Read Uzbek Muqaddas Kitob Rimliklar 12 Bible Online

Rimliklar 12 - Uzbek Muqaddas Kitob bible

Rimliklar 12

¹Shunday qilib, ey birodarlarim, Xudoning marhamati haqi sizlarga yolvoraman. Oʻz tanangizni tirik, muqaddas va Xudoga manzur boʻladigan qurbonlik sifatida bagʻishlang. Xudoga loyiq boʻlgan asl xizmat mana shudir.

²Bu dunyoga moslashmanglar, fikr — zikringizni yangilab, tubdan oʻzgaringlar. Shunda Xudoning irodasini tushuna oladigan boʻlasiz, ya’ni nima yaxshi, Xudoga manzur va mukammal ekanligini bila oladigan boʻlasiz.

³Menga berilgan inoyatdan foydalanib, sizlarga aytyapman: oʻzingizga haddan tashqari yuqori baho bermanglar. Aksincha, Xudo har bir kishiga qancha imon bergan boʻlsa, shunga koʻra, fikr qilib, aqli raso odamlar boʻlinglar.

⁴Axir, tanamiz bir boʻlsa — da, tanamiz a’zolari koʻp, tanamiz a’zolarining vazifasi ham bir xil emas.

⁵Shunga oʻxshab, biz — Masihga tegishli boʻlganlar bir tanani tashkil qilamiz. Har birimiz har xil a’zolar boʻlib, bir — birimizga bogʻliqmiz.

⁶Bizga berilgan inoyat boʻyicha har birimizning har xil in’omlarimiz bor. Agar birortasida Xudoning soʻzini boshqalarga yetkazish in’omi boʻlsa, u e’tiqodimizga muvofiq ravishda gapirsin.

⁷Agar birorta odamga xizmat qilish in’omi berilgan boʻlsa, u xizmat qilsin, agar birortasiga muallimlik in’omi berilgan boʻlsa, u ta’lim bersin.

⁸Agar insonga dalda berish in’omi berilgan boʻlsa, u dalda bersin, begʻaraz yordam beradigan boʻlsa, saxiylik bilan bersin. Yetakchilik qiladigan odam qunt bilan yetakchilik qilsin, mehr — shafqat koʻrsatadigan odam xursandchilik bilan ish tutsin.

⁹Bir — biringizga boʻlgan mehr — muhabbatingiz samimiy boʻlsin. Yomonlikdan nafratlanib, yaxshilikni mahkam tuting.

¹⁰Bir — biringizni birodarlarcha, chuqur muhabbat bilan yaxshi koʻring. Bir — biringizni hurmat qilib, oʻzingizdan yuqori koʻring.

¹¹Gʻayratingiz susaymasin, butun qalbingiz bilan Rabbimiz Isoga xizmat qiling.

¹²Umidingiz borligi uchun xursand boʻling. Qiyinchilikda sabr — toqat qiling. Ibodat qilishdan charchamang.

¹³Muhtojlikda boʻlgan Xudoning azizlariga yordam bering, doimo mehmondoʻst boʻling.

¹⁴Sizlarni quvgʻin qilayotganlarni duo qilinglar, ularni qargʻamanglar.

¹⁵Sevinayotganlar bilan birga sevininglar, yigʻlayotganlar bilan birga yigʻlanglar.

¹⁶Oʻzaro hamfikr boʻlinglar. Takabburlik qilmay, bechora hamda past tabaqali odamlar bilan doʻst boʻlinglar. Oʻzbilarmonlik qilmanglar.

¹⁷Hech kimga yomonlik evaziga yomonlik qaytarmanglar, odamlar yaxshilik deb bilganlarni qilishga intilinglar.

¹⁸Agar iloji boʻlsa, qoʻlingizdan kelganicha, barcha odamlar bilan tinch — totuv hayot kechiringlar.

¹⁹Azizlarim, oʻzingiz uchun oʻzingiz qasos olmang, balki Xudoning gʻazabiga yoʻl qoʻyib bering. Axir, Muqaddas bitiklarda Egamiz shunday deb aytgan — ku: “Men Oʻzim qasos va oʻch olaman.”[81]

²⁰Muqaddas bitiklarda yozilganiday qiling: “Dushmaning och boʻlsa, ovqat ber, Chanqagan boʻlsa, suv ichir. Shunda uning boshiga yonayotgan choʻgʻ yiqqanday boʻlasan.”[82]

²¹Yomonlik sizni magʻlub qilmasin, aksincha, siz yomonlikni yaxshilik bilan magʻlub eting.