Read Uzbek Muqaddas Kitob 1 Korinfliklar 9 Bible Online

1 Korinfliklar 9 - Uzbek Muqaddas Kitob bible

1 Korinfliklar 9

¹Men ozod emasmanmi?! Men havoriy emasmanmi?! Rabbimiz Isoni koʻrmaganmanmi?! Rabbimiz yoʻlida qilgan mehnatimning mahsuli sizlar emasmi?!

²Agar boshqalar uchun havoriy boʻlmasam ham, hech boʻlmasa sizlar uchun havoriydirman. Axir, sizlar Rabbimizga tegishli boʻlganingiz uchun havoriyligimning muhrisizlar.

³Meni tanqid qilayotganlar oldida quyidagilar bilan oʻzimni oqlayman.

⁴Nahotki Rabbimiz yoʻlida qilgan xizmatimiz uchun tekin yeb — ichishga huquqimiz boʻlmasa?!

⁵Nima, boshqa havoriylar kabi, Rabbimiz Isoning ukalari[36] va Butrusga[37] oʻxshab, imonli bir ayolga uylanib, uni yonimizda olib yurishga haqimiz yoʻqmi?!

⁶Yoki faqatgina men bilan Barnabo kun kechirish uchun oʻz qoʻlimiz bilan mehnat qilishimiz kerakmi?!

⁷Kim oʻz hisobidan askarlik qiladi?! Kim tok oʻtqazib, uning mevasini yemaydi?! Kim poda boqib, podaning sutini ichmaydi?!

⁸Bularni faqatgina insoniy nuqtayi nazardan aytayotganim yoʻq! Musoning qonuni ham xuddi shunday buyuradi — ku!

⁹Unda: “Gʻalla yanchayotgan hoʻkizning ogʻzini toʻsmang”[38], deb yozilgan — ku. Nima, Xudo hoʻkizlar haqida qaygʻuryaptimi?!

¹⁰Yoʻq, Xudo buni bizning manfaatimiz uchun aytgan. Ha, bular biz uchun yozilgan. Shudgor qiluvchi ham, gʻalla yanchuvchi ham oʻz haqini olish umidi bilan ishlaydi — ku.

¹¹Biz ruhiy jihatdan sizlarga xizmat koʻrsatsak — da, moddiy yordamingizni bizga koʻp koʻrasizmi?

¹²Boshqalar sizlarning yordamingizdan bahramand boʻlayotgan ekan, bizning haqimiz ularnikidan ham koʻproq emasmi?! Lekin biz bu huquqimizdan foydalanmadik. Aksincha, Masihning Xushxabariga toʻsiq boʻlmaylik deb, har narsaga chidab yuribmiz.

¹³Bilmaysizlarmi, Ma’badda xizmat qiluvchi ruhoniylar[39] Ma’baddan ovqat olib yeydilar. Qurbongohda xizmat qiluvchilar keltiriladigan qurbonliklardan ulush oladilar.

¹⁴Shuningdek, Rabbimiz Isoning Oʻzi buyurgani boʻyicha[40], Xushxabar yoyish vazifasini boʻyniga olganlar bu ishi orqali kun kechira olishlari kerak.

¹⁵Ammo men bu huquqlarimdan foydalanmadim va bundan faxrlanaman. Bu xatni oʻsha huquqimdan foydalanay, deb ham yozayotganim yoʻq. Menga faxrlanish huquqini berayotgan sababni yoʻqotishdan koʻra, oʻlganim yaxshiroqdir.

¹⁶Men Xushxabarni aytar ekanman, bu bilan maqtanishga haqim yoʻq, chunki bu zimmamdagi vazifamdir. Ammo Xushxabarni yoymasam, mening holimga voy!

¹⁷Men buni oʻz tashabbusim bilan qilayotgan boʻlsam, mukofotga loyiq boʻlardim. Lekin mukofotga loyiq emasman, chunki bor — yoʻgʻi zimmamdagi vazifani bajaryapman, bu ishni qilishdan boshqa ilojim yoʻq.

¹⁸U holda mening mukofotim nima? Mukofotim shundaki, men Xushxabarni yoyganimda, hech kimdan biron narsa soʻramayman. Shuning uchun Xushxabarni yoyish menga ba’zi bir huquqlarni bersa — da, ulardan foydalanmayman.

¹⁹Men qul emas, erkin inson boʻlsam — da, hammaga qulday xizmat qildim. Yanada koʻproq odam Isoning shogirdi boʻlsin deb, shunday qildim.

²⁰Oʻsha maqsadimni koʻzda tutib, yahudiylar uchun yahudiyday boʻldim, Musoning qonuniga tobe boʻlmasam — da, bu qonunga tobe boʻlganlar orasida xuddi ularday yashadim.

²¹Musoning qonunini bilmaganlar orasida boʻlganimda, ular ham Isoning shogirdlari boʻlsin deb, xuddi shularday yashadim. Toʻgʻri, men Xudoning qonunidan ozod emasman, Masihning amrlariga tobeman.

²²Zaif insonlar ham Isoni tanisinlar deb, ularning orasida boʻlganimda zaif insonday boʻldim. Hech boʻlmasa ba’zilarni qay yoʻl bilan boʻlsa — da, qutqaray deb, hammaga hamma narsa boʻldim.

²³Men bularning hammasini Xushxabarni yoyish niyatida qilyapman, toki Xushxabar keltiradigan qut — barakalardan bahramand boʻlay.

²⁴Bilasizlar — ku, musobaqada koʻpgina yuguruvchilar qatnashadi, ammo faqat bir kishi gʻolib kelib, mukofot oladi. Sizlar ham shunday yuguringki, mukofotni qoʻlga kiritinglar.

²⁵Axir, musobaqada qatnashadigan odam oʻz nafsini tiyib, tartib — intizom bilan mashq qiladi — ku! Ular soʻlib qoladigan gul toj olish uchun, biz esa boqiy toj olish uchun harakat qilamiz.

²⁶Shuning uchun men maqsadsiz yugurmayman, kurashganimda zarbalarim aniq boʻladi.

²⁷Tanamni chiniqtirib, uni oʻz ixtiyorimga boʻysundiraman, toki boshqalarga Xushxabarni va’z qilib turib, oʻzim mukofotga noloyiq boʻlib qolmayin.