Read Uzbek Muqaddas Kitob Havoriylar 10 Bible Online

Havoriylar 10 - Uzbek Muqaddas Kitob bible

Havoriylar 10

¹Qaysariyada[109] Korniliy degan bir odam bor edi. U Rim lashkaridagi “Italiya” nomli boʻlinmada yuzboshi edi.

²Korniliy taqvodor odam boʻlib, uning oʻzi ham, oilasi ham Xudodan qoʻrqardi[110]. U kambagʻal yahudiylarga koʻp xayr — sadaqa berar, doimo Xudoga ibodat qilardi.

³Bir kuni soat uchlarda[111] unga vahiy keldi. Xudoning farishtasi kirib kelayotganini u aniq koʻrdi. Farishta: “Korniliy!” deb chaqirdi.

⁴Korniliy qoʻrquv ichida unga tikilib qarab: — Labbay, Hazrat! — dedi. Farishta unga shunday dedi: — Sening ibodatlaring va xayr — sadaqalaring Xudoga ma’qul boʻldi.

⁵Endi Yaffaga odam yuborib, Butrus degan odamni[112] chaqirtirib kel.

⁶Butrus bir koʻnchining[113] uyida mehmon boʻlib turibdi. Shimoʻn ismli oʻsha koʻnchining uyi dengiz boʻyida[114].

⁷Korniliyga gapirgan farishta ketdi. Korniliy xizmatkorlaridan ikkitasini va unga xizmat qiladigan taqvodor, ishonchli bir askarini chaqirdi.

⁸Roʻy bergan hodisani ularga aytib berib, ularni Yaffaga joʻnatdi.

⁹Keyingi kun tush paytida[115] ular yoʻlda davom etib, shaharga yaqinlashganlarida, Butrus ibodat qilgani tomga chiqqan edi[116].

¹⁰U ochqab, biron narsa tanovul qilgisi keldi. Ovqat tayyorlanayotganda, Butrusga vahiy keldi.

¹¹U osmon ochilganini, katta dasturxonga oʻxshash bir narsa toʻrt burchagidan osilgan holda yerga tushib kelayotganini koʻrdi.

¹²Uning ichida turli hayvonlar, sudralib yuruvchilar va qushlar bor edi.

¹³Shu payt u: “Oʻrningdan tur, Butrus, soʻyib yegin” degan ovozni eshitdi.

¹⁴Ammo Butrus dedi: — Aslo unday qilmayman, Egam! Men hech qachon harom yoki nopok narsalarni[117] yemaganman!

¹⁵Oʻsha ovoz yana Butrusga: “Xudo halol deb aytgan narsalarni sen harom demagin”, deya gapirdi.

¹⁶Bu suhbat uch marta takrorlandi. Shunda dasturxon birdan osmonga olindi.

¹⁷Butrus, bu vahiyning ma’nosi nima ekan, deb esankirab turganda, Korniliy yuborgan odamlar kelib qoldilar. Ular koʻnchi Shimoʻnning uyi qayerdaligini bilib olib, darvoza oldida turgan edilar.

¹⁸Ular baland ovoz bilan: — Butrus degan mehmon shu yerdami? — deb soʻradilar.

¹⁹Butrus hali ham vahiy haqida oʻylab oʻtirgan edi. Shunda Muqaddas Ruh unga dedi: — Qara, uchta odam seni izlab keldi.

²⁰Endi oʻrningdan tur, pastga tush, hech ikkilanmay ular bilan birga bor. Ularni Men joʻnatganman.

²¹Shunday qilib, Butrus pastga tushib, ularga dedi: — Sizlar izlayotgan odam menman. Nima sababdan keldingizlar?

²²— Bizni Rim yuzboshisi Korniliy joʻnatdi, — deb javob berdi ular. — U solih, Xudodan qoʻrqadigan odam, butun yahudiy xalqi orasida katta obroʻga ega. Xudoning farishtasi unga: “Butrusni uyingga taklif qil, uning aytganlarini eshitgin”, deb aytibdi.

²³Shundan keyin Butrus ularni ichkariga taklif etib, mehmon qildi. Keyingi kuni Butrus ular bilan birga yoʻlga otlandi. Yaffalik ba’zi imonlilar Butrus bilan birga ketdilar.

²⁴Ertasi kuni ular Qaysariyaga kirib keldilar. Korniliy ularni kutayotgan edi. U qarindoshlari va yaqin doʻstlarini taklif qilgan edi.

²⁵Butrus uyga kirib, Korniliyga roʻpara keldi. Shunda Korniliy Butrusning oyoqlariga bosh urib, unga ta’zim qildi.

²⁶Ammo Butrus unga: — Oʻrningdan tur, men ham bir bandaman, — deb uni turgʻizib qoʻydi.

