Read Uzbek Muqaddas Kitob 1 Korinfliklar 8 Bible Online

1 Korinfliklar 8 - Uzbek Muqaddas Kitob bible

1 Korinfliklar 8

¹Butga keltirilgan qurbonlik goʻshti[35] masalasiga kelsak. Oʻzingiz aytganingizdek, hammamiz bu haqdagi haqiqatni bilamiz. Ammo bilim odamni shishintiradi, mehr — muhabbatli inson esa oʻzgalarning manfaatini koʻzda tutadi.

²Agar bir kishi bilimliman deb oʻylasa, u hali zarur boʻlgan bilimga erishmagan.

³Kim Xudoni yaxshi koʻrsa, Xudo uni tanib — biladi.

⁴Endi butga keltirilgan qurbonlik goʻshtini yeyish masalasiga kelsak, biz shuni bilamizki, dunyoda but hech narsa emas, birgina Xudodan boshqa Xudo yoʻq.

⁵Garchi yeru koʻkda xudo deb atalgan narsalar koʻp boʻlsa — da (haqiqatan, bunaqa “xudolar” va “rabbiylar” juda koʻp),

⁶biz uchun birgina Otamiz Xudo bor. U butun mavjudotning Yaratuvchisidir va biz U uchun yashaymiz. Shuningdek, birgina Rabbimiz Iso Masih bor. Butun mavjudot Masih orqali vujudga kelgan va biz U orqali yashaymiz.

⁷Ammo hamma ham bularni bilmaydi. Orangizda ba’zilar “butlar bor” degan fikrga shunchalik oʻrganib qolganki, butlarga keltirilgan qurbonlik goʻshtini yeganda ularning vijdoni qiynaladi, chunki ular bunday goʻsht yeyishni hali ham butlarga sajda qilish deb biladi.

⁸Oziq — ovqat bizni Xudoga yaqinlashtira olmaydi. Axir, yemasak ham biror narsa yoʻqotmaymiz, yesak ham biror foyda koʻrmaymiz.

⁹Faqat ehtiyot boʻling, sizlarning bu erkinligingiz zaiflarning vasvasaga tushishiga sabab boʻlmasin.

¹⁰Masalan, sen bilimli odam, butxonada taom yeb oʻtiribsan, deylik. Bu masalada ikkilanib turgan birodaring seni koʻrib qoladi. Bundan keyin u butga keltirilgan qurbonlik goʻshtidan yeyishga moyil boʻlmaydimi?!

¹¹Oʻsha zaif birodaring uchun Masih oʻlgan, sen esa uni oʻz biliming tufayli halokatga yoʻliqtirasan.

¹²Shunday qilib, ikkilanib turgan birodaringni vasvasaga solib, unga qarshi gunoh qilsang, Masihga qarshi gunoh qilgan boʻlasan.

¹³Agar biror ovqatni yeyishim birodarimning gunoh qilishiga sabab boʻlsa, uni vasvasaga solmaslik uchun endi men umrbod oʻsha ovqatni yemayman.