Read Uzbek Muqaddas Kitob Rimliklar 9 Bible Online

Rimliklar 9 - Uzbek Muqaddas Kitob bible

Rimliklar 9

¹Men Iso Masihga tegishli boʻlganim uchun haqiqatni aytyapman, yolgʻon gapirmayman. Bu haqda vijdonim ham Muqaddas Ruh orqali shahodat beryapti.

²Oʻz xalqim uchun chuqur qaygʻuga botgan yuragim muttasil alam chekmoqda.

³Oʻz qondoshlarim haqi, Xudoning la’nati ostida qolib, Masihdan ajralishga ham rozi boʻlardim.

⁴Ular Isroil xalqidir. Xudo ularni Oʻziga farzand[41] qilib olish uchun tanladi. Oʻzining ulugʻvorligini ularga namoyon qilib, ular bilan ahdlar[42] tuzdi. Ularga Oʻz qonunini berib, ularni Oʻzining xizmatiga tayinladi hamda ularga Oʻz va’dalarini berdi.

⁵Ular ulugʻ ota — bobolardan kelib chiqqan, Masih ham jisman Isroil xalqidan kelib chiqqan. Butun borliq ustidan hukmdor boʻlgan Xudoga abadiy hamdu sanolar boʻlsin[43]. Omin!

⁶Xudo Oʻz soʻzida turmadi, demoqchi emasman. Ammo Isroil xalqining hammasi ham Xudoning xalqi emasdir.

⁷Shunga oʻxshab, Ibrohimdan tugʻilganlarning hammasi ham Ibrohimning asl zurriyoti deb hisoblanmaydi. Axir, Xudo Ibrohimga: “Sening nasling Is’hoq orqali kelib chiqadi”[44], deb aytgan — ku!

⁸Demak, jismoniy jihatdan Ibrohimning farzandlari boʻlganlarning hammasi ham Xudoning farzandlari emasdirlar. Faqatgina Xudo bergan va’daning natijasida[45] dunyoga kelganlar asl zurriyot hisoblanadi.

⁹Xudoning Ibrohimga bergan va’dasi quyidagicha edi: “Men kelgusi yili shu paytda kelganimda, xotining Sora oʻgʻilli boʻladi.”[46]

¹⁰Oʻsha oʻgʻil bobokalonimiz Is’hoq edi. Vaqti kelib, Is’hoqning xotini Rivqo egizak oʻgʻillarga homilador boʻldi.

¹¹Farzandlar tugʻilmaslaridan avval, hali birorta yaxshi yoki yomon ish qilmaslaridan oldin Xudo Rivqoga: “Kattasi kichigiga xizmat qiladi”[47], deb aytgandi. Bundan koʻrinib turibdiki, Xudo Oʻz maqsadini bajarish uchun insonlarni tanlaydi, tanlanish insonlarning ishlariga emas, balki Xudoning da’vatiga bogʻliqdir.

¹³Axir, Muqaddas bitiklarda: “Men Yoqubni yaxshi koʻrib, Esovdan nafratlandim”[48], deb yozilgan — ku!

¹⁴Xoʻsh, bunga nima deymiz? Xudo adolatsizmi? Yoʻq, aslo!

¹⁵Xudo Musoga: “Marhamat qiladiganimga marhamat qilaman, shafqat qiladiganimga shafqat qilaman”[49], deb aytgan.

¹⁶Shunday qilib, Xudoning mehr — shafqati inson xohishi va tashabbusiga emas, balki Xudoning irodasiga bogʻliq.

¹⁷Muqaddas bitiklarda yozilganiday, Xudo fir’avnga: “Senga qudratimni koʻrsatay, butun olamga shuhratimni yoyay deb, seni hukmdor qilib tayinladim”[50], deb aytgan.

¹⁸Xullas, Xudo Oʻz xohish — irodasiga koʻra, ish yuritadi, bir insonga marhamat koʻrsatadi, boshqa birovning esa yuragini tosh qiladi.

¹⁹Shunda kimdir mendan: “Unda nima uchun Xudo bizni ayblaydi? Axir, kim ham Uning irodasiga qarshi chiqa olardi?” deb soʻrashi mumkin.

²⁰Ey inson, sen kim boʻlibsanki, Xudoga gap qaytarsang?! Yaratilgan narsa yaratuvchisidan: “Nima uchun meni bunday qilib yaratding?” deb soʻraydimi?!

²¹Axir, kulol ham bir loy qorishmasidan har xil idishlar yasaydi — ku! Ularning ba’zilarini qutlugʻ bayram kunlarida ishlatiladigan qilishga, boshqalarini esa har kuni ishlatiladigan idish qilib qoʻyishga haqi yoʻqmi?!

²²Toʻgʻri, Xudo Oʻz gʻazabi va qudratini jazo orqali koʻrsatishga haqlidir. Ammo jazoga mubtalo boʻladiganlarning halokatini orqaga surib, sabr — bardosh koʻrsatsa, nima boʻpti?

²³Shunday qilib, Xudoning marhamatiga sazovor boʻlgan va Uning ulugʻvorligini baham koʻrishga belgilangan odamlarga Xudo Oʻz ulugʻvorligining naqadar boy ekanligini namoyon qiladi.

²⁴Nafaqat yahudiylar orasidan, balki boshqa xalqlar orasidan tanlanganlar qatorida biz ham bormiz.

²⁵Xoʻsheya kitobida Xudo shunday deb aytgan: “Mening xalqim boʻlmaganlarni «Oʻz xalqim» deb atayman. Oldin suyukligim boʻlmaganni «Suyukligim» deb aytaman[51].

²⁶Ularga: «Xalqim emas», deb aytilgan boʻlsa, kelajakda ular «Barhayot Xudoning farzandlari» deb ataladi.”[52]

²⁷Ishayo ham Isroil xalqi haqida shunday degan edi: “Isroil xalqining soni dengiz qumiday koʻp boʻlsa ham, ulardan faqatgina sanoqli odamlar qutqarilib, omon qoladi,

²⁸chunki Egamiz dunyo ustidan chiqargan hukmini toʻla — toʻkis va tezda ijro etadi.”[53]

²⁹Bulardan oldinroq Ishayo yana shunday deb aytgan edi: “Agarda Sarvari Olam Qoldirmaganda edi bizga zurriyot, Sadoʻm shahrining holiga tushar edik, Gʻamoʻra shahriday[54] xonavayron boʻlardik.”[55]

³⁰Xoʻsh, bular nimani bildiradi? Oqlanish payida boʻlmagan xalqlar endi imon tufayli Xudoning oldida oqlandilar.

³¹Isroil xalqi esa oqlanish niyatida qonunni bajarish payida boʻldilar, lekin maqsadlariga erisha olmadilar.

³²Nima uchun? Chunki ular imon bilan emas, balki qonunni bajarish orqali oqlanishga urindilar. Ular Muqaddas bitiklarda tasvirlangan toshga qoqilib yiqildilar.

³³Xudo Muqaddas bitiklarda shunday deb aytgan edi: “Men Quddusda[56] bir tosh joylashtiryapman. Ba’zilar Unga qoqilib yiqiladilar, ammo Unga tayangan hech bir inson uyatga qolmaydi.”[57] Bu tosh Iso Masihdir[58].