Read Uzbek Muqaddas Kitob 1 Korinfliklar 4 Bible Online

1 Korinfliklar 4 - Uzbek Muqaddas Kitob bible

1 Korinfliklar 4

¹Odamlar bizni Masihning xizmatkorlari hamda Xudoning sir — asrorlarini bayon etishga mas’ul insonlar deb bilishlari kerak.

²Bizdan talab qilingan narsa ishonchli boʻlishdir.

³Meni sizlar hukm qilasizlarmi yoki mahkamada hukm qilishadimi, menga farqi yoʻq. Men oʻzimni oʻzim ham hukm qilmayman.

⁴Zotan, oʻzimda hech bir ayb koʻrmasam ham, bu bilan oʻzimni oqlamayman. Chunki meni hukm qiluvchi Rabbimiz Iso boʻladi.

⁵Shu bois sizlar ham vaqtidan oldin, Rabbimiz kelmaguncha, aslo hukm qilmanglar. U kelib zulmatda yashirilgan narsalarni ravshan qiladi, inson yuraklarining maqsadlarini oshkor etadi. Oʻshanda har kim oʻz ishiga yarasha Xudoning tahsiniga sazovor boʻladi.

⁶Ey birodarlar, men oʻzimni va Apollosni[18] misol qilib keltirdim, toki sizlar Muqaddas bitiklarda yozilganlarga binoan yashashni bizdan oʻrganinglar. Bir ustozni boshqasidan ustun qoʻymang.

⁷Kim sizlarga shunday huquq berib qoʻygan?! Xudodan olmagan biror narsangiz bormi?! Bor narsangizni sizga Xudo bergan — ku, nima uchun xuddi oʻz kuchingiz bilan erishganday maqtanib yuribsiz?

⁸Xohlagan hamma narsangizga erishib oldingizmi?! Boy boʻlib ketdingizmi?! Bizsiz hukmronlik qilyapsizmi?! Qani, endi haqiqatan ham hukmronlik qilayotgan boʻlsangiz edi, biz ham sizlar bilan birga hukmronlik qilsak.

⁹Lekin men oʻylaymanki, Xudo biz — havoriylarni sharmandali ahvolga solib, maydonda namoyish qilinadigan, oʻlimga mahkum etilgan asirlarday qilib qoʻydi. Biz farishtalaru insonlar oldida, butun koinot oldida tomosha boʻlib qoldik.

¹⁰Biz Masih haqi aqlsiz boʻlibmiz, sizlar esa Masih soyasida aqlli boʻlib qolibsizlar. Biz zaif, sizlar esa kuchli ekansiz! Sizlar obroʻ — e’tiborli, biz esa sharmanda ekanmiz — da!

¹¹Hozirgacha och — yalangʻochmiz, tashnalik va kaltaklarga bardosh beryapmiz, sarson — sargardon boʻlib yuribmiz.

¹²Oʻz mehnatimiz bilan kun koʻryapmiz. Bizni haqorat qilsalar, duo qilamiz, quvgʻin qilsalar, chidaymiz.

¹³Bizni gʻiybat qilsalar, yaxshilik bilan javob beramiz. Hozirgacha biz dunyoning supurindisi, hammaning axlatiday boʻlib yuribmiz.

¹⁴Men bularni sizlarni xijolatda qoldirmoq uchun emas, balki sevimli bolalarimga nasihat qilganday, sizlarga nasihat qilib yozyapman.

¹⁵Masihning yoʻlida minglab odamlar sizlarga ustozlik qilsa ham, sizlarning faqatgina bir ruhiy otangiz bor. Men sizlarga Xushxabarni yetkazib, Iso Masih orqali sizlarning ruhiy otangiz boʻldim.

¹⁶Shuning uchun sizlarga yolvoraman, mendan oʻrnak olinglar[19].

¹⁷Ana shu maqsadda men Rabbimiz Isoga sodiq boʻlgan sevimli oʻgʻlim Timoʻtiyni[20] sizlarning oldingizga yuboryapman. Har yerda va har bir imonlilar jamoatida ta’lim berar ekanman, Iso Masihga tegishli boʻlib, qanday hayot kechirayotganimni u sizlarga aytib beradi.

¹⁸Orangizda ba’zilar: “Pavlus kelmas ekan”, deb kekkayib, bilganini qilayotgan ekan.

¹⁹Ammo Rabbimiz Iso xohlasa, men yaqin orada oldingizga boraman. Shunda nafaqat bu takabbur odamlar qanday gaplar gapirayotganlarini, balki ularda qanday kuch borligini sinab koʻraman.

²⁰Chunki Xudoning Shohligi quruq soʻzlar bilan emas, balki kuch — qudrat bilan namoyish etiladi.

²¹Xoʻp, nima xohlaysizlar? Oldingizga kaltak bilan boraymi yoki mehr — muhabbat va muloyimlik ruhi bilan boraymi?