Read Uzbek Muqaddas Kitob Havoriylar 4 Bible Online

Havoriylar 4 - Uzbek Muqaddas Kitob bible

Havoriylar 4

¹Butrus bilan Yuhanno xalqqa gapirib turganlarida, bir necha ruhoniylar[38], Ma’bad mirshabboshisi[39] va sadduqiy[40] mazhabining ba’zi a’zolari keldilar.

²Ularning qattiq jahli chiqqan edi, chunki bu ikkala havoriy xalqqa ta’lim berib, Iso oʻlikdan tirildi, deb va’z qilayotgan edilar.

³Ular ikkala havoriyni ushlab, vaqt kech boʻlgani uchun ertasi kun ertalabgacha qamoqda saqladilar.

⁴Ammo bu xabarni eshitganlarning koʻpchiligi imonga keldi. Shunday qilib, imonlilarning orasidagi erkaklarning soni besh mingga yetdi.

⁵Keyingi kun bosh ruhoniylar[41], yoʻlboshchilar, Tavrot tafsirchilari[42] Quddusda yigʻildilar.

⁶Oliy ruhoniy Xanan[43], Kayafas, Yuhanno, Iskandar va oliy ruhoniy oilasiga mansub boʻlgan boshqa erkaklar yigʻinda ishtirok etdilar.

⁷Ular ikkala havoriyni oʻrtaga turgʻizib qoʻyib, soʻradilar: “Buni qanday qudrat bilan, kimning nomidan qildingizlar?”

⁸Shunda Muqaddas Ruhga toʻlgan Butrus ularga shunday dedi: “Ey xalq rahnamolari va yoʻlboshchilari!

⁹Agar bir xasta odamga qilingan yaxshilik tufayli bizdan hisob talab qilayotgan boʻlsangiz va bu odamning qanday qilib sogʻayganini soʻrayotgan boʻlsangiz,

¹⁰sizlar, ey Isroil xalqi, hammalaringiz shuni bilib qoʻyinglarki, mana bu odam Nosiralik Iso Masih nomi bilan tamomila sogʻayib, oldingizda turibdi. Isoni sizlar xochga mixlagan edingizlar, Xudo esa Uni oʻlikdan tiriltirdi.

¹¹Axir, Iso toʻgʻrisida Muqaddas bitiklarda shunday yozilgan: «Ey binokorlar, siz rad etgan tosh Binoning tamal toshi[44] boʻldi.»[45]

¹²Najot boshqa hech kimdan kelmaydi. Uning nomi — butun olamda najot beradigan yagona nomdir.”

¹³Kengash[46] a’zolari Butrus bilan Yuhannoning jasoratini koʻrdilar va ularning oʻqimagan, oddiy odam ekanliklarini bilib, hayron qoldilar. Butrus bilan Yuhanno Isoning sheriklari ekanini angladilar.

¹⁴Shifo topgan odam ham ikkala havoriy bilan birga turgan edi. Shuning uchun xalq rahnamolari va yoʻlboshchilari uni koʻrib, ikkovining gaplariga qarshi biron soʻz ayta olmadilar.

¹⁵Shunday qilib, ular havoriylarga: “Majlisxonadan chiqinglar”, deb buyruq berdilar. Soʻngra oʻzaro muhokama qila boshladilar:

¹⁶“Bu odamlarni nima qilamiz? Bu ajoyib moʻjizani mana shu odamlar qilganini Quddusdagi har bir odam biladi, biz buni inkor eta olmaymiz.

¹⁷Ammo bu xabar xalq orasida yanada yoyilib ketishining oldini olish uchun, bundan keyin Isoning nomi bilan hech kimga gapirmaysizlar, deb ularni ogohlantirib qoʻyamiz.”

¹⁸Shunday qilib, ular ikkovini chaqirdilar va: “Isoning nomi bilan umuman gapirmaysizlar yoki ta’lim bermaysizlar”, deb buyruq berdilar.

