Read Uzbek Muqaddas Kitob Havoriylar 14 Bible Online

Havoriylar 14 - Uzbek Muqaddas Kitob bible

Havoriylar 14

¹Xuddi shunga oʻxshash voqea Ikoniya shahrida[167] yuz berdi: Pavlus bilan Barnabo sinagogaga kirib, otashin va’z aytdilar. Natijada bir qancha yahudiylar bilan gʻayriyahudiylar[168] imonga keldilar.

²Ammo imonga kelmagan yahudiylar gʻayriyahudiylarni qayrab, ularni imonlilarga qarshi qoʻzgʻatdilar.

³Pavlus bilan Barnabo bu yerda uzoq vaqt qolib, Rabbimiz Iso haqida jasorat bilan gapiraverdilar. Rabbimiz ham ularga moʻjizalar va alomatlar koʻrsatish qudratini berib, Oʻzining marhamati haqidagi xabarni ular orqali tasdiqladi.

⁴Shahar aholisi esa ikkiga boʻlindi: ba’zilari yahudiylar tomonga oʻtdi, boshqalari esa havoriylarga qoʻshildi.

⁵Shundan keyin yahudiylar va gʻayriyahudiylar oʻz yoʻlboshchilari bilan birga havoriylarga hamla qilib, ularni toshboʻron qilmoqchi boʻldilar.

⁶Havoriylar bu toʻgʻrida bilib qolganlaridan keyin Likoniyaning boshqa hududlariga qochib ketdilar. Ular Listra va Darba shaharlarida va ularning yon — atrofidagi joylarda

⁷ham Xushxabarni va’z qilishda davom etdilar.

⁸Listra shahrida bir odam boʻlib, oyoqlarini qimirlata olmasdan oʻtirardi. U tugʻma mayib boʻlib, hech qachon yurmagan edi.

⁹Pavlus gapirayotganda, u quloq solib oʻtirgan edi. Pavlus unga tikilib qaradi. U odamning shifo topishiga ishonchi borligini koʻrib,

¹⁰unga baland ovozda dedi: — Oʻrningdan tur![169] U odam sakrab oʻrnidan turdi — da, yura boshladi.

¹¹Olomon Pavlusning qilgan ishini koʻrgach, Likoniy tilida: “Xudolar bizning oldimizga inson qiyofasida kelibdi!” deb shovqin soldilar.

¹²Ular Barnaboni Zevs, Pavlus notiq boʻlgani uchun uni Xermes[170] deb atashdi.

¹³Zevsning ma’badi shahar tashqarisida edi. Zevs ruhoniysi shahar darvozalariga buqalar va gulchambarlar olib keldi. Ruhoniy bilan olomon qurbonlik nazr qilmoqchi boʻldilar.

¹⁴Havoriylar Barnabo bilan Pavlus buni eshitib, qattiq iztirob chekib, kiyimlarini yirtdilar[171], olomon orasiga yorib kirdilar. Ular shunday deb baqirdilar:

¹⁵— Nimaga bunday qilyapsizlar! Biz ham sizlar singari, insonlarmiz! Biz sizlarga Xushxabar olib keldik, toki sizlar anavi behuda narsalardan yuz oʻgiringlar, osmon bilan yerni, dengizni va ulardagi hamma mavjudotni yaratgan barhayot Xudoga yuz buringlar.

¹⁶Oʻtmishda Xudo hamma xalqlarni oʻz holiga qoʻydi.

¹⁷Ammo shunga qaramay, Oʻz ezguligini koʻrsatib, osmondan yomgʻir yogʻdirib keldi, mavsumida hosil berdi, rizqingizni tugal qilib, yuraklaringizni shodlikka toʻldirdi.

¹⁸Shu gaplarni aytib, havoriylar, biz uchun qurbonlik keltirmanglar, deb olomonni zoʻrgʻa toʻxtatib qoldilar[172].

¹⁹Antioxiya va Ikoniyadan ba’zi bir yahudiylar kelib, xalqni oʻzlariga ogʻdirib oldilar. Ular[173] Pavlusni toshboʻron qildilar va “U oʻldi, shekilli”, deb uni shahardan tashqariga sudrab chiqarib tashladilar.

²⁰Shogirdlar Pavlusning atrofiga yigʻilganlaridan keyin esa, u oʻrnidan turib, shaharga qaytib kirdi. Ertasi kuni esa Barnabo bilan birga Darba shahriga ketdi.

²¹Ular Xushxabarni Darba shahrida va’z qilib, koʻp shogirdlar orttirganlaridan keyin, Listra shahriga, soʻngra Ikoniya va Antioxiya shaharlariga qaytib keldilar.

²²Ular shogirdlarni imonda sobit qolishga undab: “Biz Xudoning Shohligiga kirishimiz uchun koʻp mashaqqatlarni boshdan kechirishimiz kerak”, deb dalda berardilar.

²³Ular har bir imonlilar jamoatiga oqsoqollar tayin qildilar. Soʻng ibodat qilib va roʻza tutib, oqsoqollarni oʻzlari ishongan Rabbimiz Isoning panohiga topshirdilar.

²⁴Soʻngra ular Pisidiyadan oʻtib, Pamfiliyaga keldilar.

²⁵Perga shahrida Iso haqidagi xabarni va’z qilganlaridan keyin, Attaliyaga ketdilar.

²⁶Soʻng kemada Antioxiyaga qaytib keldilar. Bu shahardagi jamoat ularni mana shu qilgan ishlari uchun Xudoning marhamatiga topshirgan edi[174].

²⁷Havoriylar Antioxiyaga kelganlaridan keyin, jamoatni bir joyga yigʻdilar va Xudo ular orqali nimalar qilganini, gʻayriyahudiylarning imonga kelishi uchun Xudo qanday yoʻl ochib berganini aytib berdilar.

²⁸Havoriylar bu yerda shogirdlar bilan birga ancha vaqt qoldilar.