Read Uzbek Muqaddas Kitob 1 Korinfliklar 15 Bible Online

1 Korinfliklar 15 - Uzbek Muqaddas Kitob bible

1 Korinfliklar 15

¹Birodarlarim, men oʻzim sizlarga yetkazgan Xushxabarning mohiyatini yana bir bor eslatib oʻtmoqchiman. Sizlar bu Xushxabarni qabul qildingiz, u imoningizning asosidir.

²Oʻsha Xushxabar orqali najot topasiz, ammo sizlar men aytgan oʻsha Xushxabar orqali yetishgan imoningizda mahkam turishingiz kerak, aks holda, imoningiz bekor boʻladi.

³Menga berilgan eng muhim ta’limotni sizlarga yetkazdim. Bu ta’limot quyidagichadir: Muqaddas bitiklarga muvofiq[59], Masih gunohlarimiz uchun oʻlgan.

⁴Keyin U dafn qilindi, uchinchi kuni esa tirildi. Bularning hammasi Muqaddas bitiklarga muvofiq sodir boʻldi.

⁵Avval U Butrusga[60], soʻngra oʻn ikki shogirdiga koʻrindi.

⁶Undan keyin bir vaqtning oʻzida besh yuzdan koʻproq birodarlarga koʻrindi. Ularning aksariyati hozirga qadar tirik, ba’zilari esa dunyodan koʻz yumib ketganlar.

⁷Undan soʻng Masih Yoqubga[61] va qolgan barcha havoriylarga koʻrindi.

⁸Men rivojlanmay qolgan bir homiladay boʻlsam — da, nihoyat menga ham koʻrindi[62].

⁹Axir, men havoriylarning eng arzimasiman, havoriy deb atalishga ham loyiq emasman, chunki men Xudoning jamoatini quvgʻin qilardim.

¹⁰Ammo Xudoning inoyati tufayli endi havoriyman. Uning menga koʻrsatgan inoyati zoye ketmadi, zero, men havoriylarning hammasidan ham koʻproq mehnat qildim. Lekin aslida mehnat qilgan men emas, balki Xudoning inoyatidir.

¹¹Sizlar Xushxabarni mendan eshitdingizmi yoki boshqalardanmi, farqi yoʻq, chunki biz bir Xushxabarni va’z qilamiz, sizlar esa oʻsha Xushxabarga ishongansiz.

¹²Masih oʻlikdan tirilgan, deb va’z qilinayotgan ekan, qanday qilib ba’zilaringiz, oʻlikdan tirilish degan narsa yoʻq, deb aytyapsizlar?!

¹³Axir, oʻlikdan tirilish boʻlmasa, Masih ham tirilmagan ekan — da!

¹⁴Masih tirilmagan boʻlsa, Xushxabarni va’z qilishimiz bekor, sizlarning imoningiz ham bekor.

¹⁵Agar rostdan ham oʻliklar tirilmasa va Masihni Xudo tiriltirmagan boʻlsa, bunday holda, biz Xudo haqida yolgʻon shohidlik bergan boʻlamiz, chunki biz: “Xudo Masihni tiriltirdi”, deb shahodat berib yuribmiz.

¹⁶Oʻliklar tirilmas ekan, Masih ham tirilmagan boʻladi.

¹⁷Agar Masih tirilmagan boʻlsa, sizlarning imoningiz behuda, sizlar hali ham gunohga botganingizcha yuribsizlar.

¹⁸Shunday boʻlsa, Masihga ishongan holda hayotdan koʻz yumganlar butunlay halok boʻlib ketibdilar — da!

¹⁹Agar biz yolgʻiz bu hayot uchun Masihga umid bogʻlagan boʻlsak, eng baxtsiz insonlar ekanmiz.

²⁰Vaholanki, Masih haqiqatan ham tirildi! U birinchi boʻlib tirildi, shu tariqa oʻlikdan tiriladiganlarning orasida hosilning ilk samarasiday boʻldi.

