Read Uzbek Muqaddas Kitob Yuhanno 18 Bible Online

Yuhanno 18 - Uzbek Muqaddas Kitob bible

Yuhanno 18

¹Bu soʻzlarni aytgandan soʻng, Iso Oʻz shogirdlari bilan u yerdan chiqib, Qidron soyligining[143] narigi tomoniga oʻtdi. Oʻsha yerda bir bogʻ bor edi. Iso shogirdlari bilan boqqa kirdi.

²Xoin Yahudo ham oʻsha joyni bilar edi, chunki Iso shogirdlari bilan u yerda tez — tez uchrashib turar edi.

³Shunday qilib, Yahudo bir boʻlinma Rim askarlarini hamda bosh ruhoniylar va farziylar tomonidan yuborilgan Ma’bad mirshablarini[144] boshlab, u yerga keldi. Qoʻllarida mash’alayu fonuslar, qurol — yarogʻlar bor edi.

⁴Iso boshidan kechadigan hamma narsani bilar edi. U odamlarga peshvoz chiqib, soʻradi: — Kimni qidiryapsizlar?

⁵— Nosiralik Isoni, — deb javob berishdi ular. — Oʻsha Menman, — dedi Iso. Xoin Yahudo ularning orasida turgan edi.

⁶Iso “Oʻsha Menman” deyishi bilanoq ular orqaga tisarilib, yerga yiqilishdi.

⁷Iso ulardan yana soʻradi: — Kimni qidiryapsizlar? — Nosiralik Isoni, — dedilar.

⁸— Sizlarga aytdim — ku, Oʻsha Menman, — dedi ularga Iso. — Agar Meni qidirayotgan boʻlsangizlar, bularni qoʻyib yuboringlar, ketaverishsin.

⁹Shu yoʻsin Isoning ilgari: “Ota, Sen Menga bergan odamlardan hech birining yoʻqolishiga yoʻl qoʻymadim[145]” degan soʻzlari bajo boʻldi.

¹⁰Shu onda Butrus[146] yonidagi qilichini qinidan sugʻurdi — da, oliy ruhoniyning xizmatkoriga bir urib, oʻng qulogʻini kesib tashladi. Xizmatkorning ismi Malxus edi.

¹¹Iso Butrusga: — Qilichingni qiniga solib qoʻy! Nahotki Men osmondagi Otam bergan azob kosasidan[147] ichmasam?! — dedi.

¹²Shunda Rim askarlari bilan boʻlinma qoʻmondoni va yahudiy mirshablari Isoni qoʻlga olib, bogʻlashdi.

¹³Uni oldin Xanan oldiga olib borishdi. Xanan oʻsha yilgi oliy ruhoniy boʻlgan Kayafasning qaynatasi edi[148].

¹⁴Yahudiylarga: “Xalq uchun bitta odamning oʻlishi yaxshiroq”, deb maslahat bergan oʻsha Kayafas[149] edi.

¹⁵Isoning orqasidan Butrus va yana boshqa bir shogird ergashib borishar edi. Bu shogird oliy ruhoniy Xananning[150] tanishi boʻlib, Iso bilan bemalol oliy ruhoniyning hovlisiga kirdi.

¹⁶Butrus esa tashqarida, darvoza oldida qoldi. Oliy ruhoniyga tanish boʻlgan shogird keyinroq yana tashqariga chiqdi — da, darvozabon choʻriga nimadir deb, Butrusni ichkariga olib kirdi.

¹⁷Shunda darvozabon choʻri Butrusdan: — Siz ham u Odamning shogirdlaridan emasmisiz? — deb soʻradi. — Yoʻq! — dedi Butrus.

¹⁸Havo sovuq boʻlgani uchun u yerda turgan xizmatkorlar bilan mirshablar koʻmir yoqib, isinayotgan edilar. Butrus ham ularning oldiga borib, isinib turdi.

¹⁹Shu paytda oliy ruhoniy Xanan Isoni soʻroq qilayotgan edi. Shogirdlari va ta’limotiga taalluqli savollar berdi.

²⁰Iso unga javob berib dedi: — Men elu olamga ochiq soʻzladim. Har doim yahudiylar yigʻiladigan sinagogalarda va Ma’badda ta’lim berib yurdim, hech yashirincha gap aytmadim.

