Read Uzbek Muqaddas Kitob Rimliklar 3 Bible Online

Rimliklar 3 - Uzbek Muqaddas Kitob bible

Rimliklar 3

¹Xoʻsh, yahudiylarning qanday ustunligi bor? Yoki sunnatning[13] nima foydasi bor?

²Yahudiylar har jihatdan katta ustunlikka egadirlar. Bu ustunlik, eng avvalo, shundan iboratki, Xudoning kalomi ularga ishonib topshirilgan.

³Ularning ba’zilari ishonmagan boʻlsa, nima boʻpti? Ularning ishonmaganligi Xudoning sadoqatini bekor qiladimi?

⁴Yoʻq, aslo! Axir, har bir inson yolgʻonchi boʻlsa ham, Xudo haqdir. Muqaddas bitiklarda Xudo haqida shunday yozilgan — ku: “Shu bois hukm qilganingda Sen barhaqsan, Aybimni fosh etganingda doimo toʻgʻri boʻlib chiqasan.”[14]

⁵Insoniy fikr yuritib aytayin: agar bizning qabihligimiz Xudoning odilligini yanada ochiqroq koʻrsatsa, nima ham derdik? Boshimizga qahr — gʻazab yogʻdirgani uchun Xudo adolatsizmi?

⁶Yoʻq, aslo! Xudo odildir. Xudo adolatsiz boʻlganda edi, qanday qilib dunyoni hukm qila olardi?!

⁷Mening yolgʻonchiligim Xudoning haqligiga urgʻu berib, Unga yanada koʻproq shon — shuhrat keltirar ekan, nima uchun men gunohkor sifatida mahkum qilinishim kerak?

⁸Shunday ekan, “Yaxshilik keltirsin deb, yomonlik qilaveraylikmi?” deyishimiz kerakmi?! Ba’zilar bizga tuhmat qilib, Pavlus oʻshanday ta’lim beryapti, deb aytmoqdalar. Bunday tuhmat qilganlar jazoga loyiqdir.

⁹Xoʻsh, biz, yahudiylar, boshqalardan ustunmizmi? Yoʻq, aslo! Yuqorida isbotlab oʻtganimday, xoh yahudiy boʻlsin, xoh gʻayriyahudiy boʻlsin, har bir inson gunohning hokimiyati ostidadir.

¹⁰Axir, Muqaddas bitiklarda quyidagiday yozilgan — ku: “Hech bir solih kimsa yoʻqdir, Hatto bironta ham yoʻq!

¹¹Bironta ham idrokli zot yoʻq, Hech kim Xudoga yuz burmaydi.

¹²Hammasi yoʻldan ozgan, birday buzilgan, Yaxshilik qiluvchi bir kimsa yoʻqdir, Hatto bironta ham yoʻq![15]

¹³Ochiq qabr kabidir ogʻizlari, Ular yolgʻon gapiradi. Tillaridan ilon zahri tomadi[16].

¹⁴Ularning ogʻzidan achchiq soʻzlar, la’nat chiqadi[17].

¹⁵Ularning oyoqlari qon toʻkishga shoshiladi,

¹⁶Qadamidan halokatu vayrona keladi.

¹⁷Ular tinchlik yoʻllarini bilmaydi[18],

¹⁸Ular Xudodan qoʻrqmaydi.”[19]

¹⁹Biz bilamizki, qonun neki buyurgan boʻlsa, qonunga qaram boʻlganlarga buyurgan, toki har bir ogʻiz yumilsin va butun dunyo Xudo oldida javobgar boʻlsin.

²⁰Zotan, qonunga amal qilish orqali hech kim Xudoning oldida oqlana olmaydi, chunki qonun insonga gunohkorligini yanada aniqroq koʻrsatadi.

²¹Mana endi qonunga aloqasiz ravishda oqlanish yoʻlini Xudoning Oʻzi aniq koʻrsatdi. Buni Tavrot va Paygʻambarlar bitiklari[20] tasdiqlaydi.

²²Biz Iso Masihga boʻlgan imonimiz orqali Xudoning oldida oqlanamiz. Odamlar orasida hech bir farq yoʻq.

²³Axir, hamma gunoh qilgan va Xudoning ulugʻvorligidan mahrumdir.

²⁴Lekin gunohkorlar Iso Masih orqali gunohlaridan ozod boʻladilar. Ular oqlanishga loyiq boʻlmasalar — da, Xudoning inoyati bilan oqlanadilar.

²⁵Xudo Iso Masihni bu dunyoga yubordi. Masihga ishonganlarning hammasi Uning toʻkilgan qoni orqali Xudo bilan yarashdi[21]. Shunday qilib, Xudo Oʻzining adolatini namoyon qildi. U oʻtmishda sabr — toqat qilib, ilgari qilingan gunohlarni jazosiz qoldirgan edi, endi esa Iso Masihga ishonganlarni oqlab, Oʻzining haq ekanligini koʻrsatmoqda.

²⁷Endi maqtanishga arzigulik narsamiz qoldimi? Yoʻq, maqtovga oʻrin yoʻq. Nima sababga koʻra? Amrlarni bajo keltirishni talab qiluvchi qonunga koʻrami? Yoʻq, insonlar imon orqali oqlanganda maqtanishga hech oʻrin qolmaydi.

²⁸Axir, inson qonun talablarini bajo qilish orqali emas, balki imon orqali oqlanadi, biz bunga qanoat hosil qildik.

²⁹Nahotki Xudo faqat yahudiylarning Xudosi boʻlsa?! U boshqa xalqlarning ham Xudosi emasmi? Albatta, U boshqa xalqlarning ham Xudosidir.

³⁰Axir, Xudo yagona — ku! Sunnatlilarni ham, sunnatsizlarni ham Xudo imon orqali oqlaydi.

³¹Demak, biz bu imon bilan qonunni bekor qilyapmizmi? Yoʻq, aslo! Aksincha, qonunni tasdiqlayapmiz.