²⁷Butrus u bilan gaplasharkan, ichkariga kirdi va u yerda bir talay odam toʻplanganini koʻrdi.

²⁸Butrus ularga shunday dedi: — Oʻzlaringiz bilasizlarki, yahudiy odam boshqa xalqdan boʻlgan odam bilan aloqa bogʻlashi, unikiga borishi qonunimizga xilofdir. Ammo Xudo endi menga hech bir kimsani harom yoki nopok deb hisoblamaslikni ayon qildi.

²⁹Shuning uchun menga odam yuborganlaringizda, hech qanday e’tiroz bildirmay keldim. Endi bilsam boʻladimi, nima uchun meni chaqirtirdingizlar?

³⁰Korniliy shunday javob berdi: — Toʻrt kun ilgari xuddi shu paytda — soat uchlarda uyimda ibodat qilayotgan edim. Birdan[118] roʻparamda oppoq kiyim kiygan bir odam paydo boʻldi.

³¹U menga shunday dedi: “Korniliy, sening ibodating Xudoga yetib bordi, xayr — sadaqalaringni U ma’qul koʻrdi.

³²Endi Yaffaga odam yuborib, Butrus degan odamni chaqirtirib kel. U Shimoʻn ismli koʻnchining uyida mehmon boʻlib turibdi. Shimoʻnning uyi dengiz boʻyida[119].”

³³Shuning uchun darhol sizga odam yubordim, siz ham olijanoblik qilib, keldingiz. Egamiz sizga aytishni buyurgan hamma narsani eshitish uchun endi hammamiz Xudoning huzurida toʻplandik.

³⁴Butrus ularga gapira boshladi: — Haqiqatan ham, Xudo tarafkashlik qilmasligini bilaman.

³⁵Har bir elatda Xudodan qoʻrqadigan va toʻgʻri ishlarni qiladigan har bir odam Unga ma’quldir.

³⁶U Isroil xalqiga yuborgan xabarni bilasizlar. Tinchlik keltiradigan bu Xushxabarni Xudo Iso Masih orqali e’lon qildi. Iso Masih hammaning Rabbiysidir.

³⁷Yahudiya boʻylab nimalar yuz berganini bilasizlar. Bu hodisalarning hammasi Yahyoning choʻmdirilish toʻgʻrisidagi xabaridan keyin Jalila hududida boshlangan edi.

³⁸Xudo Nosiralik Isoni Muqaddas Ruh va kuch — qudrat bilan qanday toʻldirganini bilasizlar. Iso hamma yoqqa borib, yaxshi ishlar qildi, iblisning hukmronligidan azob chekkanlarni shifoladi, chunki Xudo U bilan edi.

³⁹U Yahudiya va Quddusda qilgan ishlarning hammasiga biz guvohmiz. Shundan keyin Isoni yogʻochga[120] mixlab, oʻldirdilar.

⁴⁰Ammo Xudo Uni uchinchi kuni tiriltirib, zohir qildi.

⁴¹Iso hammaga emas, faqat bizga zohir boʻldi. Chunki Xudo bizni Iso haqida guvohlik berishimiz uchun tanlagandi. Iso tirilgandan keyin biz U bilan yeb — ichdik.

⁴²U bizga: “Xalqlarga va’z qilib, guvohlik beringlar. Oʻliklar va tiriklarni hukm qilish uchun Xudo Meni tayinlaganini ularga aytinglar”, — deb buyurdi.

⁴³Barcha paygʻambarlar ham Iso toʻgʻrisida guvohlik bergan edilar. Isoga ishongan har bir odamning gunohlari Uning nomi tufayli kechiriladi, deb aytgan edilar.

⁴⁴Butrus hamon gapirar ekan, uning soʻzlarini eshitayotganlarni Muqaddas Ruh qamrab oldi.

⁴⁵Xudo gʻayriyahudiylarga ham Muqaddas Ruhni in’om qilib berganini Butrus bilan birga kelgan yahudiy imonlilar[121] koʻrib hayratda qoldilar.

⁴⁶Chunki gʻayriyahudiylar boshqa[122] tillarda gaplashayotganini va Xudoni ulugʻlayotganlarini ular eshitib turardilar. Shunda Butrus dedi:

⁴⁷— Bu odamlar, xuddi biz singari, Muqaddas Ruhni qabul qildilar. Shunday ekan, ularning suvga choʻmdirilishiga kim toʻsqinlik qila oladi?!

⁴⁸Shunday qilib, Butrus ularga, Iso Masih nomi bilan suvga choʻminglar, deb buyruq berdi. Soʻng ular Butrusdan bir necha kun qolishini iltimos qildilar.