Read Uzbek Muqaddas Kitob Rimliklar 11 Bible Online

Rimliklar 11 - Uzbek Muqaddas Kitob bible

Rimliklar 11

¹Shunday qilib, yana bir savolim bor. Nahotki Xudo Oʻz xalqini rad qilgan boʻlsa? Yoʻq, aslo! Men oʻzim Isroil xalqidan boʻlib, Ibrohimning avlodidanman, Benyamin qabilasiga tegishliman — ku!

²Xudo azaldan tanlab olgan xalqini rad qilgani yoʻq. Muqaddas bitiklarda Ilyos haqida nima yozilgani esingizda yoʻqmi?! U Isroil xalqidan shikoyat qilib, Xudoga shunday degan edi:

³“Ey Egam, Isroil xalqi qurbongohlaringni buzdi, paygʻambarlaringni qilichdan oʻtkazdi. Yolgʻiz men qoldim, xolos. Endi jonimni olish uchun meni ham qidirib yuribdilar.”[71]

⁴Xudo unga nima deb javob berdi? “Men Isroil xalqidan Oʻzim uchun Baal[72] oldida tiz choʻkmagan yetti ming odamni qoldirdim.”[73]

⁵Xuddi shunga oʻxshab, hozir ham Xudoga sodiq qolganlar bor, chunki ular Xudoning inoyati boʻyicha tanlanganlar.

⁶Tanlash insonlarning ishlariga emas, Xudoning inoyatiga bogʻliq. Agar shunday boʻlmaganda edi, inoyat haqiqiy inoyat boʻlmas edi[74].

⁷Xullas, bu nimani bildiradi? Isroil xalqi solihlik payida boʻlsa ham, solihlikka erishmadi. Faqatgina tanlanganlar bu maqsadga erishdi, qolganlarning esa yuraklari tosh boʻldi.

⁸Muqaddas bitiklarda yozilganday[75]: “Xudo shu paytgacha ularni qattiq uxlatib qoʻydi, Ularga koʻradigan koʻz, eshitadigan quloq bermadi.”

⁹Dovud ham shunday degan: “Dasturxonlari oʻzlariga toʻru tuzoq boʻlsin. Shunda ular qoqilib, Jazolarini oladilar.

¹⁰Koʻz nurlari soʻnsin, koʻrmay qolsin, Bellari to abad bukchayib qolsin.”[76]

¹¹Bundan yana bir savol kelib chiqadi. Yahudiylar qoqilganda, butunlay halok boʻldilarmi? Yoʻq, aslo! Aksincha, ular Masihni rad qilganlari uchun gʻayriyahudiylar najotga ega boʻldilar, toki Isroil xalqining rashki qoʻzgʻalsin.

¹²Yahudiylar Masihni rad etib, butun dunyoni yanada boyitdilar. Oʻzlari yoʻqotgan boylik bilan gʻayriyahudiylarga foyda keltirdilar. Agar ularning bu gunohi shunday samara keltirgan boʻlsa, ularning najot topishi qanchalik foyda keltirishini bir tasavvur qilib koʻringlar — a!

¹³Endi sizlarga — gʻayriyahudiylarga aytyapman. Toʻgʻri, men sizlarga Xushxabar keltirish uchun yuborilganman. Bu xizmatimni jon — jahdim bilan bajaraman,

¹⁴balki bu xizmatim bilan oʻz qondoshlarim yahudiylarning rashkini qoʻzgʻatarman, ularning ba’zilarini qutqarib qolarman.

¹⁵Yahudiylarning rad etilishi dunyoni Xudo bilan yarashtirgan boʻlsa, ularning Xudo tomonidan qabul qilinishi oʻlimdan hayotga olib bormaydimi?

¹⁶Birinchi yopilgan non Xudoga bagʻishlanib muqaddas boʻlsa, xamirning qolgani ham muqaddasdir. Agar tomirlar muqaddas boʻlsa, novdalar ham muqaddasdir.

¹⁷Ba’zi yahudiylar daraxtning sindirib tashlangan novdalariga oʻxshaydilar. Sizlar — gʻayriyahudiylar esa tabiiy novdalar orasiga payvand qilingan yovvoyi zaytun novdalariga oʻxshaysizlar. Endi ular bilan birga bir tomirdan oziqlanyapsizlar.

