Read Uzbek Muqaddas Kitob 2 Korinfliklar 1 Bible Online

2 Korinfliklar 1 - Uzbek Muqaddas Kitob bible

2 Korinfliklar 1

¹Xudoning irodasi bilan Iso Masihning havoriysi boʻlgan men — Pavlusdan va birodarimiz Timoʻtiydan[1] Xudoning Korinf shahridagi jamoatiga hamda Axaya viloyatidagi[2] barcha Xudoning azizlariga salom!

²Otamiz Xudo va Rabbimiz Iso Masih sizlarga inoyatu tinchlik ato qilsin.

³Rabbimiz Iso Masihning Otasi Xudoga, har turli tasallining manbayi boʻlgan Xudo — marhamatli Otaga hamdu sanolar boʻlsin!

⁴Har xil azob — uqubatlarga uchraganimizda, Xudo bizga tasalli beradi. Shunday ekan, biz ham azob chekayotgan insonga tasalli bera olamiz. Xudo bizga bergan tasalli bilan uni ovuntira olamiz.

⁵Masihga oʻxshab biz qanchalik koʻp azob cheksak, Xudo bizga Masih orqali shunchalik koʻp tasalli beradi.

⁶Biz azob — uqubatlarga duchor boʻlayotgan ekanmiz, sizlar tasalli va najot topishingiz uchundir. Biz tasalli topayotgan boʻlsak, bu ham sizlar tasalli topishingiz uchundir, toki sizlar ham bizga oʻxshab azob — uqubatlarga uchraganingizda bardosh bera oling.

⁷Sizlar nafaqat azob — uqubatlarimizga, balki tasallimizga ham sherik boʻlishingizga hech shubhamiz yoʻq.

⁸Ey birodarlar, biz shuni istar edikki, sizlar Asiya viloyatidagi biz chekkan azoblardan bexabar qolmanglar. Biz haddan tashqari, chidab boʻlmas darajada azob — uqubat tortdik, hatto tirik qolishdan ham umidimizni uzgan edik.

⁹Oʻlim muqarrar ekanligiga amin boʻlgan edik. Bularning hammasi bizning oʻzimizga emas, balki oʻliklarni tiriltiradigan Xudoga umid bogʻlashimiz uchun sodir boʻldi.

¹⁰Haqiqatan ham Xudo bizni shunday ogʻir oʻlim tahlikasidan qutqardi va yana qutqaradi ham. Ha, Xudo bizni yana qutqaradi, deb Undan qattiq umid qilamiz.

¹¹Sizlar ham ibodatlaringiz orqali bizning faoliyatimizga sherik boʻlyapsizlar. Buni koʻrib, koʻpchilik biz uchun Xudoga shukr aytadi, chunki ularning biz uchun qilgan iltijolari natijasida Xudo bizga iltifot koʻrsatdi.

¹²Vijdonimiz guvohlik berib turibdi, biz bu dunyoda, ayniqsa sizlar bilan boʻlgan munosabatimizda Xudo ato qilgan soddalik va samimiylik bilan ish tutdik. Biz dunyoviy donolikka emas, balki Xudoning inoyatiga tayanib harakat qildik. Faxrlanishimizning sababi ana oʻshadir.

¹³Sizlar oʻqib, tushuna oladiganlardan boshqa hech narsa yozmaymiz. Sizlar hozir bizni qisman boʻlsa — da, tushunasizlar. Umid qilamanki, bir kun kelib, sizlar quyidagini toʻla anglab olasiz: biz sizlardan qanday faxrlansak, sizlar ham Rabbimiz Iso keladigan kunda bizdan shunday faxrlana olasizlar.

¹⁵Yuqorida aytib oʻtganlarimning toʻgʻriligiga ishonganim uchun meni ikki marta koʻrib, xursand boʻlib qolinglar degan niyatda sizlarning oldingizga bormoqchi edim.

¹⁶Makedoniyaga borayotganimda sizlarning oldingizga kirib oʻtish, qaytishda ham sizlarni koʻrib ketish niyatim bor edi[3]. Shunday qilib, Yahudiyaga[4] ketishimda yoʻlda uchrashi mumkin boʻlgan ehtiyojlarimni qondirib, kuzatib qoʻyardingizlar.

¹⁷Shunday rejalarim bor edi. Oʻsha rejalar amalga oshmasa, yengiltaklik bilan ish tutgan boʻlamanmi?! Yoki men reja qilayotgan paytda goh “ha”, goh “yoʻq” deydigan, betayin odamga oʻxshaymanmi?!

¹⁸Xudo ishonchlidir, shuning uchun sizlarga yetkazgan xabarimiz ham hech oʻzgarmaydi.

¹⁹Silas[5], Timoʻtiy va men sizlarga Xudoning Oʻgʻli — Iso Masih haqida aytganmiz. Iso Masih oʻzgaruvchan emas. U doimo sadoqatlidir.

²⁰Iso Masih orqali Xudo Oʻz va’dalarini bajaradi, shuning uchun biz ham Iso Masih orqali Xudoni ulugʻlab, “Omin, iloyim shunday boʻlsin”, deymiz.

²¹Xudoning Oʻzi bizni ham, sizlarni ham Iso Masihga boʻlgan imonimizda mustahkam qiladi. U bizni Oʻzi uchun tanlab oldi.

²²Bizga Oʻz muhrini bosib, kelajakdagi qut — barakalarning kafili sifatida Muqaddas Ruhni berdi.

²³Xudo shohid, oʻz jonim haqi aytyapman, sizlarni ayaganim uchun hanuz Korinfga bormadim.

²⁴Biz sizlarning imoningiz ustidan hukmdormiz, demoqchi emasman, chunki sizlar imonda mahkam turibsizlar. Xizmat qilishimizdan maqsad quvonchingizni koʻpaytirishdir.