²¹Oʻlim bir inson orqali dunyoga kirdi. Shunga oʻxshab, oʻliklarning tirilishi ham bir Inson orqali sodir boʻladi.

²²Axir, bu dunyoga oʻlim Odam Ato tufayli kirib keldi, endi Iso Masih orqali hamma tiriladi.

²³Hamma narsa oʻz navbati bilan sodir boʻladi: mana, Masih birinchi boʻlib tirildi, Masih kelganda esa Unga tegishli boʻlganlar tiriladi.

²⁴Shundan soʻng Masih har qanday hokimiyatni, hukmronlik va qudratni barbod qilib, saltanatni samoviy Ota — Xudoga topshirganda oxirat boʻladi.

²⁵Masihning hamma dushmanlari Uning oyoqlari ostiga poyandoz qilinmaguncha, U hukmronlik qilishi kerak.

²⁶Shunda oxirgi dushman — oʻlim ham barham topadi.

²⁷Axir, Muqaddas bitiklarga koʻra, Xudo hamma narsani Masihga tobe qilib, Uning oyoqlari ostiga tashlagan[63]. Garchi shunday boʻlsa — da, borliqni Unga tobe qilgan Xudo bundan istisnodir.

²⁸Xudo hamma narsani Masihga tobe qilgandan keyin, Oʻgʻil ham Xudoga tobe boʻladi, toki Xudo borliq ustidan butunlay hukmron boʻlsin.

²⁹Ba’zilaringiz oʻlganlar uchun suvga choʻmdirilayotgan ekansiz[64]. Oʻliklar tirilmas ekan, ularning oʻrniga choʻmdirilishning qanday foydasi bor?

³⁰Xoʻsh, nima uchun bizlar har daqiqa oʻz hayotimizni xavf — xatar ostiga qoʻyyapmiz?

³¹Har kuni oʻlimga roʻbaroʻ boʻlayotganim rost! Birodarlarim, Rabbimiz Iso Masih sizlarning hayotingizda qilayotgan ishlaridan faxrlanayotganim chin boʻlganiday, aytayotgan gaplarimda ham biror yolgʻon yoʻq.

³²Agar faqatgina bu dunyoga umid bogʻlagan boʻlsam, nima uchun Efes shahrida hayotimni xavf ostiga qoʻydim?![65] Agar oʻliklar tirilmas ekan, unda “kelinglar, yeb — ichib qolaylik, erta — indin oʻlib ketamiz — ku”[66] deyish oʻrinli boʻlmaydimi?!

³³Lekin adashmanglar, axir, “yomon ulfatlar yaxshi axloqni buzadi”, deyishadi — ku!

³⁴Koʻzlaringizni ochib, oʻzingizga kelinglar! Bas endi, gunoh qilavermanglar. Koʻrinib turibdiki, ba’zilaringiz Xudoni bilmaysizlar. Sizlarni uyaltiray deb, bularni aytyapman.

³⁵Ehtimol, biror kishi: “Oʻliklar qanday qilib tirilarkan? Ularning tanalari qanaqa boʻlarkan?” deb soʻrar.

³⁶Qanday ahmoqona savol — a bu! Axir, ekilgan urugʻ oʻlmasa, oʻsimlik oʻsib chiqmaydi — ku!

³⁷Bugʻdoy boʻladimi yoki boshqa biror narsami, ekin ekkaningda, oʻsib chiqadigan oʻsimlikni emas, uning urugʻini ekasan — ku!

³⁸Xudo uruqqa Oʻzi istagan bir jismni bagʻishlaydi, har bir urugʻdan alohida bir jismni hosil qiladi.

³⁹Koʻrib turibmizki, jonzotlarning ham tanalari har xil, insonlarniki boshqacha, hayvonlarniki boshqacha, qushlarniki boshqacha, baliqlarniki boshqacha.

⁴⁰Samoviy va dunyoviy jismlar ham bor. Lekin samoviy jismlarning koʻrki boshqa, dunyoviylarniki boshqa.

