga sodiq qolganman. Xuddi shu singari, sizlar ham, Mening amrlarimga amal qilsangizlar, sevgimga sodiq qolasizlar.

¹¹Mening shodligim qalbingizni toʻldirsin deb, sizlarga bu soʻzlarni aytdim.

¹²Mening amrim shu: Men sizlarni qanday sevgan boʻlsam, sizlar ham bir — biringizni shunday sevinglar.

¹³Kim oʻz jonini doʻstlari uchun fido qilsa, bundan ortiq sevgi yoʻq.

¹⁴Agar sizlar amrlarimni bajo keltirsangizlar, Mening doʻstlarim boʻlasizlar.

¹⁵Men sizlarni endi qul deb atamayman. Qul xoʻjayini nima qilishini bilmaydi. Sizlarni doʻstlarim deyman, chunki Otamdan eshitgan hamma narsani sizlarga aytdim.

¹⁶Sizlar Meni emas, Men sizlarni tanladim. Men sizlarni: «Borib hosil bersin, hosili boqiy boʻlsin», deb tanladim. Shunda Mening nomimdan Otadan nima soʻrasangizlar, U sizlarga beradi.

¹⁷Xullas, sizlarga amrim shu: bir — biringizni sevinglar!

¹⁸Agar dunyo sizlardan nafratlanayotgan boʻlsa, bilingki, sizlardan ilgari Mendan nafratlangan.

¹⁹Sizlar bu dunyoga tegishli boʻlganingizda edi, dunyo sizlarni oʻziniki kabi sevar edi. Sizlar esa bu dunyoga tegishli emassizlar. Men sizlarni bu dunyodan tanlab oldim. Ana shu sababdan dunyo sizlardan nafratlanadi.

²⁰Qul oʻz xoʻjayinidan ustun emas degan soʻzimni[133] eslanglar. Agar Meni quvgʻin qilgan boʻlsalar, sizlarni ham quvgʻin qiladilar. Agar Mening soʻzlarimga rioya qilgan boʻlsalar, sizlarnikiga ham rioya qiladilar.

²¹Odamlar bularni sizlarga Mening nomim tufayli qiladilar. Axir, ular Meni Yuborganni tanimaydilar.

²²Agar Men kelib, ularga gapirmaganimda edi, ular Menga ishonmaganlari uchun gunohda ayblanmas edilar. Endi boʻlsa gunohlarini oqlash uchun bahona topa olmaydilar.

²³Mendan nafratlangan odam osmondagi Otamdan ham nafratlanadi.

²⁴Agar Men ular orasida boshqa hech kim qilmagan moʻjizalarni qilmaganimda edi, ular gunohda ayblanmas edilar. Endi boʻlsa moʻjizalarimni koʻrdilar — u, Mendan ham, Otamdan ham nafratlandilar.

²⁵Bu esa Tavrotdagi: «Mendan sababsiz nafrat etganlar»[134] degan soʻzlar bajo boʻlishi uchun sodir boʻldi.

²⁶Men sizlarga Otamdan yuboradigan Homiy[135], ya’ni Otamdan chiqadigan Haqiqat Ruhi kelganda Men toʻgʻrimda guvohlik beradi.

²⁷Sizlar ham guvohlik berasizlar, chunki boshdanoq Men bilan birga boʻlgansizlar.