Read Uzbek Muqaddas Kitob Havoriylar 18 Bible Online

Havoriylar 18 - Uzbek Muqaddas Kitob bible

Havoriylar 18

¹Shundan keyin Pavlus Afinadan ketib, Korinfga yoʻl oldi.

²U yerda Pavlus Akil degan bir yahudiy bilan tanishdi. Akil Pontusda tugʻilgan boʻlib, xotini Priskilla bilan Italiyadan yaqinda kelgan ekan. Chunki Qaysar[205] Klavdiy[206], hamma yahudiylar Rimdan chiqib ketsin, deb farmon bergan edi. Pavlus ularni koʻrgani bordi.

³Ular hamkasb boʻlib, chodir tikuvchilik bilan shugʻullanganlari uchun, Pavlus ularnikida qolib, ishladi.

⁴Har Shabbat kuni u sinagogada munozara oʻtkazib, yahudiylar va gʻayriyahudiylarni[207] ishontirishga harakat qilardi.

⁵Silas bilan Timoʻtiy Makedoniyadan kelganlaridan keyin, Pavlus butun vaqtini Iso haqidagi xabarni va’z qilishga bagʻishladi. U yahudiylarga Isoning Masih ekani toʻgʻrisida guvohlik berardi.

⁶Yahudiylar esa Pavlusga qarshi chiqib, uni haqorat qildilar. Pavlus kiyimlaridan changni qoqdi — da[208]: “Qoningiz oʻz gardaningizda qolsin, menda ayb yoʻq, hozirdan boshlab gʻayriyahudiylar orasiga ketganim boʻlsin”, dedi ularga.

⁷Shunday qilib, Pavlus sinagogani tark etib, Titas Yustus[209] degan bir odamning uyiga bordi. Titas Yustus ham xudojoʻy[210] odam boʻlib, uning uyi sinagoganing yonginasida edi.

⁸Sinagoganing qavmboshisi Krispus butun xonadoni bilan Rabbimiz Isoga imon keltirdi. Pavlusdan Xushxabar eshitgan Korinfliklarning koʻpchiligi ishonib, suvga choʻmdirildilar.

⁹Bir kuni tunda Rabbimiz Iso vahiyda Pavlusga zohir boʻlib, dedi: “Qoʻrqma! Gapiraver, sukut saqlama!

¹⁰Men sen bilan birgaman. Bu shahardagi koʻpchilik Mening odamlarim boʻlgani uchun hech kim senga zarar yetkaza olmaydi.”

¹¹Shunday qilib, Pavlus bu shaharda bir yilu olti oy turib, xalqqa Xudoning kalomidan ta’lim berdi.

¹²Gallion Axaya viloyatiga hokimlik qilgan paytlarda[211], yahudiylar birgalashib Pavlusga qarshi chiqdilar va uni sudrab, mahkamaga olib keldilar.

¹³Ular shunday dedilar: — Mana bu odam qonunga qarshi yoʻllar bilan Xudoga sajda qilishga xalqni da’vat qilyapti.

¹⁴Pavlus endi gapirmoqchi boʻlib turgan edi, Gallion yahudiylarga shunday dedi: — Ey yahudiylar! Agar da’voingiz yomon qilmish yoki ogʻir jinoyat masalasida boʻlganda edi, shikoyatlaringizni qabul qilishga sabab topgan boʻlardim.

¹⁵Ammo bu da’volaringiz shunchaki ayrim soʻzlar, ismlar va oʻz qonuningiz borasida ekan, bularni oʻzlaringiz koʻrib chiqaveringlar. Men bu masalalarning hakami boʻlmayman.

¹⁶Gallion yahudiylarni mahkamadan haydab chiqardi.

¹⁷Shunda olomon sinagoga qavmboshisi Sostenisni tutib oldi — da, mahkamaning oldida uni kaltakladi. Ammo Gallion bularning birontasiga e’tibor bermadi.

¹⁸Pavlus Korinfda imonlilar bilan uzoq vaqt turdi. Soʻng ular bilan xayrlashib, kemada Suriyaga suzib ketdi. Akil bilan Priskilla ham u bilan birga ketdilar. Pavlus Xudoga ont ichgani uchun Kenxreyadan suzib ketishdan oldin sochini oldirdi[212].

¹⁹Ular Efesga yetib keldilar. Pavlus sinagogaga borib, yahudiylar bilan munozara oʻtkazdi. Odamlar Pavlusdan, biz bilan uzoqroq qoling, deb iltimos qildilar. Ammo Pavlus rozi boʻlmadi. Ketishidan oldin esa ularga: “Xudo xohish bildirsa[213], sizlarning oldingizga qaytib kelaman”, dedi. Shundan keyin Akil bilan Priskillani Efesda qoldirib, oʻzi kemada suzib ketdi.

²²Pavlus Qaysariyaga yetib kelgandan keyin, Quddusga bordi va imonlilar jamoati bilan koʻrishdi. Shundan soʻng Antioxiyaga ketdi.

²³U yerda ma’lum vaqt boʻlgach, yana yoʻlga chiqdi[214] va Galatiya, Frigiya oʻlkalarini kezib, barcha imonlilarga dalda berdi.

²⁴Shu paytda Apollos degan bir yahudiy Efesga keldi. U asli Iskandariyadan edi. U gapga chechan odam boʻlib, Muqaddas bitiklarni[215] juda yaxshi bilardi.

²⁵U Rabbimiz Isoning yoʻlida ta’lim olgan boʻlib, otashin ruh bilan gapirardi. Iso haqida toʻgʻri ta’lim berardi. Suvga choʻmdirish haqida esa faqatgina Yahyoning ta’limotini bilardi[216].

²⁶Apollos sinagogada jasorat bilan gapira boshladi. Priskilla bilan Akil Apollosning va’zini eshitganlaridan keyin, uni uyiga taklif qilib, Xudoning yoʻlini yanada aniqroq tushuntirib berdilar.

²⁷Apollos Axayaga borishga qaror qildi. Efesdagi imonlilar Axayadagi shogirdlarga, Apollosni yaxshi qabul qilsangizlar, deb maktub yozdilar. Apollos Axayaga kelgach, Xudoning inoyati bilan imonga kelganlarga katta yordam berdi.

²⁸Apollos, Muqaddas bitiklar asosida Isoning Masih ekanini isbot etib, qat’iyat bilan yahudiylarning nohaqligini ochiqchasiga fosh qilardi.