Read Uzbek Muqaddas Kitob Yuhanno 3 Bible Online

Yuhanno 3 - Uzbek Muqaddas Kitob bible

Yuhanno 3

¹Yahudiy yoʻlboshchilaridan Nikodim ismli bir odam bor edi, u farziylar mazhabida edi.

²Bu odam bir kuni kechasi Isoning oldiga kelib, Unga dedi: — Ustoz, Siz Xudodan kelgan bir muallim ekanligingizni biz bilamiz. Agar Xudo Siz bilan boʻlmaganda edi, Siz bunday moʻjizali alomatlarni qila olmas edingiz.

³Iso unga shunday javob berdi: — Sizga chinini aytay: qaytadan[36] tugʻilmagan bironta odam Xudoning Shohligini[37] koʻrolmaydi.

⁴— Keksa odam tugʻila olarmidi?! U onasining qorniga qayta kirib, yana tugʻila olmaydi — ku! — dedi Nikodim.

⁵Iso shunday javob berdi: — Sizga chinini aytay: suvdan va Ruhdan tugʻilmagan bironta odam Xudoning Shohligiga kirolmaydi.

⁶Odam jismonan ota — onadan tugʻiladi, ruhan esa Muqaddas Ruhdan tugʻiladi.

⁷“Sizlar qaytadan tugʻilishingiz kerak” deganimga taajjublanmang.

⁸Ruh xuddi shamolga oʻxshaydi. Shamol istagan joyda esaveradi. Uning tovushini eshitasiz — u, lekin qaysi tomondan kelib, qaysi tomonga ketishini bilmaysiz. Ruhdan tugʻilgan har bir kishida ham shunday boʻladi.

⁹— Bu qanday boʻlishi mumkin? — deb soʻradi Nikodim.

¹⁰Iso unga shunday javob berdi: — Siz Isroilning ustozisiz — ku! Nahotki shuni bilmasangiz?!

¹¹Sizga chinini aytay: biz bilganimizni soʻzlaymiz, koʻrganimiz haqida shahodat beramiz. Lekin sizlar bizning shahodatimizni qabul qilmayapsizlar.

¹²Agar sizlar yerdagi narsalar haqida aytganlarimga ishonmasangizlar, samoviy narsalar toʻgʻrisida gapirganlarimga qanday ishonasizlar?

¹³Osmondan tushgan[38] Inson Oʻgʻlidan boshqa hech kim osmonga chiqqan emas.

¹⁴Muso sahroda bronza ilonni[39] xodaga mahkamlab, qanday yuqoriga koʻtargan boʻlsa, Inson Oʻgʻli ham xuddi shunday yuqoriga koʻtarilishi kerak[40].

¹⁵Shu tariqa imonga kelgan har bir kishi U orqali abadiy hayotga ega boʻladi[41].

¹⁶Zero[42], Xudo olamni shunchalik sevdiki, Oʻzining yagona Oʻgʻlini berdi. Toki Unga ishonganlardan birontasi halok boʻlmasin, balki abadiy hayotga ega boʻlsin.

¹⁷Xudo dunyoni hukm qilish uchun emas, balki Oʻgʻli orqali qutqarish uchun Uni dunyoga yubordi.

¹⁸Unga ishongan odam hukm qilinmaydi. Unga ishonmagan odam esa allaqachon mahkum boʻlgan, chunki u Xudoning yagona Oʻgʻliga ishonmadi.

¹⁹Hukm shunday dalilga asoslangan: dunyoga nur keldi, ammo odamlar nurdan koʻra, zulmatni yaxshi koʻrdilar, chunki ularning qilmishlari yovuz edi.

²⁰Qabihlik qilgan odam nurdan nafratlanadi. Qilmishlari fosh boʻlmasligi uchun u nurdan qochadi.

²¹Haqiqat yoʻlini tutgan odam esa nurga keladi. Bunday odamning ishlari Xudo orqali qilinganligini nur hammaga ayon qiladi.

²²Shundan keyin Iso shogirdlari bilan Yahudiya oʻlkasiga bordi. Iso ular bilan bir qancha vaqt u yerda qolib, odamlarni suvga choʻmdirdi.

²³Yahyo ham Saleym degan joyning yaqinidagi Eynon yerida[43] xalqni suvga choʻmdirardi. U yer nihoyatda sersuv edi. Odamlar doim Yahyoning oldiga kelib, suvga choʻmdirilardi.

²⁴Bu hodisalar Yahyo zindonga tashlanishdan[44] oldin yuz bergan edi.

²⁵Shu mahal Yahyoning shogirdlari bilan bir yahudiy kishi orasida tahorat haqida bahs boʻldi.

²⁶Ular Yahyoning oldiga borib dedilar: — Ustoz! Iordan daryosining sharqiy qirgʻogʻida yoningizdagi bir Odam haqida guvohlik bergan edingiz — ku, oʻsha Odam xalqni suvga choʻmdirib yuribdi, hamma Uning oldiga boryapti.

²⁷Bunga javoban Yahyo dedi: — Agar osmondan berilmasa, inson hech narsa qila olmaydi.

²⁸“Men Masih emasman, faqat Uning oldidan yuborilganman”, deb aytgan soʻzlarimga oʻzlaringiz guvohsizlar.

²⁹Kelin kuyovga tegishlidir. Kuyov joʻra esa kuyov yonida turib, uning ovozini eshitganidan sevinib xursand boʻladi. Xuddi shunday men ham bugun benihoyat shodman.

³⁰Masih yuksalishi, men esa pasayishim kerak.

³¹Yuqoridan[45] kelgan Zot hammadan ustundir. Yerdan boʻlgan odam yerga mansubdir va yerga xos masalalar toʻgʻrisida gapiradi. Osmondan Kelgan esa hammadan ustundir.

³²U koʻrgani va eshitgani haqida guvohlik beradi, ammo hech kim Uning guvohligini qabul qilmaydi.

³³Uning guvohligini qabul qilgan kishi esa Xudoning haqligini tasdiqlaydi.

³⁴Xudo yuborgan Zot Xudoning soʻzlarini gapiradi. Zero, Xudo Oʻz Ruhini Unga cheksiz — oʻlchovsiz beradi.

³⁵Ota Oʻgʻlini yaxshi koʻradi, U hamma narsani Oʻgʻlining qoʻliga topshirgan.

³⁶Xudoning Oʻgʻliga[46] ishongan har bir odam abadiy hayotga ega boʻladi. Oʻgʻilni rad etgan odam esa hayot koʻrmay, Xudoning gʻazabi ostida qoladi.