Read Uzbek Muqaddas Kitob 1 Korinfliklar 16 Bible Online

1 Korinfliklar 16 - Uzbek Muqaddas Kitob bible

1 Korinfliklar 16

¹Endi Xudoyimizning Quddusdagi azizlariga moddiy mablagʻ toʻplash[69] masalasiga kelsak, sizlar ham Galatiya hududidagi jamoatlarga bergan yoʻl — yoʻriqlarimga amal qilinglar.

²Har yakshanba kuni har bir odam qoʻlidan kelganicha bir miqdor pulni olib qoʻysin, toki oldingizga borganimda pul yigʻishga hojat boʻlmasin.

³Borganimdan keyin, ehsonlaringizni imonlilarga topshirsin deb, oʻzingiz munosib koʻrgan kishilarni Quddusga joʻnataman. Ularning har birini tanishtirib, maktub yozib beraman.

⁴Agar borishga imkon boʻlsa, oʻzim ham ular bilan birga boraman.

⁵Makedoniyadan oʻtish niyatim bor. Shundan keyin sizlarning oldingizga boraman.

⁶Sizlar bilan birmuncha vaqt boʻlaman, deb oʻylayman, balki hatto qishni ham sizlar bilan oʻtkazarman. Undan keyin qayerga bormoqchi boʻlsam ham, sizlarning yordamingiz bilan safarimni yana davom ettiraman.

⁷Axir, sizlarni faqatgina yoʻl — yoʻlakay koʻrishni istamayman, Rabbimiz Iso xohlasa, sizlar bilan koʻproq vaqt oʻtkazaman, deb umid qilaman.

⁸Lekin Hosil bayramiga[70] qadar Efes shahrida qolaman.

⁹Chunki bu yerda menga qarshi chiqqanlar koʻp boʻlishiga qaramay, ta’sirchan faoliyat koʻrsatishim uchun yoʻl ochildi.

¹⁰Timoʻtiy[71] oldingizga borganda unga gʻamxoʻrlik qilinglar, u orangizda xotirjam yursin, chunki u ham menga oʻxshab Rabbimiz Iso xizmati bilan mashgʻul.

¹¹Hech kim unga past nazar bilan qaramasin. Timoʻtiy mening oldimga qaytib kelayotganda, uni eson — omon kuzatib yuboringlar. Uning birodarlar bilan birga kelishini kutib turibman.

¹²Birodarimiz Apollosga[72] kelsak, uni birodarlarga qoʻshilib sizlarning oldingizga borishga koʻp undadim, lekin uning hozir hech borgisi yoʻq. Imkoni boʻlsa keyinroq borar ekan.

¹³Hushyor boʻlinglar, imonda mahkam turib, jasoratli va kuchli boʻlinglar.

¹⁴Hamma narsani mehr — muhabbat bilan qilinglar.

¹⁵Birodarlar, Stefanasning xonadonini bilasizlar. Ular Axaya viloyatida[73] birinchi boʻlib Masihga imon keltirgan va oʻzlarini Xudoning aziz xalqiga xizmat qilishga bagʻishlaganlar. Sizlardan bir iltimosim bor:

¹⁶bunday insonlarni va ular bilan birga berilib xizmat qilayotganlarni hurmat qilib, ularning aytganlarini qilinglar.

¹⁷Stefanas, Fortunatus va Axaykusning kelganidan xursand boʻldim, ular sizlarning yoʻqligingizni bildirmadi.

¹⁸Ular sizlarning ruhingizni koʻtargandek, mening ham ruhimni koʻtardilar. Bunday insonlarni qadrlanglar.

¹⁹Asiya viloyatidagi jamoatlar sizlarga salom yoʻllayaptilar. Akil bilan Priskilla[74] va ularning uyida yigʻiladigan jamoat ham sizlarga — Rabbimiz Isoning yoʻlidagi hamkorlariga otashin salom aytyapti.

²⁰Hamma birodarlarimiz salom aytyaptilar. Bir — biringiz bilan oʻpishib koʻrishinglar.

²¹Men, Pavlus, mana shu maktubning yakunini oʻz qoʻlim bilan yozyapman[75].

²²Kimki Rabbimiz Isoni yaxshi koʻrmasa, u la’nati boʻlsin! Ey Rabbimiz, kelgin![76]

²³Rabbimiz Isoning inoyati sizlarga yor boʻlsin.

²⁴Sizlarni yaxshi koʻraman, chunki hammamiz Iso Masihga tegishlimiz[77].