Read Uzbek Muqaddas Kitob Havoriylar 28 Bible Online

Havoriylar 28 - Uzbek Muqaddas Kitob bible

Havoriylar 28

¹Biz[290] qirgʻoqqa eson — omon yetib borganimizdan keyin, bildikki, bu orolning nomi Malta ekan.

²Yerli aholi bizga gʻoyat doʻstona munosabatda boʻldi. Yomgʻir yogʻayotgani va sovuq boʻlgani uchun ular olov yoqib, hammamizni olov atrofiga taklif qildilar.

³Pavlus shox — shabba yigʻib kelib, olov ustiga tashlayotganda, bir zaharli ilon issiqdan qochib, uning qoʻliga osilib qoldi.

⁴Yerli aholi Pavlusning qoʻliga osilib qolgan ilonni koʻrib bir — birlariga: “Bu odam qotil boʻlsa kerak, u dengizdan qutulsa ham, Qasos xudosi unga yashashga imkon bermadi”, dedilar.

⁵Ammo Pavlus ilonni olov ichiga silkitib otdi, oʻzi esa hech qanday zarar koʻrmadi.

⁶Aholi, hozir bu odam shishib ketadi yoki birdan yiqilib oʻladi, deb kutardi. Ular uzoq kutdilar, lekin gʻayritabiiy ravishda unga hech narsa boʻlmaganini koʻrdilar. Endi odamlar fikrlarini oʻzgartirib: “U xudo ekan”, deb ayta boshladilar.

⁷Oʻsha joyning yaqinida bir dala bor edi, bu dala orol boshligʻi Publiyusga tegishli ekan. Publiyus bizni uyiga olib ketib, uch kun mehmon qildi.

⁸Uning otasi ichburugʻdan isitmalab, toʻshakda yotardi. Pavlus uning xonasiga borib, ibodat qildi, unga qoʻlini qoʻyib, shifo berdi.

⁹Shu voqea yuz bergandan keyin, oroldagi hamma xasta odamlar Pavlusning oldiga kelib, shifo topdilar.

¹⁰Ular bizga koʻp izzat — hurmat koʻrsatdilar. Joʻnab ketayotganimizda esa safarimiz uchun zarur oziq — ovqatlarni kemaga joylashtirdilar.

¹¹Uch oydan keyin Iskandariyadan kelgan kema bilan dengizga chiqdik. Kema “Egizak xudolar”[291] deb atalardi. U orolda qishlab qolgan edi.

¹²Biz Surakuz shahriga borib, u yerda uch kun turdik.

¹³U yerdan suzib ketib, Regiumga keldik. Ertasi kuni janubdan shamol esa boshladi. Ikkinchi kun Puteol shahriga yetib keldik.

¹⁴U yerda bir necha imonlilar bilan uchrashdik. Ular: “Biz bilan qolinglar”, deb iltimos qildilar. Bir haftadan keyin biz Rimga ketdik.

¹⁵Rimdagi imonlilar biz toʻgʻrimizda eshitib, bizni kutib olgani yoʻlga chiqishdi. Ba’zilari bilan Appiyus bozorida koʻrishdik, boshqa birlari bilan esa Uch mehmonxona[292] degan joyda uchrashdik. Pavlus ularni koʻrib, Xudoga shukur aytdi va yanada dadillashdi.

¹⁶Biz Rimga kelganimizdan keyin, Pavlusga[293] bir askar kuzatuvida yolgʻiz yashashga ruxsat berildi.

¹⁷Pavlus uch kundan keyin mahalliy yahudiylarning yoʻlboshchilarini chaqirdi. Ular yigʻilishgach, Pavlus dedi: — Birodarlar! Men xalqimizga yoki ota — bobolarimiz odatlariga qarshi biron narsa qilmagan boʻlsam ham, meni Quddusda qamab, Rim amaldorlarining qoʻliga topshirishdi.

¹⁸Ular meni tekshirib koʻrganlaridan keyin, meni ozod qilmoqchi boʻldilar, chunki oʻlimga loyiq biron ish qilmagan edim.

¹⁹Ammo yahudiylar qarshilik qilganlaridan keyin, men Qaysarning[294] hukmini talab qilishga majbur boʻldim. Men bu bilan oʻz xalqimni ayblamoqchi emasman.

²⁰Shu sababdan men sizlar bilan koʻrishib, suhbatlashishni istadim. Aslini olganda, men Isroilning umidi[295] uchun zanjirband qilinganman.

²¹Ular Pavlusga dedilar: — Siz toʻgʻringizda Yahudiyadan bironta xat olmadik, bu yerga tashrif buyurgan birodarlarimizdan birontasi ham siz toʻgʻringizda biron xabar yoki hech qanday yomon gap aytmadi.

²²Ammo fikringizni oʻzingizdan eshitishni istardik, chunki bu mazhabga[296] nisbatan har yerda qarshi gapirib yurganlarini biz bilamiz.

²³Ular Pavlus bilan bir kunni kelishib oldilar. Oʻsha kuni ular Pavlus turgan joyga bir talay odamni boshlab keldilar. Pavlus ertalabdan kechgacha ularga Xudoning Shohligi toʻgʻrisida tushuntirdi. Shuningdek, Musoning Tavrot kitobidan va Paygʻambarlar bitiklaridan[297] Iso toʻgʻrisida ishonchli dalillar keltirdi.

²⁴Ulardan ba’zilari Pavlusning aytganlariga ishondilar, boshqalari esa umuman ishonmadilar.

²⁵Shunday qilib, ular oʻzaro bahslashdilar. Ular ketmoqchi boʻlib turganlarida Pavlus shunday dedi: “Muqaddas Ruh Ishayo paygʻambar orqali ota — bobolaringizga ushbu gapni toʻgʻri aytgan ekan:

²⁶«Bor, mana shu xalqqa ayt: ‘Sizlar tinglab turasiz — u, lekin hech tushunmaysiz, Qarab turasiz — u, ammo hech anglab yetmaysiz.’

²⁷Zero, bu xalqning aqli oʻtmas boʻlib qoldi, Quloqlari garang boʻldi, Koʻzlarini yumib olishdi. Aks holda, koʻzlari koʻrgan boʻlardi, Aks holda, quloqlari eshitgan boʻlardi, Aqllari anglagan boʻlardi, Yana Menga qaytgan boʻlishardi, Men ularga shifo bergan boʻlardim.»[298]

²⁸Sizlarga shu ma’lum boʻlsinki, Xudoning najoti gʻayriyahudiylarga yuborilgan. Ular quloq soladilar[299].”

³⁰Pavlus ijaraga olgan uyida ikki yil yashadi va uni koʻrgani kelgan hammani qabul qildi.

³¹U jasorat bilan Xudoning Shohligi haqida va’z aytib, Rabbimiz Iso Masih toʻgʻrisida ta’lim berdi. Hech kim unga buni taqiqlashga urinmadi.