Read Uzbek Muqaddas Kitob Yuhanno 16 Bible Online

Yuhanno 16 - Uzbek Muqaddas Kitob bible

Yuhanno 16

¹Men bu gaplarni sizlar toʻgʻri yoʻldan ozmanglar, deb aytdim.

²Sizlarni sinagogalardan haydab yuboradilar. Hatto shunday zamon keladiki, sizlarni oʻldirayotgan har bir kishi bu bilan Xudoga xizmat qilyapman, deb oʻylaydi.

³Ular bu ishlarni samoviy Otamni va Meni tanimaganlari uchun qiladilar.

⁴Bularni sizlarga hozirdan aytib qoʻyyapman, toki oʻsha vaqt — soat kelganda, soʻzlarimni esga olinglar. Sizlarga bularni boshdanoq aytishimga hojat yoʻq edi, chunki Oʻzim sizlar bilan birga edim.

⁵Endi esa Meni Yuborganning oldiga ketyapman. Birontangiz Mendan: «Qayerga ketyapsan?» deb soʻramayapsiz.

⁶Bularni aytganim uchun dilingiz gʻam — qaygʻuga botgan.

⁷Ammo sizlarga haqiqatni aytaman, Mening ketishim sizlar uchun yaxshiroqdir. Agar Men ketmasam, Homiy[136] kelmaydi. Agarda ketsam, Uni oldingizga yuboraman.

⁸U kelganda dunyoga gunoh, adolat va hukm toʻgʻrisidagi haqiqatni ayon qiladi.

⁹Gunoh toʻgʻrisidagi haqiqat shundan iboratki, odamlar Menga ishonmaydilar.

¹⁰Adolat toʻgʻrisidagi haqiqat shuki, Ota Meni oqlaydi. Men Otaning oldiga ketyapman va sizlar Meni boshqa koʻrmaysizlar.

¹¹Hukm toʻgʻrisidagi haqiqat shundan iboratki, hukm chiqarib boʻlingan, bu dunyoning yovuz hukmdori[137] mahkum qilingan.

¹²Sizlarga yana aytadigan gaplarim koʻp, lekin endi ichingizga sigʻdirolmaysizlar.

¹³Haqiqat Ruhi kelib, sizlarni toʻliq haqiqat sari boshlaydi. U Oʻzicha gapirmaydi, neki eshitsa, oʻshani soʻzlab beradi, U yuz beradigan voqealar haqida sizlarga xabar qiladi.

¹⁴U Mendan eshitgan narsalarni sizlarga ma’lum qiladi, shu orqali Meni ulugʻlaydi.

¹⁵Otaning bor narsasi Menikidir. Ana shu sababdan, Ruh Mendan eshitgan narsalarni sizlarga ma’lum qiladi, deb aytdim.

¹⁶Sizlar bilan birga uzoq vaqt boʻlmayman, lekin koʻp oʻtmay sizlar Meni yana koʻrasizlar[138].”

¹⁷Shu paytda Isoning shogirdlari bir — biriga dedi: “Qiziq, U bizga oʻzi nima aytmoqchi?! «Sizlar bilan birga uzoq vaqt boʻlmayman, lekin koʻp oʻtmay sizlar Meni yana koʻrasizlar», dedi. «Otaning oldiga ketyapman», deb aytdi.

¹⁸«Sizlar bilan birga uzoq vaqt boʻlmayman» deyishi bilan nima demoqchi ekan, tushunmadik.”

¹⁹Iso shogirdlarining savol bermoqchi boʻlganlarini bilib, dedi: “«Sizlar bilan birga uzoq vaqt boʻlmayman, lekin koʻp oʻtmay sizlar Meni yana koʻrasizlar», deb aytgan gapimning ma’nosini muhokama qilyapsizlarmi?

²⁰Sizlarga chinini aytayin: sizlar yigʻlab, dod — faryod qilasizlar, dunyo esa quvonadi. Sizlar qaygʻurasiz, lekin qaygʻungiz shodlikka aylanadi.

²¹Oyi toʻlgan ayol dard bilan tugʻadi. Ammo bola tugʻilgandan keyin, dunyoga odamzod keldi, deb ayol quvonadi. Quvonganidan u chekkan dardini unutib yuboradi.

²²Shunga oʻxshab sizlar ham hozir gʻam — qaygʻu chekyapsizlar. Lekin Men sizlarni yana koʻraman. Shunda yuragingiz quvonchga toʻladi. Quvonchingizni sizlardan hech kim tortib olmaydi.

²³Oʻsha kuni Mendan hech narsa soʻramaysizlar. Sizlarga chinini aytayin: Mening nomimdan osmondagi Otamdan nima soʻrasangizlar, U sizlarga beradi.

²⁴Shu paytgacha Mening nomim bilan Otadan hech narsa soʻramadingizlar. Soʻranglar, olasizlar va qalbingiz shodlikka toʻladi.

²⁵Shu vaqtgacha sizlarga matallar orqali gapirib keldim. Lekin shunday vaqt keladiki, Men sizlarga Otam haqida matallar orqali emas, ochiqdan — ochiq gapiraman.

²⁶Oʻsha kuni oʻzlaringiz Otadan istaganingizni Mening nomimdan soʻraysizlar. Mening sizlar uchun Otadan iltimos qilishimning hojati boʻlmaydi.

²⁷Zotan, Otaning Oʻzi sizlarni sevadi, chunki sizlar Meni yaxshi koʻrib, Xudodan kelganimga ishondingizlar.

²⁸Men Otamdan chiqib, dunyoga keldim. Endi dunyoni tark etib, Otamning oldiga ketyapman.”

²⁹Shogirdlar Isoga shunday deyishdi: — Mana, hozir Siz matal ishlatmay, ochiq soʻzlayapsiz.

³⁰Hamma narsani bilishingizni endi tushundik. Savolga ham oʻrin yoʻq. Siz Xudodan kelganingizga endi ishondik.

³¹Iso dedi: — Endi rostdan ham ishonyapsizlarmi?

³²Shunday vaqt keladiki, hatto keldi ham, sizlar tarqalib, har biringiz in — iningizga kirib ketasiz. Meni yolgʻiz qoldirasizlar. Biroq Men yolgʻiz emasman, chunki Otam Men bilandir.

³³Men tufayli xotirjam boʻlishingiz uchun bularni sizlarga aytdim. Dunyoda qaygʻu — alam chekasizlar. Lekin dadil boʻlinglar, Men dunyoni yengdim.