Read Uzbek Muqaddas Kitob Rimliklar 15 Bible Online

Rimliklar 15 - Uzbek Muqaddas Kitob bible

Rimliklar 15

¹Biz, imoni kuchlilar, oʻzimizni mamnun qilishni koʻzlamasdan, imoni sust boʻlgan birodarlarning ojizligiga sabr — bardosh qilishimiz kerak.

²Har birimiz oʻzganing manfaatini koʻzlab, unga dalda berish niyatida uni mamnun qilishga harakat qilaylik.

³Hattoki Masih ham Oʻzini mamnun qilishni koʻzlamagan, zero, Muqaddas bitiklarda yozilganiday: “Ey Xudo, Seni haqoratlaganlar Meni haqorat qilgan boʻlar.”[93]

⁴Muqaddas bitiklarda nimaiki yozilgan boʻlsa, bizning ta’lim olishimiz uchun yozilgan. Biz bu bitiklardan sabr va tasalli topib, umidimizda mahkam turishimiz lozim.

⁵Iso Masihning yoʻlida yurar ekansiz, sabr va tasalli manbayi boʻlgan Xudoning Oʻzi sizlarga hamfikr boʻlishni ato qilsin.

⁶Shunda sizlar yakdillik bilan, bir ovozdan Rabbimiz Iso Masihning Otasi — Xudoni ulugʻlaysizlar.

⁷Masih sizlarni Oʻz birodarlariday qabul qilgani kabi, sizlar ham bir — biringizni birodarlarday qabul qiling. Shunday qilish Xudoga shuhrat keltiradi.

⁸Men sizlarga aytyapman: Xudoning sodiqligini koʻrsatib, Uning ota — bobolarimizga bergan va’dalarini bajarish uchun Iso Masih yahudiylarning xizmatkori boʻlib keldi.

⁹Masihning kelishidan yana bir maqsadi shu ediki, gʻayriyahudiylar ham Xudoning mehr — shafqati uchun Uni ulugʻlasinlar. Muqaddas bitiklarda yozilganiday: “Xalqlar ichra Senga hamdlar aytaman! Seni kuylab sano aytaman!”[94]

¹⁰Yana boshqa joyda shunday yozilgan: “Ey ellar, Uning xalqi bilan birga shodlaning.”[95]

¹¹Yana shunday deb ham yozilgan: “Ey barcha xalqlar, Egamizga hamdu sanolar boʻlsin! Ey jamiki elatlar, Uni olqishlanglar!”[96]

¹²Ishayo kitobida ham quyidagicha yozilgan: “Essay[97] tomiridan bir Zot kelib chiqar, U xalqlar ustidan hukmronlik qilar, Xalqlar esa Unga umid bogʻlaydilar.”[98]

¹³Imon yoʻlidan yurar ekansiz, umid manbayi boʻlgan Xudo qalbingizni sevinch va tinchlikka toʻldirsin, shunda sizlar Muqaddas Ruhning kuchi ila umidga boy boʻlasizlar.

¹⁴Ey birodarlarim, men aminmanki, sizlar ezgulikka va ilm — ma’rifatga boysizlar, bir — biringizga pand — nasihat qilishga qodirsizlar.

¹⁵Shuning uchun ba’zi bir narsalarni eslatay deb, sizlarga bu xatni yozishga jur’at qildim, chunki men Xudoning inoyati bilan

¹⁶Iso Masihning xizmatkori etib tayinlanganman. Xudoning Xushxabarini aytib, ruhoniy sifatida gʻayriyahudiylarga xizmat qilmoqdaman. Buning natijasida, gʻayriyahudiylar Xudoga manzur boʻladigan, Muqaddas Ruh orqali tabarruk qilingan qurbonlikday Xudoga tortiq etilmoqdalar.

¹⁷Shunday qilib, Iso Masih tufayli Xudoning yoʻlida qilgan ishlarim bilan maqtansam boʻladi.

¹⁸Kuchli moʻjizalaru alomatlar bilan, mening aytganlarim va qilganlarim orqali Masih gʻayriyahudiylarni Xudoga itoat qilish yoʻliga boshladi. Ammo Iso Masihning men orqali qilgan ishlaridan boshqa narsalar haqida gapirishga jur’at etmayman, chunki bularning hammasi Xudo Ruhining qudrati ila sodir boʻldi. Shunday qilib, men Quddusdan boshlab, to Illurikon hududiga[99] qadar Masihning Xushxabarini yoyib, oʻz vazifamni bajardim.

²⁰Shu bilan birga, men boshqalarning poydevori ustiga bino qurmayin deb, hali Masihning nomi ovoza qilinmagan yerlarda Xushxabarni yoyish uchun jon kuydiryapman.

²¹Muqaddas bitiklarda yozilganiday: “U haqda xabarsiz boʻlganlar endi koʻradilar, U haqda eshitmaganlar endi anglab yetadilar.”[100]

²²Xushxabarni yoyish xizmatim tufayli anchadan beri sizlarning oldingizga bora olganim yoʻq.

²³Endi esa bu joylarda menga boshqa ish qolmagan. Men koʻp yillardan beri sizlarni koʻrishni orzu qilaman.

²⁴Shuning uchun Ispaniyaga borayotganimda, yoʻlda sizlarni koʻrib oʻtmoqchiman, bir oz boʻlsa — da, diydoringizga toʻyganimdan keyin, yoʻlimda davom etishim uchun kerakli boʻlgan zarur ehtiyojimni qondirarsizlar degan umiddaman.

²⁵Hozircha men Xudo azizlariga yordam bergani Quddusga ketyapman[101].

²⁶Chunki Makedoniya va Axayadagi birodarlar mablagʻ yigʻib, Quddusdagi kambagʻal birodarlarga yordam berishga qaror qildilar.

²⁷Buni ham qarz, ham farz deb bilganlari uchun xursandchilik bilan shunday qildilar. Axir, gʻayriyahudiylar yahudiylar tufayli ruhiy ne’matlarga sazovor boʻldilar — da, shuning uchun ular oʻz moddiy boyliklarini yahudiylar bilan baham koʻrishni loyiq topdilar.

²⁸Men bu ishni bajarib, toʻplangan mablagʻni ularga topshirganimdan keyin, sizlarning oldingizda toʻxtab oʻtaman. Soʻngra Ispaniyaga ketaman.

²⁹Aminmanki, men sizlarni koʻrishga borganimda, biz birgalikda Masih Xushxabari keltiradigan qut — barakalarni toʻliq baham koʻramiz.

³⁰Ey birodarlarim, Rabbimiz Iso Masih va Muqaddas Ruh ato qiladigan mehr — muhabbat haqi sizlarga yolvoraman: men uchun birgalikda Xudoga ibodat qilaylik.

³¹Yahudiyadagi imonsizlarning qoʻlidan qutulishim uchun va Quddusdagi xizmatim u yerdagi Xudoning azizlariga ma’qul boʻlishi uchun ibodat qilinglar.

³²Xudo xohlasa, men shod — xurramlik bilan sizlarning oldingizga boraman, sizlar bilan birga boʻlganimdan qalbim orom topadi.

³³Tinchlik manbayi boʻlgan Xudo hammangizga yor boʻlsin. Omin!