Read Uzbek Muqaddas Kitob 1 Korinfliklar 3 Bible Online

1 Korinfliklar 3 - Uzbek Muqaddas Kitob bible

1 Korinfliklar 3

¹Ey birodarlar, sizlarga ruhan yetuk insonlarga gapirganday emas, balki bu dunyoga tegishli odamlarga gapirganday gapirdim. Yana sizlarga endigina Masihga ishongan, imonda goʻdakday boʻlgan insonlarga soʻzlaganday soʻzladim.

²Sizlarga bergan ta’limotim milkka botadigan yegulikday emas, balki chaqaloqlarga kerak boʻlgan sutday edi, chunki sizlar kuchliroq ta’limotga tayyor emas edingiz. Hozir ham tayyor emassiz,

³chunki bu dunyo hali ham sizlarga oʻz ta’sirini koʻrsatyapti. Orangizda hasadgoʻylik va janjalkashlik bor ekan, bu sizlarning hali ham bashariy tabiatingiz ta’sirida ekaningizni, insoniy fikrlab yashayotganingizni koʻrsatmaydimi?!

⁴Axir, ba’zilaringiz: “Men Pavlusning shogirdiman”, boshqalaringiz esa: “Men Apollosning[14] shogirdiman”, desangiz, sizlar insoniy fikrlab yashayotgan boʻlmaysizmi?

⁵Axir, Pavlus kim? Apollos kim? Ular Xudoning xizmatkorlaridir, ular orqali sizlar imonga kelgansizlar. Har birimiz Egamiz bergan vazifani bajaramiz.

⁶Men urugʻ ekdim, Apollos sugʻordi, lekin Xudo parvarishlab, oʻstirdi.

⁷Kim ekkani yoki sugʻorgani muhim emas, eng muhimi oʻstiradigan Xudodir.

⁸Ekuvchining ham, sugʻoruvchining ham maqsadi bir va ularning har biri oʻz mehnatiga yarasha mukofot oladi.

⁹Biz Xudoning xizmatidagi hamkorlarmiz, sizlar esa Xudoning dalasisizlar. Ayni paytda sizlar Xudoning imorati hamsizlar.

¹⁰Xudoning marhamati bilan men mohir bir me’morday imoratning poydevorini qoʻydim. Endi esa boshqalar uning ustida qurilish qilyaptilar. Har kim qanday qilib qurayotganiga diqqat qilsin.

¹¹Zero, hech kim mavjud boʻlgan poydevordan boshqa poydevor qoʻya olmaydi. Bu poydevor Iso Masihdir.

¹²Bu poydevor ustiga kimdir oltindan, kimdir kumush yoki qimmatbaho toshlardan, yana kimdir esa yogʻochu xashak yoki poxoldan imorat qurmoqda.

¹³Har kimning ishi qanday ekanligi qiyomat kunida ayon boʻladi. Oʻsha kuni hammaning ishi olovda sinaladi.

¹⁴Kimning qilgan ishi olovga bardosh bersa, oʻsha kishi mukofot oladi.

¹⁵Kimning ishi yonib ketsa, u mukofotdan mahrum boʻladi. Holbuki, u Iso Masihga tegishli boʻlgani uchun najot topadi, lekin u olovdan qutulib chiqqan odamga oʻxshaydi.

¹⁶Nahotki bilmasangiz?! Sizlar Xudoning ma’badisizlar, Xudoning Ruhi orangizda maskan qilgan.

¹⁷Kimki Xudoning ma’badini buzsa, Xudo uni halok qiladi. Zero, Xudoning ma’badi muqaddasdir, bu ma’bad esa sizlarsiz.

¹⁸Hech kim oʻzini oʻzi aldamasin. Orangizda kimdir oʻzini bu dunyoda dono deb bilsa, oʻzining aqlsiz ekanligini tan olsin, shundagina u haqiqatan ham dono boʻladi.

¹⁹Chunki bu dunyoning donoligi Xudoning nazarida aqlsizlikdir. Muqaddas bitiklarda quyidagicha yozilgan — ku: “U donolarni oʻzlarining ayyorliklari orqali tutib oladi.”[15]

²⁰Yana shunday yozilgan: “Egamiz donolarning niyatini anglaydi, Niyatlarining behudaligini U biladi.”[16]

²¹Shuning uchun orangizda hech kim boshqa bir insonning ta’limotiga rioya qilayotgani bilan maqtanmasin. Axir, hammasi sizlarga tegishli — ku:

²²Pavlus, Apollos va Butrus[17], dunyo ham, hayot va oʻlim ham, hozir va kelajak ham — bularning hammasi sizniki.

²³Sizlar esa Masihniki, Masih esa Xudonikidir.