⁴¹Quyoshning koʻrki boshqa, oyning koʻrki boshqa hamda yulduzlarning koʻrki boshqa. Axir, yulduzlar ham oʻz koʻrkiga yarasha bir — biridan farq qiladi.

⁴²Oʻliklarning tirilish jarayoni ham quyidagiga oʻxshaydi: ekilgan urugʻdan oʻsimlik oʻsib chiqqanday, oʻladigan tanamiz oʻlmaydigan boʻlib tiriladi.

⁴³Hozirgi ojiz va xor boʻlgan tanamiz, qudratu ulugʻvorlikka toʻla ravishda tiriladi.

⁴⁴Hozirgi tanamiz moddiy bir jism boʻlsa, tiriladigan tanamiz ruhiy bir tana boʻladi. Axir, moddiy tana bor ekan, ruhiy tana ham bor — da!

⁴⁵Muqaddas bitiklarda yozilgani boʻyicha: “Birinchi odam — Odam Ato tirik jon boʻldi.”[67] Oxirgi Odam Ato, ya’ni Iso Masih esa hayotbaxsh ruh boʻldi.

⁴⁶Mana shundan koʻrinib turibdiki, ruhiy tana emas, moddiy tana birinchi kelgan. Moddiy tana oʻtib ketgandan keyingina, ruhiy tana keladi.

⁴⁷Birinchi odamning tanasi moddiy jismdir, u tuproqdan yaratilgan, ikkinchi Odam, ya’ni Masih esa samoviydir.

⁴⁸Tuproqdan yaratilgan ilk odam qanday boʻlsa, qolgan hamma odamlar ham shundaydir. Samoviy Odam, ya’ni Masih qanday boʻlsa, samodagilar ham xuddi Unga oʻxshaydilar.

⁴⁹Biz tuproqdan yaratilgan odamga oʻxshar ekanmiz, bir kun kelib, samoviy Odamga ham oʻxshagan boʻlamiz.

⁵⁰Ey birodarlar! Sizlarga quyidagilarni aytmoqchiman: qon va etdan iborat boʻlgan tanalarimiz Xudoning Shohligidan bahramand boʻla olmaydi. Bu foniy tana mangu hayotga ega boʻla olmaydi.

⁵¹Men sizlarga bir sirni bildirmoqchiman: biz hammamiz ham oʻlmaymiz, ammo hammamiz oʻzgaramiz.

⁵²Toʻsatdan, koʻz ochib yumguncha, oxirzamon karnayi chalinganda oʻzgaramiz. Ha, karnay chalinadi va shu onda marhumlar hech oʻlmaydigan boʻlib tiriladilar. Shunda biz ham oʻzgaramiz.

⁵³Chunki bizning oʻladigan tanamiz oʻlmaydigan tanaga, foniy tanamiz mangu tanaga aylanishi kerak.

⁵⁴Oʻladigan tanamiz oʻlmaydigan tanaga, bu foniy tanamiz mangu tanaga aylanganda, Muqaddas bitiklarda yozilgan quyidagi soʻzlar amalga oshadi: “Oʻlim yengilib, yoʻq boʻldi.

⁵⁵Ey oʻlim, sening zafaring qayerda?! Ey oʻlim, sening nishing qayerda?!”[68]

⁵⁶Oʻlimning nishi gunohdir. Gunohning quvvati esa qonundan kelib chiqdi.

⁵⁷Xudoga shukurlar boʻlsin! U Rabbimiz Iso Masih orqali bizga gʻalaba ato qilgan.

⁵⁸Shuning uchun, ey aziz birodarlarim, hech ikkilanmay, imoningizda mahkam turinglar. Hamisha Rabbimiz Isoga xizmat qilishga bagʻishlanib, yanada gʻayratli boʻlinglar. Axir, Rabbimiz yoʻlida qilgan mehnatingiz samarasiz qolmasligini bilasizlar — ku!