Read Uzbek Muqaddas Kitob Rimliklar 13 Bible Online

Rimliklar 13 - Uzbek Muqaddas Kitob bible

Rimliklar 13

¹Har bir inson oʻzining ustidan hukmron boʻlgan hokimiyatga boʻysunsin. Chunki Xudo buyurmagan hokimiyat yoʻq, mavjud boʻlgan har bir hokimiyatni esa Xudo tayin etgan.

²Shuning uchun hokimiyatga qarshilik koʻrsatgan odam Xudo oʻrnatgan tartibga qarshi chiqqan boʻladi. Qarshilik qiluvchilar esa oʻzlarini oʻzlari hukmga duchor qiladilar.

³Yaxshilik qilganlar emas, yomonlik qilganlar hukmronlardan qoʻrqishlari kerak. Hokimiyatdan qoʻrqmaslikni istaysanmi? Unda yaxshilik qilib yur, shunda boshliqning maqtoviga sazovor boʻlasan.

⁴Chunki boshliqlar odamlarning manfaati uchun Xudoning xizmatidadirlar. Yomon ish qilayotgan boʻlsang, qoʻrqqin, chunki jazo berish qudrati boshliqlarga bekorga berilmagan. Ular Xudoning xizmatkorlari boʻlib, yomonlik qiluvchilarga jazo beradilar, Xudoning gʻazabini amalga oshiradilar.

⁵Shuning uchun faqatgina gʻazabga duchor boʻlmaslik niyatida emas, balki vijdon haqi ham boshliqlarga boʻysunish kerak.

⁶Mana shu sababdan soliq ham toʻlash lozim. Chunki amaldorlar oʻz vazifalarini bajarib, Xudoga xizmat qiladilar.

⁷Ularga nima tegishli boʻlsa, shuni bering: soliq yigʻuvchiga — soliq, boj oluvchiga — boj, obroʻga loyiq boʻlganga — obroʻ, hurmatu ehtiromga loyiq boʻlganga — hurmat — ehtirom.

⁸Hech kimdan hech narsa qarzdor boʻlmanglar. Faqat mehr — muhabbatni ham farz, ham qarz deb bilinglar, chunki oʻzgani yaxshi koʻrgan odam Xudoning qonunini bajargan boʻladi.

⁹Axir, “Zino qilmang”, “Qotillik qilmang”, “Oʻgʻrilik qilmang”[83], “Birovlarning mulkiga koʻz olaytirmang”[84] degan va qolgan hamma amrlar quyidagi bitta amrda mujassam — ku: “Oʻzgani oʻzingizni sevganday seving.”[85]

¹⁰Chunki oʻzgani yaxshi koʻrgan odam unga yomonlik qilmaydi. Shunday qilib, boshqalarni yaxshi koʻrish Xudoning qonunini toʻliq bajarish bilan barobardir.

¹¹Hozirgi vaqtni gʻanimat deb bilinglar. Mana, uyqudan uygʻonadigan paytingiz yetib keldi. Biz imon keltirgan paytdagidan koʻra, hozirgi vaqtda najotimizning toʻliq roʻyobga chiqishi yaqinroqdir.

¹²Tun oʻtib ketib, kunduz yaqinlashib qoldi. Shuning uchun qorongʻilik ishlaridan voz kechaylik, nurga loyiq ishlarni qilishga bop boʻlgan qurol — aslahalarni taqib olaylik.

¹³Shahvatparastlik va fisq — fujurga berilmaylik, janjalkashlik va hasadgoʻylik qilmaylik, aysh — ishrat va ichkilikbozlik bilan emas, kunduzga yarasha, odob bilan kun kechiraylik.

¹⁴Rabbimiz Iso Masihga burkaninglar va bashariy tabiatingizning ehtiroslarini qondirishni hatto xayolingizga ham keltirmanglar.