Read Uzbek Muqaddas Kitob Yuhanno 2 Bible Online

Yuhanno 2 - Uzbek Muqaddas Kitob bible

Yuhanno 2

¹Ikki kundan keyin Jaliladagi Ka’na qishlogʻida nikoh toʻyi boʻldi. Isoning onasi oʻsha yerda edi.

²Iso bilan shogirdlari ham toʻyga taklif qilingan edilar.

³Sharob tugay deb qolganda, onasi Isoga: — Ularda sharob qolmabdi, — dedi.

⁴— Buning Menga nima daxli bor?! Mening vaqt — soatim hali kelgani yoʻq, — dedi Iso.

⁵Shunda onasi xizmatkorlarga: — U sizlarga nima desa, shuni qilinglar, — dedi.

⁶Oʻsha yerda yahudiylarning poklanish marosimlarida ishlatiladigan oltita tosh xum bor edi. Har bir xum ichiga oʻn — oʻn ikki chelak[31] suv sigʻardi.

⁷Iso xizmatkorlarga: — Xumlarni suvga toʻldiringlar, — dedi. Ular xumlarni limmo — lim qilib suvga toʻldirishdi.

⁸Iso ularga: — Endi xumdagi suvdan ozgina olib, toʻyboshiga olib boringlar, — dedi. Ular olib borishdi.

⁹Toʻyboshi sharobga aylangan suvni tatib koʻrdi. Bu sharobning qayerdan kelganligini u bilmas edi, faqat olib kelgan xizmatkorlar bilishar edi. Toʻyboshi kuyovni chaqirtirib,

¹⁰unga dedi: — Dasturxonga avval yaxshi sharob tortiladi. Mehmonlar ichib toʻyganlaridan keyin, yomonrogʻi tortiladi. Sen esa yaxshi sharobni shu paytgacha saqlab kelibsan!

¹¹Bu Isoning qilgan birinchi moʻjizasi edi. Iso bu moʻjizali alomatni Jaliladagi Ka’na qishlogʻida namoyish etib, Oʻzining ulugʻvorligini zohir qildi. Shogirdlari Unga ishondilar.

¹²Shundan keyin Iso, onasi, ukalari va shogirdlari Kafarnahum shahriga bordilar va u yerda bir necha kun turdilar.

¹³Yahudiylarning Fisih bayrami[32] yaqinlashib qolgani uchun Iso Quddus shahriga bordi.

¹⁴Ma’bad hovlisiga kirganda, u yerda mol — qoʻy, kaptar sotayotganlarni va xontaxtalar yonida oʻtirgan sarroflarni[33] koʻrdi.

¹⁵Iso arqondan qamchi yasadi — da, Ma’baddan hammani mol — qoʻylari bilan birga quvib chiqardi. Sarroflarning xontaxtalarini agʻdarib, pullarini sochib yubordi.

¹⁶Kaptar sotuvchilarga: — Bularni yoʻqotinglar bu yerdan! Otamning uyini bozor qilmanglar! — dedi.

¹⁷Shunda Uning shogirdlari Muqaddas bitiklardagi: “Sening uyingga boʻlgan sevgim ichimni yondirar”[34] degan soʻzlarni esladilar.

¹⁸— Bunday qilishga nima haqing bor?! Bordi — yu, haqing boʻlsa, bironta alomat koʻrsatib, buni isbotla! — deb talab qila boshladi yahudiylar.

¹⁹Iso shunday javob berdi: — Mana bu Ma’badni buzinglar, Men uch kun ichida uni tiklayman.

²⁰Bunga javoban yahudiylar dedilar: — Bu Ma’bad qirq olti yildan beri qurilyapti[35], Sen esa uni uch kunda tiklamoqchimisan — a?!

²¹Holbuki, Iso Ma’bad deb Oʻzining badanini nazarda tutgan edi.

²²Iso oʻlib tirilgandan keyin, shogirdlari Uning bu gapini esladilar. Shunda Muqaddas bitiklarga va Isoning soʻzlariga ishondilar.

²³Iso Quddusda Fisih bayramida boʻlganda, koʻp odamlar Uning qilayotgan moʻjizali alomatlarini koʻrib, Unga imon keltirdilar.

²⁴Ammo Iso odamlarning qanaqaligini bilgani uchun Oʻzini ularga ishonmas edi.

²⁵Inson haqida Unga biron gap aytishning hojati yoʻq edi. Chunki inson dilida nima borligini U bilar edi.