Read Uzbek Muqaddas Kitob Havoriylar 12 Bible Online

Havoriylar 12 - Uzbek Muqaddas Kitob bible

Havoriylar 12

¹Xuddi shu paytda shoh Hirod[132] imonlilar jamoatining ba’zi a’zolarini quvgʻin qila boshladi.

²U Yuhannoning akasi Yoqubni[133] qilich bilan oʻldirtirdi.

³Hirod koʻrdiki, bu yahudiylarga ma’qul kelyapti, shunday qilib, u Butrusni hibsga oldi. Bu voqea Xamirturushsiz non bayrami kunlarida yuz berdi.

⁴U Butrusni qamatib, toʻrt kishidan iborat toʻrt guruh askarni qorovul qilib qoʻydi. Fisih bayramidan[134] soʻng uni xalqning oldiga olib chiqib, hukm qilishni rejalashtirgan edi.

⁵Butrus hibsda ekan, jamoat u uchun Xudoga chin dildan ibodat qildi.

⁶Hirod Butrusni xalq oldiga olib chiqmoqchi boʻldi. Oʻsha kundan oldingi tunda Butrus ikki soqchi oʻrtasida uxlayotgan edi. U ikkita zanjir bilan kishanlangan, qamoqxona eshigida soqchilar navbatchilik qilishardi.

⁷Birdan Egamizning farishtasi zohir boʻlib, hujrada nur porlab ketdi. Farishta Butrusning yonboshiga turtib uygʻotdi va: “Tezda oʻrningdan tur!” dedi. Shunda kishanlar Butrusning bilaklaridan tushib ketdi.

⁸Farishta unga: — Kamaringni bogʻla, chorigʻingni kiy, — dedi. Butrus aytilganday qildi. Keyin farishta unga: — Choponingni kiyib, ortimdan yur, — dedi.

⁹Butrus farishtaga ergashib, qamoqxonadan chiqdi. Ammo u farishtaning bu ishlari haqiqat ekanini anglamasdan, “vahiy koʻryapman, shekilli”, deb oʻylardi.

¹⁰Ular birinchi va ikkinchi darvoza soqchilari oldidan oʻtgandan keyin, shaharga olib boradigan temir darvoza oldiga keldilar. Darvoza oʻz — oʻzidan ularga ochildi. Ular tashqariga chiqib, soʻqmoq boʻylab ketdilar. Birdan farishta Butrusning oldida koʻzdan gʻoyib boʻldi.

¹¹Butrus shu zahoti oʻziga kelib: “Endi ishonchim komilki, Egamiz Oʻzining farishtasini yuborib, meni Hirodning qoʻlidan, yahudiy xalqining adovatidan qutqaribdi”, dedi.

¹²Butrus shularni anglab, Maryamning uyiga yoʻl oldi. Maryam Yuhannoning onasi edi. Yuhannoning ikkinchi ismi Mark edi. Maryamning uyida koʻpchilik toʻplanib, ibodat qilishayotgan ekan.

¹³Butrus darvozani taqillatgan edi, Roda ismli qiz xabar olgani chiqdi.

¹⁴Qiz Butrusning ovozini tanigach, shunchalik xursand boʻlib ketdiki, darvozani ochish oʻrniga, ichkariga yugurib kirdi — da, Butrus darvoza oldida turibdi, deb e’lon qildi.

¹⁵Ular qizga: — Aqlingni yeb qoʻyibsan, — dedilar. Ammo qiz gapida turib olgach, ular: — U Butrusning farishtasi[135], — deb javob berdilar.

¹⁶Butrus darvozani taqillatishda davom etdi. Ular darvozani ochib, Butrusni koʻrdilar — u, hayron boʻlib qoldilar.

¹⁷Butrus qoʻli bilan “jim” degan ishorani qildi va Egamiz uni qanday qilib zindondan ozod qilganini soʻzlab berdi. Soʻngra “Bu voqeani Yoqubga[136] va boshqa imonlilarga aytinglar”, deb qoʻshib qoʻydi. Shundan keyin Butrus u yerdan chiqib, boshqa yerga bordi.

¹⁸Tong otgach, vahimali shovqin — suron koʻtarildi. Askarlar bir — biridan: “Butrus qayerga gʻoyib boʻldi?” deb soʻrardilar.

¹⁹Hirod Butrusni izlashga buyruq berdi, ammo uni topa olmadilar. Hirod soqchilarni soʻroq qilib, ularni oʻlimga mahkum qildi. Shundan keyin Hirod Yahudiyadan Qaysariyaga[137] borib, oʻsha yerda turib qoldi.

²⁰Shoh Hirod Tir va Sidon aholisidan qattiq gʻazablandi. Bu shaharlar oziq — ovqat boʻyicha Hirodning shohligiga qaram boʻlgani uchun, Tir va Sidon vakillari maslahatlashib, Hirod bilan koʻrishgani keldilar. Ular saroy noziri Blastusni oʻz tomoniga ogʻdirib olganlaridan keyin, Hirod bilan sulh tuzmoqchi edilar.

²¹Hirod ularni qabul qiladigan kuni shohona liboslarini kiyib, taxtiga oʻtirdi — da, ularga nutq soʻzladi.

²²Odamlar uning bu nutqini eshitib: “Inson emas, balki xudo gapiryapti!” deb xitob qildilar.

²³Hirod Xudoni sharaflamagani uchun oʻsha zahotiyoq Egamizning farishtasi uni urdi. Hirod qurtlarga yemish boʻlib olamdan oʻtdi.

²⁴Xudoning kalomi esa tobora yoyilib, Isoga ergashuvchilar koʻpayib borardi.

²⁵Barnabo bilan Shoul[138] Quddusda topshiriqni bajarib boʻlishgach[139], Antioxiyaga qaytdilar. Ular oʻzlari bilan birga Yuhannoni ham olib keldilar. Yuhannoning ikkinchi ismi Mark edi.