¹⁸Shunday ekan, boshqa novdalarga qarab maqtanmanglar. Agar juda kekkayib ketsangizlar, yodga olinglar, sizlar tomirni emas, balki tomir sizlarni oziqlantiryapti.

¹⁹Ehtimol sizlar: “Biz payvand qilinishimiz uchun novdalar sindirildi”, dersizlar.

²⁰Toʻgʻri, lekin esingizda boʻlsin: ular ishonmaganlari uchun sindirib tashlandilar, ammo sizlar imoningiz orqali payvand qilingansiz. Shuning uchun kekkayib ketmanglar, balki Xudodan qoʻrqinglar.

²¹Aks holda, Xudo tabiiy novdalarni ayamagani kabi, sizlarni ham ayamaydi.

²²Shunday qilib, Xudoning mehribonligi va qattiqqoʻlligi haqida oʻylab koʻring: Xudoning najotini rad qilganlarga U qattiqqoʻllik qildi, sizlarga — payvand qilinganlarga esa U mehribonlik koʻrsatdi. Agar Xudoga sodiq qolsangiz, Uning mehribonligidan bahramand boʻlaverasiz. Boʻlmasa, Xudo sizlarni ham kesib tashlaydi.

²³Najotni rad qilganlar oʻz imonsizliklarini bas qilsalar, payvand qilinadilar. Xudo ularni qayta payvand qilib qoʻyishga qodir.

²⁴Axir, sizlar yovvoyi zaytun daraxtidan kesib olinib, parvarishlangan zaytun daraxtiga, tabiatga xilof ravishda, payvand qilindingiz. Shunday ekan, ular, tabiiy novdalar, oʻzlarining daraxtiga qanchalar osonlik bilan qayta payvand qilinadilar — a!

²⁵Birodarlarim, sizlar tagʻin oʻzbilarmon boʻlib ketmanglar deb, bu sirni sizlarga bildirmoqchiman: belgilangan miqdordagi gʻayriyahudiylar najot topmaguncha, Isroil xalqining ba’zilari oʻjar boʻlib qolaveradilar.

²⁶Shundan keyin butun Isroil qutqariladi. Muqaddas bitiklarda Xudo shunday degan — ku[77]: “Qutqaruvchi Quddusdan[78] keladi, Yoqub naslidan betavfiqlikni yoʻq qiladi.

²⁷Ular bilan qilgan ahdim mana shudir: Men ularni gunohlaridan forigʻ qilaman.”

²⁸Yahudiylar Xushxabarni rad qilib, Xudoning dushmanlari boʻlib qoldilar, bu sizlarga — gʻayriyahudiylarga foyda keltirdi. Ammo Xudo yahudiylarni tanlagani uchun, ularning ota — bobolari haqi hali ham ularni yaxshi koʻradi.

²⁹Chunki Xudo bergan in’omlarini qaytarib olmaydi va Oʻzi da’vat qilgan xalqidan voz kechmaydi.

³⁰Siz — gʻayriyahudiylar ham bir vaqtlar itoatsiz edingiz, ammo yahudiylarning itoatsizligi natijasida Xudo sizlarga mehr — shafqat koʻrsatdi.

³¹Toʻgʻri, hozir yahudiylar itoatsiz, ammo sizlarga koʻrsatilgan mehr — shafqat tufayli ular ham mehr — shafqat topadilar.

³²Hammaga mehr koʻrsatay deb, Xudo hammani itoatsizlikka tutqun qildi.

³³Xudoning donoligiyu bilimi naqadar boy va chuqurdir! Uning hukmlarini kim tushunib yetadi?! Uning yoʻllarini kim sinchiklab tekshira oladi?!

³⁴Kim Egamizning fikr — zikrini bila oladi?! Kim Unga maslahat bera oladi?![79]

³⁵Kim Xudoga shunday hadya berganki, Xudo undan qarzdor boʻlsa?![80]

³⁶Hech kim! Chunki butun borliq Xudodan kelib chiqqan, Xudo orqali va Xudo uchun mavjuddir! Unga to abad shon — sharaflar boʻlsin! Omin.