Read Uzbek Muqaddas Kitob 1 Korinfliklar 14 Bible Online

1 Korinfliklar 14 - Uzbek Muqaddas Kitob bible

1 Korinfliklar 14

¹Sevgining payida boʻlinglar, shuningdek, Muqaddas Ruh beradigan in’omlarni olishga, ayniqsa insonlarga Xudoning soʻzini yetkazishga intilinglar.

²Kim noma’lum tilda gapirsa, insonlarga emas, Xudoga gapiradi, chunki uni hech kim tushunmaydi. U Ruhdan ilhomlanib, sirlarni gapiradi.

³Xudoning soʻzini yetkazadiganlar esa odamlarni imonda mahkam turishga undaydilar, ularga dalda beradilar, yupatadilar.

⁴Odam noma’lum tilda gapirganda, faqatgina oʻzining imonini mustahkamlaydi. Xudoning soʻzini odamlarga yetkazadigan inson esa butun jamoatning imonini mustahkamlaydi.

⁵Hammangiz ham noma’lum tillarda gapirishingizni istayman, lekin boshqalarga Xudoning soʻzini yetkazadigan inson boʻlishingizni undan ham koʻproq xohlayman. Chunki Xudoning soʻzini aytish odamlarga koʻproq foyda keltiradi, lekin noma’lum tilda gapirganning soʻzlari talqin qilinsa, bu ham jamoatning imonini mustahkamlaydi.

⁶Xoʻsh, birodarlarim, men sizlarning oldingizga kelib, noma’lum tilda gapirsam — da, lekin aytganlarim sizlarga hech qanday tushuncha, bilim bermasa, Xudoning soʻzini yetkazmasa va yoʻl — yoʻriq koʻrsatmasa, men sizlarga qanday foyda keltirgan boʻlaman?

⁷Hatto jonsiz cholgʻu asboblari ham, masalan, nay yoki chang, farqli bir sado chiqarmasa, nay yoki changda qanday musiqa chalinayotganini odam qayerdan biladi?

⁸Agar burgʻu noaniq bir sado bersa, kim jangga tayyorgarlik koʻrishni boshlaydi?

⁹Shunga oʻxshab, agar sizlarning gapingiz tushunarsiz boʻlsa, tinglovchilaringiz nima gapirganingizni qanday bilib oladilar? Sizlar havoga gapirganday boʻlasizlar.

¹⁰Dunyoda tillar koʻp va xilma — xildir, ulardan birortasi ham ma’nosiz emas.

¹¹Agar men biror tilni tushunmasam, u tilda gapirayotgan odam uchun men ajnabiyman, u ham men uchun ajnabiydir.

¹²Modomiki, sizlar Ruh beradigan in’omlarga ega boʻlishga intilayotgan ekansizlar, butun jamoatning imonini mustahkamlaydigan in’omga boy boʻlish payida boʻlinglar.

¹³Shuning uchun noma’lum tilda gapirgan odam oʻzining aytganlarini talqin qilish qobiliyatini olish uchun ham ibodat qilsin.

¹⁴Agar men noma’lum tilda ibodat qilsam, ruhim ibodat qiladi, ongim esa bunda ishtirok etmaydi.

¹⁵Xoʻp, bundan qanday xulosa chiqaraman? Ruhim bilan ibodat qilaman, ongim bilan ham ibodat qilaman. Ruhim bilan hamdu sano aytaman, ongim bilan ham hamdu sano aytaman.

¹⁶Aks holda, agar sen ruhing bilan noma’lum tilda hamdu sano aytsang, atrofdagilar qanday qilib sening shukrona ibodatingga qoʻshilib “omin” deb ayta oladi? Ular sening aytayotganlaringni tushunmaydi — ku!

¹⁷Shu tarzda shukrona aytganing yaxshi, lekin bu atrofdagilarning imonini mustahkamlamaydi — ku!

¹⁸Xudoga shukurki, noma’lum tillarda men hammangizdan ham koʻproq gapiraman.

¹⁹Imonlilar jamoatida esa noma’lum tilda minglab soʻzlarni gapirgandan koʻra, boshqalarga nasihat qilish uchun tushunarli beshtagina soʻz aytishni afzal bilaman.

²⁰Ey birodarlarim, yosh bolalarday fikr qilmanglar. Aksincha, yomonlikka kelganda chaqaloqdek boʻlib, aql — idrokka kelganda esa yetuk insonlar boʻlinglar.

