Read Uzbek Muqaddas Kitob Rimliklar 16 Bible Online

Rimliklar 16 - Uzbek Muqaddas Kitob bible

Rimliklar 16

¹Men Kenxreya shahridagi[102] jamoatda xizmat qilayotgan opamiz[103] Fivani sizlarga tanishtiray[104].

²Sizlar Xudoning azizlarisiz, shuning uchun Rabbimiz Iso haqi Fivani mehmondoʻstlik bilan qabul qilinglar. U nimaga muhtoj boʻlsa, yordam beringlar. Zero, u koʻplarga, ayniqsa, menga koʻp yordam koʻrsatgan.

³Priskilla va Akilga salom aytinglar, ular men qatori Iso Masihga xizmat qilyaptilar.

⁴Ular mening jonimni asrab qolish uchun oʻzlarini oʻlim xavfi ostiga qoʻydilar. Nafaqat men, balki gʻayriyahudiylardan iborat boʻlgan jamoatlar ham ulardan minnatdorlar. Ularning uyida yigʻiladigan jamoatga ham salom aytib qoʻyinglar.

⁵Asiya viloyatidagilar orasida birinchi boʻlib Masihga imon keltirgan aziz doʻstim Epanetusga salom ayting.

⁶Sizlar[105] uchun koʻp mehnat qilgan Maryamga salom aytinglar.

⁷Birodarimiz Andronikus va opamiz Yuniyaga[106] salom aytinglar. Ular men bilan birga hibsda boʻlgan qondoshlarimdir. Bu obroʻli havoriylar[107] mendan oldin Masihga imon keltirgan edilar.

⁸Rabbimiz Iso tufayli mening aziz doʻstim boʻlib qolgan Ampliatusga salom ayting.

⁹Masih xizmatida hamkorimiz boʻlgan Urbanus va aziz doʻstim Staxisga salom ayting.

¹⁰Masihga sodiqligini isbotlagan Apellisga salom ayting. Aristovulus xonadoniga ham salom aytib qoʻying.

¹¹Qondoshim Hirodionga salom ayting. Narkis xonadonidagi Rabbimiz Isoga tegishli boʻlganlarga ham salom aytib qoʻying.

¹²Rabbimizga jonu dili bilan xizmat qilayotgan opalarimiz Trifena bilan Trifosaga salom aytinglar. Rabbimizga astoydil xizmat qilayotgan aziz opamiz Persisaga ham salom ayting.

¹³Rabbimizning tanlangan xizmatkori Rufusga va menga onaday boʻlib qolgan uning onasiga ham salom ayting.

¹⁴Asinkritus, Flegon, Xermes, Patrovas, Xarmas va ular bilan birga boʻlgan birodarlarga salom aytinglar.

¹⁵Filologus bilan Yuliyaga, Nerus va uning singlisiga[108], Olimpas hamda ular bilan birga boʻlgan barcha aziz birodarlarga salom aytinglar.

¹⁶Bir — biringiz bilan oʻpishib koʻrishinglar. Barcha Masih jamoatlari sizlarga salom yoʻllayaptilar.

¹⁷Sizlarga yolvoraman, olgan ta’limotingizdan aynitib, orangizga nizo va gʻulgʻula soladigan odamlardan ehtiyot boʻlinglar. Ulardan oʻzingizni olib qochinglar.

¹⁸Axir, bunday odamlar Rabbimiz Iso Masihning emas, balki oʻz nafsining qulidirlar. Ular shirin soʻzlaru xushomadgoʻylik bilan sofdil insonlarni yoʻldan ozdiradilar.

¹⁹Sizlarning Xudoga boʻlgan itoatkorligingiz hammaga ma’lum. Men sizlardan juda xursandman, ammo yaxshilikka kelganda dono, yomonlikka kelganda esa norasida boʻlishingizni istayman.

²⁰Tinchlik manbayi boʻlgan Xudoning Oʻzi tez orada shaytonni oyoqlaringiz ostida ezib tashlaydi. Rabbimiz Isoning inoyati sizlarga yor boʻlsin.

²¹Mening hamkorim Timoʻtiy hamda qondoshlarim Lukiyos, Yason va Sosipatrus sizlarga salom yoʻllayaptilar.

²²Bu maktubni qogʻozga tushirayotgan, Rabbimizning quli men — Tertiyusdan[109] ham sizlarga salom.

²³Butun jamoatga mehmondoʻstlik koʻrsatadigan va hozirda mening mezbonim boʻlgan Gayus sizlarga salom aytyapti. Shahar xazinaboni Erastus va birodarimiz Kvartus ham salom yoʻllayaptilar[110].

²⁵Men bayon qilayotgan Xushxabarga, ya’ni Iso Masihning Xushxabariga binoan sizlarni imonda sobit qadam qilishga qodir boʻlgan Xudoga hamdu sanolar boʻlsin! Bu Xushxabar qadimdan sir tutilgan edi, endi esa u ochildi.

²⁶Ha, bu sir oshkor qilindi va paygʻambarlarning bitiklari[111] orqali, Xudoning amri boʻyicha barcha xalqlarga ayon boʻldi, toki ular ham imon orqali Xudoga itoatkor boʻlsinlar.

²⁷Donolik sohibi boʻlgan yagona Xudoga Iso Masih orqali to abad shon — sharaflar boʻlsin! Omin![112]