²¹Nega Meni soʻroq qilyapsiz? Gaplarimni eshitgan odamlardan soʻrang. Nimalar haqida gapirganimni ular bilishadi.

²²Iso bularni aytib boʻlgach, yonida turgan Ma’bad mirshablaridan biri Isoning yuziga bir shapaloq urib, dedi: — Oliy ruhoniyga ham shunday javob berasanmi?

²³Iso bunga javoban dedi: — Agar Men notoʻgʻri gapirgan boʻlsam, notoʻgʻri joyini koʻrsat. Agar toʻgʻri gapirgan boʻlsam, nega Meni urasan?

²⁴Shundan keyin Xanan Isoni bogʻlangan holda oliy ruhoniy Kayafas[151] huzuriga yubordi.

²⁵Butrus olov oldida isinib turarkan, kimdir undan: — Sen ham Uning shogirdlaridan emasmisan? — deb soʻradi. — Yoʻq! — deb tondi u.

²⁶Oliy ruhoniyning xizmatkorlaridan biri Butrus qulogʻini uzib yuborgan odamning qarindoshi edi. Bu xizmatkor Butrusga dedi: — Seni bogʻda U bilan koʻrdim, shekilli?

²⁷Butrus esa yana tondi. Naq shu payt xoʻroz qichqirdi.

²⁸Tong otdi. Yahudiylar Isoni Kayafas huzuridan olib chiqib, hokim Pilatning[152] saroyiga olib bordilar. Oʻzlari esa bulgʻanishni istamay hukumat saroyiga kirmadilar[153], chunki bulgʻangan odam Fisih taomini[154] yeya olmasdi.

²⁹Shu sababli Pilat tashqariga, ularning oldiga chiqdi. — Bu Odamni nimada ayblayapsizlar? — deb soʻradi.

³⁰— Agar U jinoyatchi boʻlmaganda, Uni sizning qoʻlingizga topshirmas edik, — deb javob berishdi ular.

³¹— Uni olib ketib, oʻz qonuningiz boʻyicha hukm qilaveringlar, — dedi Pilat. — Bizga hech kimni qatl qilishga ijozat berilmagan, — deyishdi unga yahudiylar.

³²Iso Oʻzining qanday oʻlishi haqida aytgan soʻzlari amalga oshishi uchun[155] bu voqea sodir boʻldi.

³³Shunda Pilat yana saroyga kirdi va Isoni chaqirtirib: — Sen yahudiylarning Shohimisan? — deb soʻradi.

³⁴— Oʻzingiz qiziqib soʻrayapsizmi, yoki boshqalar sizga Men toʻgʻrimda aytishdimi? — deb soʻradi Iso.

³⁵Pilat dedi: — Nima, men yahudiymidim?! Oʻz xalqing, bosh ruhoniylaring Seni menga topshirishdi. Sen nima ish qilib qoʻyding?

³⁶Iso javob berdi: — Mening Shohligim bu dunyodan emas. Agar Shohligim bu dunyodan boʻlganda edi, yahudiylarning qoʻliga tushmasligim uchun Mening xizmatkorlarim kurashar edilar. Biroq Mening Shohligim bu yerdan emas.

³⁷— Demak, Sen Shoh ekansan — da?! — dedi Pilat. — Shoh ekanimni oʻzingiz aytdingiz, — dedi Iso. — Men haqiqat toʻgʻrisida shohidlik qilmoq uchun tugʻilganman, ana shu maqsadda olamga keldim. Haqiqat tarafida boʻlgan har bir odam Menga quloq soladi.

³⁸— Haqiqat oʻzi nima? — deb soʻradi Pilat. Shunday dedi — yu, yana tashqariga, yahudiylarning oldiga chiqdi. — Men Undan hech qanday ayb topmadim, — dedi ularga.

³⁹— Sizlarning bir odatingiz bor — ku, har Fisih bayramida sizlar uchun bir mahbusni ozod qilar edim. Shunga koʻra, sizlar uchun yahudiylarning Shohini ozod qilishimni istaysizlarmi?

⁴⁰— Uni emas, Barabbasni ozod qiling! — deb baqirdi ular. Barabbas esa isyonda ishtirok etgandi.