Read Uzbek Muqaddas Kitob 1 Korinfliklar 1 Bible Online

1 Korinfliklar 1 - Uzbek Muqaddas Kitob bible

1 Korinfliklar 1

¹Xudoning irodasi bilan Iso Masihning havoriysi boʻlish uchun da’vat qilingan men — Pavlusdan va birodarimiz Sostenisdan[1]

²Xudoning Korinf shahridagi jamoatiga salom! Xudo sizlarni Oʻzining aziz xalqi boʻlishga da’vat qilib, Iso Masih orqali Oʻzi uchun ajratib olgan. Shunday qilib, har yerda Rabbimiz Iso Masihga sajda qilayotganlarning qatoriga qoʻshildingiz. Iso Masih ularning ham, bizning ham Rabbimizdir.

³Otamiz Xudo va Rabbimiz Iso Masih sizlarga inoyatu tinchlik ato etsin.

⁴Xudoyim sizlarga Iso Masih orqali Oʻz inoyatini berdi. Shu bois doimo Xudoyimga sizlar uchun shukur aytaman.

⁵Iso Masih orqali Xudo sizlarni har qanday kalomda mohir, ilmu ma’rifatda boy qildi.

⁶Shu tariqa men sizlarga aytgan Masih haqidagi xabar haqiqat ekanligi isbotlandi.

⁷Mana endi Rabbimiz Iso Masihning kelishini intizorlik bilan kutar ekansiz, Muqaddas Ruh beradigan in’omlardan benasib emassizlar.

⁸Rabbimiz Iso Masih kelgan kunda sizlar aybsiz boʻlishingiz uchun Xudo sizlarni oxirigacha qoʻllab — quvvatlaydi.

⁹Sizlarni Oʻz Oʻgʻli Rabbimiz Iso Masih bilan muloqot qilishga chorlagan Xudo sadoqatlidir.

¹⁰Ey birodarlarim, Rabbimiz Iso Masih nomi bilan sizlarga iltijo qilaman: hammangiz oʻzaro ahil yashanglar. Orangizda nizolarga yoʻl qoʻymay, fikr — xayolda tamomila yakdil boʻlinglar.

¹¹Zero, ey birodarlarim, sizlarning orangizda janjallar borligi haqida opamiz[2] Xloisning xonadonidagilar menga xabar berishdi.

¹²Men quyidagilarni nazarda tutyapman: orangizda ba’zilar: “Men Pavlusning shogirdiman”, yana ba’zilar esa: “Men Apollosning[3] shogirdiman”, yana boshqalar: “Men Butrusning[4] shogirdiman”, yana bir xil odamlar: “Men Masihning shogirdiman”, deb aytayotgan emish.

¹³Nima, Masih boʻlinganmi? Yoki sizlar uchun Pavlus xochga mixlanganmi? Nahotki Pavlusning nomi bilan suvga choʻmdirilgan boʻlsangiz?!

¹⁴Xudoga shukurki, men sizlarning orangizdan Krispus va Gayusdan boshqa hech kimni suvga choʻmdirmadim.

¹⁵Hech kim: “Men Pavlusning nomi bilan choʻmdirilganman”, deya olmaydi.

¹⁶Toʻgʻri, men Stefanasning uy ahlini ham suvga choʻmdirgan edim, ammo bulardan boshqa hech bir odamni suvga choʻmdirganim esimda yoʻq.

¹⁷Zotan, Masih meni, odamlarni suvga choʻmdirsin deb emas, balki Xushxabarni yoysin deb yubordi. Menga bu Xushxabarni insonlarga oid boʻlgan donolik bilan yoyish buyurilmadi. Boʻlmasa, Masihning xochdagi oʻlimi haqidagi xabarning kuchi yoʻqolgan boʻlardi.

¹⁸Xoch haqidagi bu xabar halok boʻlayotganlarga telbalikday tuyuladi. Ammo biz — najot topayotganlar uchun esa u Xudoning qudratidir.

¹⁹Axir, Muqaddas bitiklarda yozilgan — ku: “Men donolarni donoligidan mahrum qilaman, Idroklilarni idrokidan ayiraman.”[5]

²⁰Donolar qani? Tafsirchilar va bu dunyoning faylasuflari qayerda? Xudo bu dunyoning hikmatini aqlsizlikka aylantirdi — ku, axir!

²¹Modomiki, Xudoning hikmati boʻyicha bu dunyo oʻz aql — zakovati bilan Xudoni tanib — bilmagan ekan, tentaklikday tuyulgan xabarga ishonganlarni Xudo qutqarishni lozim koʻrdi.

²²Mana, yahudiylar moʻjizalar talab qiladilar, yunonlar esa donolik payida yuradilar.

²³Biz esa faqat xochga mixlangan Masih[6] haqidagi xabarni yoymoqdamiz. Bu xabar yahudiylar uchun haqorat boʻlsa, gʻayriyahudiylar[7] uchun telbalikdir.

²⁴Biroq Xudo da’vat qilgan yahudiy va gʻayriyahudiylar[8] uchun Masih xochi Xudoning qudrati va hikmatidir.

²⁵Zero, Xudoning “aqlsizligi” inson donoligidan ustundir, Xudoning “zaifligi” inson qudratidan kuchliroqdir.

²⁶Ey birodarlarim, Xudo sizlarni da’vat qilganda qanday odam edingizlar, bir esga oling — chi! Insoniy nuqtayi nazardan qaraganda, orangizda dono, qudratli yoki olijanoblar koʻp emasdi.

²⁷Lekin Xudo donolarni sharmanda qilish uchun dunyodagi aqlsiz deb hisoblanganlarni tanladi. U qudratlilarni sharmanda qilish uchun dunyodagi zaif hisoblanganlarni tanladi.

²⁸Dunyodagi e’tiborli hisoblanganlar arzimas boʻlib qolsin deb, Xudo bu dunyodagi e’tiborsiz va kamsitilgan, ya’ni ahamiyatsiz deb hisoblanganlarni tanladi.

²⁹Shunday qilib, hech bir inson Xudoning oldida maqtana olmaydi.

³⁰Iso Masih orqali Xudo bizga yangi hayot ato etib, U orqali donolikka ega boʻlganimizni namoyon qildi. Biz Masihning sharofati bilan oqlanib, gunohdan xalos boʻldik, Xudoning aziz xalqi boʻldik.

³¹Shunday qilib, Muqaddas bitiklarda oʻrgatilganday, kim maqtanmoqchi boʻlsa, Egamizni bilaman, deb maqtansin[9].