Read Uzbek Muqaddas Kitob 2 Korinfliklar 4 Bible Online

2 Korinfliklar 4 - Uzbek Muqaddas Kitob bible

2 Korinfliklar 4

¹Biz Xudoning marhamati bilan yangi ahdning xizmatkorlari boʻlganimiz uchun tushkunlikka tushmaymiz.

²Aksincha, sirli va uyatli ishlar qilishdan, makr — hiyla ishlatishdan bosh tortib, Xudoning kalomini buzmay gapiramiz. Haqiqatni ochiq — oydin aytib, Xudoning huzurida oʻzimizni boshqa odamlarning hukmiga topshiramiz.

³Xushxabarimiz sirli, toʻsiq parda ortida turganday boʻlib tuyulsa, u halok boʻladiganlar uchun shunday tuyuladi.

⁴Bu dunyoning xudosi[19] imonsizlarning ongini koʻr qilib qoʻygan. Shuning uchun ular Xushxabarning nurini koʻra olmaydilar. Bu Xushxabar Xudoning aniq tasviri boʻlgan Masihning ulugʻvorligini koʻrsatadi.

⁵Biz oʻzimiz haqimizda emas, Rabbimiz Iso Masih haqida va’z qilamiz. Isoning yoʻlida sizlarning xizmatkorlaringizmiz.

⁶Xudo dunyoni yaratganda Oʻz soʻzi bilan zulmatdan nur yaratgan edi[20]. Endi U Oʻzining nuri bilan bizning yuraklarimizni ham yoritdi, Iso Masih siymosida porlab turgan Oʻz ulugʻvorligini bizga koʻrsatdi.

⁷Shunday ajoyib xazinani sopol idishlarday boʻlgan tanalarimizda olib yuribmiz. Shu orqali oliy qudrat bizga emas, Xudoga mansub ekanligi koʻrinib turibdi.

⁸Biz har tomonlama jabrlanib ezilamiz, ammo sinmaymiz. Koʻnglimiz alagʻda boʻlib, mushkul ahvolga tushsak ham umidimizni yoʻqotmaymiz.

⁹Quvgʻinlarga uchraymiz, lekin Xudo hech qachon bizni tashlab ketmaydi. Bizni yerga yiqitadilar, ammo yakson qila olmaydilar.

¹⁰Iso Masih oʻlimga roʻbaroʻ boʻlganidek, biz ham azob — uqubat tortib, oʻlim tahlikasida yashayapmiz, toki Isoning hayoti bizning tanamizda namoyon boʻlsin.

¹¹Iso Masihga tegishli boʻlganimiz uchun biz doim oʻlimga duchor boʻlyapmiz, toki Isoning hayoti bizning foniy badanimizda namoyon boʻlsin.

¹²Shunday qilib, oʻlim xavfi ostida yashashimiz sizlarga abadiy hayot keltiradi[21].

¹³Muqaddas bitiklarda: “Ishonganim uchun gapirdim”[22], deb yozilgan. Bizda ham shunday imon bor, shuning uchun Xushxabar aytishni davom ettiraveramiz.

¹⁴Bilamizki, Rabbimiz Isoni tiriltirgan Xudo bizni ham Isoga oʻxshatib tiriltiradi va sizlar bilan birga Oʻzining huzuriga olib kiradi.

¹⁵Boshimizdan oʻtganlarning hammasi sizlarning manfaatingiz uchun yuz bergan. Xudoning inoyati koʻpdan — koʻp odamlar orasida yoyilar ekan, Xudoga yanada koʻp odamlar shukur aytadi va bundan Unga yanada koʻproq shon — shuhrat keladi.

¹⁶Shuning uchun ham umidimizni yoʻqotmaymiz. Toʻgʻri, bu foniy badanimiz xazon boʻlyapti, ammo biz ruhan yangilanib boryapmiz.

¹⁷Bizning oʻtkinchi, yengil azob — uqubatlarimiz bizga haddan tashqari ajoyib va abadiy ulugʻvorlik keltiradi.

¹⁸Axir, biz koʻrinadigan narsalarga emas, balki koʻrinmaydigan narsalarga koʻz tikkanmiz. Koʻrinadigan narsalar oʻtib ketadi, koʻrinmaydiganlari esa mangudir!