Read Uzbek Muqaddas Kitob 1 Korinfliklar 6 Bible Online

1 Korinfliklar 6 - Uzbek Muqaddas Kitob bible

1 Korinfliklar 6

¹Orangizda bittasining boshqa birovga da’vosi bor ekan. Bu da’voni hal qilib bersin deb, u kishi Xudoning azizlari oldiga emas, balki imonsizlar oldiga borishga qanday jur’at qilyapti?

²Xudoning azizlari hatto dunyoni hukm qilishini nahotki sizlar bilmasangiz?! Modomiki, sizlar dunyoni hukm qilar ekansiz, nahotki ahamiyatsiz ikir — chikir ishlarni hukm qila olmasangiz?

³Biz hatto farishtalarni ham hukm qilamiz — ku! Shuni bilmaysizlarmi?! Shunday ekan, turmush ikir — chikirlari nima boʻlibdi?!

⁴Nima uchun endi bir — biringizga da’voingiz boʻlsa, jamoatga daxli boʻlmagan hakamlarning oldiga boryapsiz?!

⁵Nahotki orangizda oʻz birodarlarining da’vosini ajrim qila oladigan birorta dono odam topilmasa?! Uyalmaysizlarmi, axir?!

⁶Imonli birodar yana boshqa bir imonli birodari bilan da’volashmoqda, qolaversa buni imonsiz hakamlarning oldida qilyapti — ya!

⁷Undan koʻra, haqsizlikka chidab turganingiz sizlar uchun yaxshiroq boʻlmasmidi? Hatto hiyla — nayranglardan zarar koʻrish sizlar uchun afzalroq boʻlmasmidi? Bir — biringiz bilan da’volashishning oʻzi sizlar uchun tamoman magʻlubiyat — ku!

⁸Shunisi yetmaganday, sizlar hiyla — nayranglar bilan oʻz birodaringizga nohaqlik qilyapsizlar.

⁹Nahotki bilmasangizlar?! Nohaqlik qiluvchilar Xudoning Shohligidan bahramand boʻlmaydilar — ku! Adashmanglar, jinsiy tomondan axloqsiz boʻlganlar, butparastlar, zinokorlar, bachchabozlaru bachchalar,

¹⁰oʻgʻrilar, tamagirlar, mayxoʻrlar, gʻiybatchilar va tovlamachilar Xudoning Shohligidan bahramand boʻlmaydilar.

¹¹Ba’zilaringiz oldin shunday edingiz. Endi esa sizlar Rabbimiz Iso Masihning nomi bilan va Xudoning Ruhi orqali poklandingiz, Xudoga bagʻishlandingiz, oqlandingiz.

¹²Ba’zilaringiz: “Xohlaganimni qilishga haqim bor”, deb aytyapsizlar. Toʻgʻri, lekin hamma narsa ham foydali emas. Xohlaganimizni qilishga haqimiz bor, lekin hech bir narsa bizning ustimizdan hokimlik qilmasligi kerak.

¹³Ba’zilaringiz yana: “Ovqat qorin uchun, qorin esa ovqat uchun, Xudo ikkalasini ham yoʻq qiladi — ku”[25], deb aytyapsizlar. Toʻgʻri, ammo badanimiz zino uchun xizmat qilmasligi kerak, aksincha, badanimiz bilan Rabbimiz Isoga xizmat qilishimiz kerak. Rabbimiz badanimiz ustidan hokimlik qilishi kerak.

¹⁴Rabbimizni tiriltirgan Xudo Oʻz qudrati bilan bizlarni ham tiriltiradi.

¹⁵Bilmaysizlarmi, axir?! A’zoyi badaningiz Masih tanasining a’zosi — ku! Shunday ekan, men Masih tanasining a’zolarini olib, fohisha tanasining a’zolari qilib qoʻyarmikanman? Yoʻq, aslo!

¹⁶Fohisha bilan qovushgan u bilan bir tan boʻlishini bilmaysizlarmi?! Muqaddas bitiklarda: “Ikkalasi bir tan boʻladilar”[26], deb yozilgan — ku!

¹⁷Rabbimiz Iso bilan birga boʻlgan esa U bilan bir ruhda boʻladi.

¹⁸Jinsiy axloqsizlikdan oʻzingizni olib qochinglar! Jinsiy axloqsizlik bilan gunoh qilgan oʻz tanasiga qarshi gunoh qilgan boʻladi, qolgan hamma gunohlar esa tanaga bevosita bogʻlanmagan holda qilinadi.

¹⁹Nahot bilmasangiz?! Qalbingizda maskan qilgan Muqaddas Ruhni Xudo sizlarga bergan. Tanangiz Muqaddas Ruhning ma’badidir. Sizlar oʻzlaringizga tegishli emassizlar.

²⁰Sizlar qimmat bahoga sotib olingansizlar. Shuning uchun oʻz tanangiz bilan Xudoni ulugʻlanglar[27].