Read Uzbek Muqaddas Kitob 1 Korinfliklar 12 Bible Online

1 Korinfliklar 12 - Uzbek Muqaddas Kitob bible

1 Korinfliklar 12

¹Ey birodarlarim, endi Muqaddas Ruh beradigan in’omlar masalasiga kelsak, bu haqda toʻliq tushunchaga ega boʻlishingizni xohlayman.

²Esingizdami, sizlar Xudosiz boʻlgan paytlaringizda yoʻldan ozib, soqov butlarga sajda qilar edingiz.

³Shuning uchun quyidagilarni bilishingizni xohlayman. Xudoning Ruhidan ilhom olayotgan hech kim Isoni la’natlamaydi, shuningdek, hech kim Muqaddas Ruhning ilhomisiz Isoni Rabbim deb ayta olmaydi.

⁴Ruh beradigan in’omlar har xildir, ammo Ruh birdir.

⁵Xizmat qilish yoʻllari har xildir, Rabbimiz Iso esa birdir.

⁶Toʻgʻri, xizmatlar har xildir, lekin har bir insonga bu xizmatlarni bajarish qobiliyatini berayotgan Xudo birdir.

⁷Umumiy manfaat uchun Muqaddas Ruh har kimda oʻziga xos ravishda namoyon boʻladi.

⁸Bir odamga Ruh orqali donolik bilan gapirish qobiliyati beriladi, boshqa birovga esa xuddi shu Ruh orqali ilm — ma’rifatga toʻla soʻzlarni gapirish qobiliyati beriladi.

⁹Oʻsha Ruh orqali kimgadir kuchli bir imon beriladi, boshqa birovga esa shifo berish in’omi beriladi.

¹⁰Ba’zilarga moʻjizalar koʻrsatish qobiliyati, boshqalarga Xudoning soʻzini yetkazish in’omi berilgan. Yana boshqalarga esa ruhlarning farqiga borish in’omi berilgan. Kimgadir noma’lum tillarda gapirish in’omi berilgan boʻlsa, boshqalarga bu tillarni ta’bir qilish in’omi berilgan.

¹¹Bularning hammasini Muqaddas Ruh bajo qiladi. Har bir insonga Ruhning Oʻzi loyiq koʻrgan in’omni ato qiladi.

¹²Tana bir boʻlsa — da, uning a’zolari koʻp. Xuddi shuningdek, tana a’zolari koʻp boʻlsa — da, ularning hammasi bir tanani tashkil qiladi. Masihning tanasi, ya’ni jamoat ham shundaydir.

¹³Axir, biz hammamiz — yahudiylaru yunonlar[55], qullaru ozod boʻlganlar, bir tana boʻlishimiz uchun bir Muqaddas Ruhga choʻmdirildik. Hammamiz oʻsha bir Ruhga toʻlib — toshganmiz.

¹⁴Zotan, badan bir a’zodan emas, balki koʻp a’zolardan iborat.

¹⁵Oyoq: “Men qoʻl emasman, shuning uchun tanaga tegishli emasman” degani bilan tanaga tegishli boʻlmay qolmaydi — ku!

¹⁶Quloq ham: “Men koʻz emasman, shuning uchun tanaga tegishli emasman” degani bilan tanaga tegishli boʻlmay qolmaydi — ku!

¹⁷Axir, butun tana koʻz boʻlsa, qanday qilib eshitadi? Agar butun tana quloq boʻlsa, qanday qilib hidlay oladi?

¹⁸Axir, Xudo tana a’zolarining har birini Oʻzi xohlagan joyiga qoʻygan.

¹⁹Agar ularning hammasi birgina a’zo boʻlganda, tana boʻlarmidi?!

²⁰Shunday qilib, tana a’zolari koʻp, lekin tana birdir.

²¹Koʻz qoʻlga: “Sen menga kerak emassan”, deb ayta olmaydi, bosh ham oyoqlarga: “Sizlar menga kerak emassizlar”, deya olmaydi — ku!

²²Aksincha, ojiz tuyulgan tana a’zolari eng kerakli a’zolardir.

²³Biz tanamizning uyatli hisoblangan a’zolariga e’tibor berib, ularni yopib yuramiz. Koʻrimsiz tuyulgan tana a’zolarimizga diqqat — e’tibor qilamiz.

²⁴Uyatli boʻlmagan tana a’zolarimizga bunday e’tibor berishimizning hojati yoʻq. Xudo tanamizni shunday yaratganki, hurmat — e’tiborsiz a’zolarga koʻproq izzat — e’tibor beriladi.

²⁵Shunday qilib, tana a’zolari orasida kelishmovchilik boʻlmaydi, balki barcha a’zolar bir — biriga gʻamxoʻrlik qiladi.

²⁶Agar bir a’zo azob cheksa, qolgan barcha tana a’zolari u bilan birga azob chekadi. Agar bir a’zo yuksalsa, qolgan barcha a’zolar u bilan birga sevinadi.

²⁷Endi sizlar Masihning tanasisizlar, har biringiz tananing alohida bir a’zosisiz.

²⁸Shu tariqa, Xudo imonlilar jamoatiga, birinchidan, havoriylarni, ikkinchidan, paygʻambarlarni, uchinchidan, muallimlarni tayinlab berdi. Keyin ba’zilarga moʻjiza koʻrsatish qobiliyatini, boshqalarga esa shifo berish in’omini, yana boshqalarga yordam berish, boshqarish, noma’lum tillarda gapirish qobiliyatlarini ato qildi.

²⁹Hamma havoriymi?! Hamma ham Xudoning soʻzlarini yetkaza oladimi?! Hamma ham muallimmi?! Hamma moʻjiza koʻrsatadimi?!

³⁰Hammada shifo berish in’omi bormi?! Hamma ham noma’lum tillarda gapirish qobiliyatiga egami?! Hamma ham noma’lum tillarda aytilganlarni talqin qila oladimi?!

³¹Sizlar ulugʻroq in’omlarga ega boʻlishga intilinglar. Endi sizlarga eng oliy yoʻlni koʻrsataman.