²¹Muqaddas bitiklarda[57] quyidagiday yozilgan: “Egamiz shunday demoqda: «Men bu xalqqa oʻzga tillarda, Begona xalqlarning ogʻzi orqali gapiraman, Ammo shunda ham ular Menga quloq solmaydilar.»”[58]

²²Demak, noma’lum tillar imonlilar uchun emas, balki imonsizlar uchun alomatdir. Xudoning soʻzini yetkazish in’omi esa imonsizlar uchun emas, imonlilar uchun alomatdir.

²³Agar imonlilar jamoati bir joyda yigʻilib, hammasi noma’lum tillarda gapirayotgan boʻlishsa, u yerda bundan bexabar boʻlganlar, ya’ni imonsizlar boʻlsa, ular: “Bular jinni boʻlib qolibdi”, deb aytmaydimi?!

²⁴Ammo hamma Xudoning soʻzini tushunarli ravishda boshqalarga yetkazib berayotgan boʻlsa, u yerdagi imonsiz odam ularning aytganlarini eshitadi. Shundan keyin yuragini tekshirib koʻradi — da, gunohkor ekanligiga amin boʻladi.

²⁵Uning yuragidagi sirlari fosh boʻladi. Shunda u muk tushib: “Chindan ham Xudo sizlar bilan ekan”, deydi — da, Xudoga sajda qiladi.

²⁶Endi, birodarlar, bundan qanday xulosa chiqaramiz? Birga yigʻilganingizda, ba’zilar sano aytadi, ba’zilar ta’lim beradi, ba’zilar Xudoning soʻzini boshqalarga yetkazadi, ba’zilar noma’lum tillarda gapiradi, yana ba’zilar esa ularning aytganlarini talqin qiladi. Bularning hammasini imonlilar jamoatining imonini mustahkamlash niyatida qilsinlar.

²⁷Agar ba’zilar noma’lum tillarda gapirmoqchi boʻlsa, ikki kishi, eng koʻpi bilan uch kishi navbat bilan gapirsin, ularning aytganlari talqin qilinsin.

²⁸Agar ta’bir qiluvchi boʻlmasa, noma’lum tilda gapirayotgan odam jamoatda sukut saqlab, oʻziga va Xudoga gapirsin.

²⁹Shuningdek, ikki yoki uchta odam boshqalarga Xudoning soʻzini yetkazsin, qolganlar esa aytilganlarga baho bersinlar.

³⁰Oʻtirganlardan biriga Xudoning soʻzi kelsa, oʻsha paytda gapirayotgan odam jim boʻlsin.

³¹Shunda hamma birin — ketin Xudoning soʻzini boshqalarga yetkaza oladi, toki hamma ta’lim va dalda olsin.

³²Xudoning xabarini yetkazayotganda inson oʻz ruhini boshqara oladi.

³³Axir, Xudo tartibsizlik Xudosi emas, balki tinchlik Xudosidir. Barcha jamoatlarda, Xudoning aziz xalqi orasida bu namoyon boʻlib turibdi.

³⁴Jamoatda ayollar sukut saqlasin. Axir, ularga gapirish uchun ijozat berilmagan, Muqaddas bitiklarda yozilganiday, ular itoatkor boʻlishlari kerak.

³⁵Agar ular biror narsani bilmoqchi boʻlsalar, uyda oʻz erlaridan soʻrasinlar. Imonlilar jamoatida ayol kishining gapirishi adabsizlikdir.

³⁶Ey Korinflik birodarlar, Xudoning soʻzi sizdan kelib chiqqanmi?! Nahotki u faqatgina sizlarga yetib borgan boʻlsa?!

³⁷Agar biror kishi: “Menda Xudoning soʻzini yetkazish in’omi bor” yoki “Ruhdan maxsus bir in’om olganman”, deb oʻylasa, mening yozganlarim Rabbimiz Isoning amri ekanligini e’tirof etsin.

³⁸Ammo ular buni tan olmasalar, ularga e’tibor bermanglar.

³⁹Shunday ekan, birodarlarim, boshqalarga Xudoning soʻzini yetkazishga intilinglar, boshqalarning noma’lum tillarda gapirishiga toʻsqinlik qilmanglar.

⁴⁰Faqat hammasi odob va tartib bilan qilinsin.