Read Uzbek Muqaddas Kitob 1 Korinfliklar 10 Bible Online

1 Korinfliklar 10 - Uzbek Muqaddas Kitob bible

1 Korinfliklar 10

¹Birodarlar, ota — bobolarimizning tarixini yodingizga solmoqchiman. Ularning hammasi bulut ostida choʻlni kezib, Qizil dengizdan oʻtdilar[41].

²Ular bulut ostida kezib, Qizil dengizdan oʻtganda, goʻyo suvga choʻmdirilganday boʻlib, Musoning izdoshlari boʻldilar.

³Moʻjiza orqali ularning hammasiga bir xil ovqat berildi[42].

⁴Moʻjiza orqali hammasiga ichish uchun suv berildi. Moʻjiza orqali ular qoyadan suv olib ichdilar[43]. Oʻsha qoya Masihning timsoli edi. Yurgan yoʻllarida Masih ular bilan birga edi.

⁵Garchi shunday boʻlsa ham, ularning deyarli hammasi Xudoni norozi qildi, shuning uchun itoatsizlarni Xudo sahroda halok qildi.

⁶Itoatsizlarning boshiga tushgan koʻrgiliklar bizga ibrat boʻldi, toki biz ham ularga oʻxshab yovuzlik payida boʻlmaylik.

⁷Ularning ba’zilariga oʻxshab, butparast boʻlmaylik. Ular haqida shunday yozilgan — ku: “Xalq oʻtirib yeb — ichgandan keyin koʻngilxushlik qildi.”[44]

⁸Ularning ba’zilariga oʻxshab jinsiy axloqsizlikka berilmaylik. Ular axloqsizlik qilganlari uchun bir kunda yigirma uch mingtasi nobud boʻldi[45].

⁹Masihni sinamaylik, chunki ulardan ba’zilari shunday qilib, ilonlarning zahridan halok boʻldilar[46].

¹⁰Hech nolimaylik. Ulardan ba’zilari mingʻirlab nolidilar, shuning uchun Azroil ularni urib, nobud qildi[47].

¹¹Ular boshidan kechirgan bu hodisalar bizlarga ibrat boʻldi. Zamon oxirlashib qolgan paytda yashayotganlarga, ya’ni bizlarga saboq boʻlishi uchun bu hodisalar Muqaddas bitiklarda yozib qoldirilgan.

¹²Shuning uchun mahkam turibman, deb oʻylagan odam ehtiyot boʻlsin, tagʻin qoqilib yiqilmasin.

¹³Sizlar tushgan vasvasaga boshqalar ham duchor boʻlgan. Ammo Xudo sodiqdir, U kuchingizdan ortiq vasvasaga tushishingizga yoʻl qoʻymaydi. Vasvasaga bardosh bera olishingiz uchun kerakli paytda vasvasadan qutulish yoʻlini ham beradi.

¹⁴Ey azizlarim, butparastlikdan oʻzingizni olib qoching!

¹⁵Men sizlarni aqli raso odamlar deb bilib gapiryapman. Aytayotganlarimga oʻzingiz baho beringlar.

¹⁶Biz dasturxon atrofida jam boʻlib oʻtirganimizda[48], Xudoga shukur aytib qutlugʻ kosadan ichganimizda Masihning toʻkilgan qoniga sherik boʻlamiz, nonni boʻlishib yeganimizda esa Uning qurbon qilingan tanasiga sherik boʻlamiz — ku!

¹⁷Bitta nonni boʻlib yeganimizday, biz hammamiz, koʻpchilik boʻlsak — da, bir tanani hosil qilamiz.

¹⁸Isroil xalqiga qaranglar! Qurbongohdagi qurbonliklardan tanovul qilish ular uchun Xudoga sajda qilish degani — ku!

¹⁹Men bu bilan nima demoqchiman oʻzi? Butga bagʻishlangan qurbonlikning ham biror ahamiyati bormi? Butning oʻzi ham biror ahamiyatga egami?

²⁰Yoʻq! Butparastlar qurbonlik keltirganlarida, aslida qurbonlikni xudo deb atalgan butlarga emas, balki jinlarga bagʻishlagan boʻladilar. Jinlarga sherik boʻlishingizni men xohlamayman.

²¹Sizlar ham Rabbimiz Isoning kosasidan, ham jinlarning kosasidan icha olmaysizlar. Ham Rabbimiz dasturxonidan, ham jinlarning dasturxonidan bahramand boʻla olmaysizlar.

²²Nahotki Rabbimiz Isoning rashkini qoʻzgʻatmoqchi boʻlsangiz? Nahotki sizlar Undan ham qudratliroq boʻlsangiz?!

²³Ba’zilaringiz: “Inson xohlaganini qilishga haqli”, deb aytyapsiz. Toʻgʻri, lekin hamma narsa ham foydali emas. Inson xohlaganini qilishga haqi bor, lekin hamma narsa ham manfaat keltirmaydi.

²⁴Hamma birinchi oʻrinda oʻzining emas, boshqalarning manfaatini koʻzda tutsin.

²⁵Bozordagi goʻsht qayerdan kelgani haqida soʻrab — surishtirmay, pok vijdon bilan yeyaveringlar.

²⁶Axir, Muqaddas bitiklarda shunday yozilgan — ku: “Egamiznikidir zamin, undagi butun borliq.”[49]

²⁷Agar Masihni bilmagan birorta odam sizlarni uyiga chaqirsa va siz u yerga boradigan boʻlsangiz, oldingizga qoʻyilgan hamma narsani qayerdan kelganini soʻrab — surishtirmay, pok vijdon bilan yeyaveringlar.

²⁸Lekin bir birodar sizga: “Bu qurbonlik goʻshti”, deb aytsa, unda oʻsha aytgan odam haqi va uni vasvasaga solmaslik uchun oʻsha goʻshtni yemanglar[50]. Goʻsht yeyish siz uchun gunoh boʻlmasa ham, oʻsha odam uchun gunoh, u goʻshtni yesa, vijdoni qiynaladi. Ammo men bu goʻshtni yemasam ham erkinligim cheklanib qolmaydi.

³⁰Agar men Xudoga shukrona aytib ovqatni tanovul qilsam, oʻsha ovqatni yeganim uchun malomatga qolmayman.

³¹Shunday qilib, yeysizlarmi, ichasizlarmi, nimaiki qilsangiz ham, hammasini Xudoni ulugʻlash uchun qilinglar.

³²Yahudiylaru gʻayriyahudiylarni, Xudoni biladiganu bilmaydiganlarni oʻylab ish tuting.

³³Men ham oʻz manfaatimni emas, boshqalarning manfaatini koʻzlayapman, ular najot topsin deb, turli yoʻllar bilan hammaning koʻnglini topishga harakat qilyapman.