Read Uzbek Muqaddas Kitob 1 Korinfliklar 11 Bible Online

1 Korinfliklar 11 - Uzbek Muqaddas Kitob bible

1 Korinfliklar 11

¹Men Masihdan oʻrnak olganim kabi, sizlar ham mendan oʻrnak olinglar.

²Doim meni eslab turganlaringiz va men sizlarga oʻrgatgan urf — odatlarga amal qilayotganlaringiz uchun sizlarni maqtasam arziydi.

³Lekin bilinglarki, ayol erkakdan yaratilgan, har bir erkakning hayot manbayi Masihdir, Masihning hayot manbayi esa Xudodir.

⁴Boshini yopib ibodat qilgan yoki shu holda boshqalarga Xudoning soʻzini yetkazgan har bir erkak Masihni sharmanda qilgan boʻladi — ku!

⁵Ayol kishi boshiga hech narsa oʻramay ibodat qilsa yoki Xudoning soʻzini gapirsa, erkaklarga isnod keltiradi, axir, boshini yopmaslik sochini qirib tashlash bilan barobar — ku!

⁶Agar ayol kishi boshiga biror narsa oʻrashni xohlamasa, mayli, sochini kesib tashlayversin. Agar kalta soch va qirilgan bosh ayol kishining sharmanda ekanligini koʻrsatsa, ayollar boshlariga roʻmol oʻrasinlar.

⁷Erkak kishi boshini yopmasligi kerak, chunki u Xudoning suratida yaratilgan va Uning ulugʻvorligini aks ettiradi. Ayol kishi esa erkak kishining ulugʻvorligini aks ettiradi.

⁸Axir, erkak ayoldan emas, balki ayol erkakdan yaratilgan.

⁹Erkak ayol kishi uchun emas, balki ayol erkak uchun yaratilgan.

¹⁰Sizlarga shuni aytmoqchiman: ayol kishi boshiga biror narsa oʻraydimi yoki yoʻqmi, bu haqda oʻzi qaror qilishga haqi bor. Axir, erkaklar qatori, ular ham farishtalarni hukm qiladilar — ku![51]

¹¹Holbuki, Rabbimiz Isoga tegishli boʻlganlar orasida ayol kishi erkakdan mustaqil emas, erkak kishi esa ayoldan mustaqil emas.

¹²Ayol kishi erkakdan yaratilgani toʻgʻri, lekin oʻsha paytdan beri har bir erkak ayol kishidan tugʻilgan. Aslida esa butun borliqning manbayi Xudodir.

¹³Oʻzingiz oʻylab koʻring — chi, ayol kishi boshini yopmay Xudoga ibodat qilishi toʻgʻrimi?

¹⁴Erkak kishining sochlari uzun boʻlsa, bu erkak uchun sharmandalik ekanligini tabiatning oʻzi oʻrgatadi — ku!

¹⁵Xuddi shunga oʻxshab, ayol kishining sochi uzun boʻlsa, bu ayol kishi uchun sharaf emasmi?! Axir, uzun soch boshiga roʻmol oʻrash kerakligini koʻrsatadi.

¹⁶Agar birortasi bu masaladagi yoʻl — yoʻriqlarim haqida bahslashmoqchi boʻlsa, bilsinki, Xudoning jamoatlarida biz aytib oʻtganlardan boshqa urf — odatlar yoʻq.

¹⁷Quyidagi masalalarga kelganda esa sizlarni maqtay olmayman. Yigʻilishlaringiz[52] foydadan koʻra, koʻproq zarar keltirayotgan ekan.

¹⁸Avvalo, siz — imonlilar birga yigʻilganingizda har xil guruhlarga boʻlinar ekansiz, bunga qisman boʻlsa ham ishonaman.

¹⁹Toʻgʻri, kelishmovchiliklarning oldini olib boʻlmaydi. Axir, kelishmovchilik boʻlgandagina orangizda kim toʻgʻri fikr qilayotgani bilinadi.

²⁰Sizlar birga yigʻilganingizda hech ham Rabbimiz Isoni xotirlayotganga oʻxshamaysiz.

²¹Chunki hamma oʻzi olib kelgan ovqatini oʻzi tanovul qilayotgan ekan. Shunday qilib, ba’zilar och qolayotgan ekan, ba’zilar esa mast boʻlib qolayotgan ekan.

²²Nahotki yeyish va ichish uchun uylaringiz boʻlmasa?! Yoki Xudoning jamoatini pisand qilmay, yoʻqsillarni xijolatda qoldirmoqchimisizlar? Sizlarga yana nima aytayin? Sizlarni maqtaymi? Yoʻq, sizlarni bu xususda maqtamayman.

²³Men sizlarga bergan yoʻl — yoʻriqlarni Rabbimiz Isodan oʻrganganman. Rabbimiz Iso xoinlarcha tutib berilgan kechada qoʻliga non oldi — da,

²⁴shukrona duosini aytib, sindirdi va shunday dedi[53]: “Bu non Mening tanamni bildiradi. Tanam sizlar uchun fido boʻladi. Birgalikda non sindirib yeganingizda Meni xotirlanglar.”

²⁵Ovqatlanib boʻlganlaridan keyin, Iso yana shukrona aytib, sharob quyilgan kosani oldi — da, shunday dedi: “Bu kosa Xudoning yangi ahdini bildiradi. Bu ahd sizlar uchun toʻkiladigan qonim evaziga kuchga kiradi. Birgalikda kosadan sharob ichganingizda Meni xotirlanglar.”

²⁶Har safar birgalikda shu tarzda non yeb, sharob ichar ekansiz, Rabbimiz kelguniga qadar Uning oʻlimini e’lon qilayotgan boʻlasizlar.

²⁷Shunday qilib, kimda — kim Rabbimizning yoʻlida yurganlarga nomunosib ravishda bu nondan yesa yoki Rabbimizning kosasidan ichsa, Rabbimizning tanasi va qoniga qarshi gunoh qilgan boʻladi.

²⁸Shuning uchun har bir kishi oʻzini oʻzi tekshirib koʻrsin, shundan soʻnggina nondan yesin va sharobdan ichsin.

²⁹Rabbimizning tanasini pisand qilmasdan[54] yeb — ichgan odam oʻzini oʻzi mahkum qilgan boʻladi.

³⁰Mana shu sababdan koʻplaringiz zaif va xastasizlar, hatto ba’zilar oʻlib ketgan.

³¹Agar oʻzimizni oʻzimiz yaxshilab tekshirganimizda edi, mahkum boʻlmas edik.

³²Dunyo bilan birga mahkum boʻlmasligimiz uchun Rabbimiz Iso bizni hukm qilib, adabimizni beryapti.

³³Shuning uchun, birodarlarim, Rabbimizni xotirlash niyatida birgalikda yeb — ichish uchun yigʻilganingizda, bir — biringizni kutib turinglar.

³⁴Agar biror kishi och boʻlsa, oʻz uyida ovqat yeb kelsin. Shunda yigʻilishingizdagi xulq — atvoringiz sizlarni mahkum qilmaydi. Qolgan masalalar haqida oldingizga borganimdan keyin yoʻl — yoʻriq koʻrsataman.