¹⁹Butrus bilan Yuhanno esa ularga shunday javob qaytardilar: “Xudodan koʻra sizlarga itoat etsak, Xudoning nazarida toʻgʻri boʻladimi? Oʻzlaringiz xulosa chiqaraveringlar.

²⁰Biz esa koʻrganlarimiz va eshitganlarimiz toʻgʻrisida gapirmasdan tura olmaymiz.”

²¹Shunday qilib, Kengash a’zolari ularni oxirgi marta ogohlantirib, qoʻyib yubordilar. Ularni jazolash uchun hech qanday sabab topa olmagandilar, chunki butun xalq yuz bergan voqeani bilib, Xudoga hamdu sano aytardi.

²²Axir, moʻjizali alomat tufayli shifo topgan odam qirq yildan oshiq vaqt davomida shol boʻlgan edi.

²³Butrus bilan Yuhanno ozod boʻlishlari bilanoq, doʻstlarining oldiga qaytib keldilar va bosh ruhoniylar bilan yoʻlboshchilarning ularga aytgan gaplarini soʻzlab berdilar.

²⁴Doʻstlari bu gaplarni eshitganlaridan keyin, hammalari birgalikda baland ovozda Xudoga shunday deb ibodat qildilar: “Ey Egamiz! Sen osmon bilan yerni, dengizni va ulardagi hamma mavjudotni yaratgansan!

²⁵Quling — bobomiz Dovud orqali Muqaddas Ruhing bilan shunday degansan: «Nega quturadi xalqlar?! Nega behuda fitna qilar elatlar?!

²⁶Egamizga va Uning Masihiga qarshi Zamin shohlari saf tortdilar, Hukmdorlar Unga qarshi birlashdilar.»[47]

²⁷Haqiqatan, Hirod[48] bilan Poʻntiy Pilat[49] gʻayriyahudiylar va Isroil xalqi bilan birga bu shaharda Sening muqaddas Quling[50], Oʻzing Masih qilib tanlagan Isoga qarshi toʻplandilar[51].

²⁸Qudrating va xohish — irodang bilan Oʻzing ilgaridan qaror qilgan hamma narsani ular ijro etdilar.

²⁹Endi, ey Egamiz, ularning tahdidlariga qara! Sening soʻzingni jasorat bilan aytishimiz uchun, biz, qullaringga kuch ber.

³⁰Qudratingni koʻrsat, toki Muqaddas Quling[52] Iso nomi bilan xastalarga shifo beraylik, alomatlar va moʻjizalar koʻrsataylik.”

³¹Hammalari ibodat qilib boʻlganlaridan keyin, ular yigʻilib turgan joy silkindi. Hammalari Muqaddas Ruhga toʻlib, Xudoning soʻzini jasorat bilan gapiradigan boʻldilar.

³²Imonga kelganlar yakdil va hamjihat edilar. Ulardan birontasi oʻziga qarashli biron narsani “Bu meniki”, deb aytmas, bor mol — mulklarini umumiy deb bilishardi.

³³Havoriylar buyuk qudrat bilan Rabbimiz Isoning tirilganiga guvohlik berardilar. Xudo ularning hammalariga moʻl — koʻl muruvvat koʻrsatardi.

³⁴Imonlilarning orasida bironta muhtoj odam yoʻq edi. Dala yoki uy — joy egalari bor narsalarini sotardilar, sotuvdan tushgan mablagʻni olib kelib,

³⁵havoriylarning ixtiyoriga berardilar. Pullar odamlarning ehtiyojiga qarab taqsimlanardi.

³⁶Imonlilar orasida Levi qabilasidan boʻlgan Yusuf ismli bir odam bor edi. U asli Kiprdan edi. Havoriylar unga Barnabo, ya’ni “dalda beruvchi” degan nom bergan edilar.

³⁷Yusuf ham dalasini sotib, pulini havoriylarga in’om qildi.