Read Uzbek Muqaddas Kitob Havoriylar 24 Bible Online

Havoriylar 24 - Uzbek Muqaddas Kitob bible

Havoriylar 24

¹Besh kun oʻtgach, oliy ruhoniy Xanoniyo bir necha yoʻlboshchilar va Tertullus degan bir huquqshunos bilan birga Qaysariyaga[261] keldi. Ular Pavlusga qarshi arzlarini hokimga[262] bayon qilmoqchi boʻldilar.

²Pavlusni chaqirib keltirganlaridan keyin, Tertullus uni ayblay boshladi:

³“Janobi oliylari! Sizning dono rahbarligingiz ostida biz anchadan buyon tinch — xotirjam yashayapmiz, uzoqni koʻra bilishingiz sharofati bilan xalqimiz uchun islohotlar amalga oshirildi. Biz buni hamma joyda va har doim e’tirof etamiz, sizdan chuqur minnatdormiz.

⁴Men sizning vaqtingizni koʻp olmoqchi emasman, marhamatingizni darigʻ tutmay, bizning qisqa axborotimizga quloq solishingizni iltimos qilaman.

⁵Biz, aslida, bu odamni vabo singari xavfli deb bilamiz. U dunyodagi hamma yahudiylar orasida isyon boshladi. U nasroniylar mazhabining[263] rahnamosidir.

⁶U hatto Ma’badni bulgʻashga harakat qildi. Shuning uchun biz uni hibsga oldik[264].

⁸Bu odamni oʻzingiz soʻroq qilsangiz, biz uni nimada ayblayotganimizni uning oʻzidan bilib olasiz.”

⁹Yahudiylar bu ayblovlarga qoʻshilib, bularning hammasi haqiqat, deb aytdilar.

¹⁰Hokim, gapir, deb Pavlusga ishora qilgandan keyin, u shunday javob berdi: “Bilaman, siz ancha yildan beri bu xalq ustidan hukmron boʻlib kelasiz. Shuning uchun oʻzimni sizning huzuringizda himoya qilayotganimdan xursandman.

¹¹Oʻzingiz bilib olishingiz mumkin: Xudoga sajda qilgani Quddusga borganimga oʻn ikki kundan oshgani yoʻq.

¹²Men Ma’badda biron odam bilan tortishib qolganimni yoki sinagogalarda, yo boʻlmasa shaharda olomon orasiga gʻulgʻula solganimni ular koʻrganlari yoʻq.

¹³Qolaversa, hozir menga qarshi aytayotgan ayblovlarini ular isbotlab bera olmaydilar.

¹⁴Ammo shuni tan olishim kerakki, ular Isoning yoʻlini soxta e’tiqod deb aytishadi. Men esa Isoning yoʻli orqali ota — bobolarimizning Xudosiga sajda qilaman. Tavrotga mos kelgan va Paygʻambarlar bitiklarida[265] yozilgan har bir soʻzga men ishonaman.

¹⁵Men mana shu odamlar singari, Xudoga umid bogʻlaganman. Xudo solihlarni va fosiqlarni tiriltirishiga men ham ularday ishonaman.

¹⁶Ayni shu sababdan Xudo va xalq oldida men doim vijdonimni sof saqlashga tirishaman.

¹⁷Mana, Quddusda boʻlmaganimga bir necha yil boʻldi, endi xalqimga xayr — sadaqa berish va nazr qilish uchun Quddusga borgandim.

¹⁸Men shularni bajarayotganimda, ular meni Ma’badda koʻrib qoldilar. Men poklanish marosimini ado etayotgan edim, yonimda olomon yoʻq edi, shovqin — suron ham koʻtarmagan edim.

¹⁹Asiya viloyatidan boʻlgan bir necha yahudiylar oʻsha yerda edilar. Agar ularning menga qarshi biron da’volari boʻlsa, ular oʻzlari sizning huzuringizga kelib, oʻz ayblovlarini bildirishlari kerak.

²⁰Yoki bu yerdagilar aytishsin, men Oliy kengash a’zolari oldida turganimda menda qanday jinoyat topdilar ekan?

²¹Men ularning oldida turganimda, baland ovozda: «Men oʻliklar tiriladi, deb aytganim uchun bugun oldingizda hukm qilinyapman», deb aytgan edim. Bundan boshqa nima aybim bor?”

²²Isoning yoʻli toʻgʻrisida batafsil xabardor boʻlgan Feliks yigʻilishni toʻxtatib: “Mingboshi Lisiyas kelgandan keyin, sening ishing toʻgʻrisida qaror qabul qilaman”, dedi.

²³Feliks yuzboshiga: “Uni qamab qoʻy, ammo unga ozgina erkinlik ber, uning ehtiyojlari uchun xizmat qilmoqchi boʻlgan doʻstlariga ijozat ber”, deb buyruq berdi.

²⁴Bir necha kundan keyin Feliks xotini Drusilla bilan keldi. Drusilla yahudiy edi[266]. Feliks Pavlusni chaqirtirib keldi va Iso Masihga ishonish toʻgʻrisidagi gaplarini tingladi.

²⁵Pavlus solihlik, nafsni tiyish, qiyomat kunining kelishi toʻgʻrisida gapirar ekan, Feliks qoʻrqib, dedi: “Sen endi boraver. Imkon topilgan zahoti, seni chaqiraman.”

²⁶Feliks: “Pavlus menga pora beradi”, deb umid qilardi, shuning uchun Pavlusni tez — tez chaqirib, u bilan suhbatlashardi.

²⁷Oradan ikki yil oʻtgach, Feliksning oʻrniga Poʻrkiyus Festus hokim boʻldi. Feliks yahudiylarning koʻnglini olmoqchi boʻlib, Pavlusni qamoqda qoldirdi.