Read Uzbek Muqaddas Kitob Rimliklar 10 Bible Online

Rimliklar 10 - Uzbek Muqaddas Kitob bible

Rimliklar 10

¹Birodarlarim, men oʻz xalqim Isroilning najot topishini chin dildan istayman va bu uchun Xudoga iltijo qilaman.

²Axir, oʻzim guvohman: ular jon — jahdlari bilan Xudoga berilganlar, ammo haqiqiy tushunchaga ega emaslar.

³Xudoning insonlarni oqlash yoʻlini tushunmasdan, oʻzlarini oqlash niyatida, ular Xudoning haq yoʻliga boʻysunmadilar.

⁴Iso Masih esa qonunning maqsadini amalga oshirdi, shu tariqa hamma imon orqali oqlanadi.

⁵Qonun orqali oqlanish haqida Muso quyidagicha yozgan edi: “Xudoning qonun — qoidalariga rioya qilgan odam hayotdan bahramand boʻladi.”[59]

⁶Imon orqali oqlanish haqida esa Muqaddas bitiklarda nima deb yozilgan? “Yuragingizda: «Kim osmonga chiqadi? Kim tubsiz chuqurlikka tushadi?» deya soʻramanglar”, deb yozilgan[60]. Demak, Masihni yerga tushirish uchun hech kim osmonga chiqishi shart emas, Masihni tiriltirish uchun ham hech kim oʻliklar diyoriga[61] tushishi shart emas.

⁸Axir, Muqaddas bitiklarda yana shunday yozilgan: “Bu kalom sizning yaqiningizdadir, ogʻzingizda va yuragingizdadir.”[62] Biz va’z qilayotgan imon haqidagi kalom ana shudir.

⁹Agar oʻz ogʻzingiz bilan Isoni Rabbim deb e’tirof etib, Xudo Uni oʻlikdan tiriltirganiga chin yurakdan ishonsangiz, najot topasiz.

¹⁰Chunki inson qalbidan ishonib oqlanadi va ogʻzi bilan e’tirof etib najot topadi.

¹¹Muqaddas bitiklarda yozilganday: “Unga ishongan hech bir inson uyatga qolmaydi.”[63]

¹²Yahudiylar bilan gʻayriyahudiylar orasida aslo farq yoʻq. Ularning Rabbiysi bir boʻlib, Unga iltijo qilganlarning birontasidan U Oʻz mehr — shafqatini ayamaydi.

¹³Axir, “Rabbimizga iltijo qilgan har bir inson qutqariladi”[64], deb yozilgan — ku.

¹⁴Ammo Rabbimiz Isoga ishonmaganlar qanday qilib Unga iltijo qiladilar?! U haqda eshitmagan boʻlsalar, qanday qilib Unga ishonadilar?! Hech kim ularga Xushxabarni e’lon qilmasa, qanday qilib eshitadilar?!

¹⁵Ularni hech kim yubormasa, qanday qilib Xushxabarni e’lon qiladilar?! Muqaddas bitiklarda quyidagicha yozilgan — ku: “Xushxabarni e’lon qilgan xabarchining qadamlari naqadar goʻzal!”[65]

¹⁶Ammo Xushxabarga hamma ham ishonmadi. Ishayo ham shunday degan — ku: “Ey Egam, bizning xabarimizga kim ishondi?”[66]

¹⁷Demak, imon tinglashdan, ya’ni Masih haqidagi Xushxabarni eshitishdan kelib chiqadi.

¹⁸Mening bir savolim bor. Xoʻsh, ular eshitmaganmidi? Albatta eshitganlar, chunki “xabarchilarning ovozlari har tomonga tarqaldi, xabarlari olamning chetigacha yetib bordi”[67], deb yozilgan — ku.

¹⁹Bundan yana bir savol kelib chiqadi. Xoʻsh, Isroil xalqi xabarni tushunmadimi? Muso orqali Xudo shunday degandi: “Men ham xalq boʻlmaganlar bilan ularning rashkini keltiraman, Aqlsiz bir xalq bilan gʻazabini qoʻzgʻataman.”[68]

²⁰Ishayo ham Xudoning soʻzlarini jasorat bilan yetkazgan: “Meni izlamaganlar topdi, Meni soʻramaganlarga koʻrindim.”[69]

²¹Isroil xalqi haqida esa shunday deydi: “Itoatsiz va oʻjar xalqni Kun boʻyi quchoq ochib kutdim.”[70]