Read Uzbek Muqaddas Kitob 2 Korinfliklar 9 Bible Online

2 Korinfliklar 9 - Uzbek Muqaddas Kitob bible

2 Korinfliklar 9

¹Sizlarga Xudoning Quddusdagi azizlari uchun beriladigan yordam[43] haqida yozishimga hech hojat yoʻq.

²Axir, bilaman — ku, sizlar yordam berishga tayyorsizlar, shuning uchun ham “Axaya[44] hududidagi imonlilar oʻtgan yildan beri tayyor”, deb Makedoniyadagi[45] imonlilarga sizlarni maqtab yuribman. Sizlarning saxiylik bilan berayotgan xayr — ehsonlaringiz ularni ham saxiylikka undadi.

³Endi oʻsha maqtanganlarim bekor emasligini koʻrsatish uchun hamda men aytganimday tayyor boʻlib turishingiz uchun birodarlarni sizlarning oldingizga yuboryapman[46].

⁴Yana Makedoniyaliklardan ba’zilari men bilan birga borsa — yu, sizlar tayyor boʻlmasangiz, sizlarga qattiq ishongan biz uyatga qolamiz, sizlar esa bizdan battar uyalib qolasiz.

⁵Shu sababdan va’da qilgan hadyangizni oldindan tayyorlab qoʻyinglar deb, oʻzim bormasimdan avval sizlarning oldingizga birodarlarni yuborishni lozim koʻrdim. Shunda sizlarning hadyangiz norozilik bilan emas, sidqidildan berilgan hadya boʻladi.

⁶Shuni unutmangki, oz ekkan oz oʻrib oladi, moʻl ekkan esa moʻl oʻrib oladi.

⁷Har kim norozi boʻlib yoki majburiyat bilan emas, balki koʻnglida niyat etganini bersin. Axir, Xudo mamnuniyat bilan beradigan insonni yaxshi koʻradi.

⁸Xudo sizlarning hayotingizni har jihatdan inoyatga toʻldirib — toshtirishga qodirdir. Shunda har doim, har jihatdan, hamma ehtiyojingiz qondiriladi va sizlar yanada koʻproq har xil xayrli ishlar qilasizlar.

⁹Muqaddas bitiklarda quyidagicha yozilgan: “Boyligini muhtojlarga saxiylik ila taqsimlaydi, Uning solihligi to abad davom etadi.”[47]

¹⁰Dehqonga ekish uchun urugʻ, hammaga yeyish uchun non beradigan Xudo sizlarning ekadigan urugʻingizni moʻl qiladi, solihligingizdan keladigan hosilni ham koʻpaytiradi.

¹¹Har doim saxiy boʻlishingiz uchun Xudo sizni har jihatdan boy qiladi. Shunday qilib, biz sizlarning hadyalaringizni muhtojlarga yetkazganimizda, ular Xudoga koʻp shukronalar aytadi.

¹²Mana shu hadyangiz bilan koʻrsatgan yordamingiz nafaqat Xudoning Quddusdagi azizlarining ehtiyojlarini qondiradi, balki koʻpchilikning Xudoga koʻpdan — koʻp shukrona aytishiga sabab boʻladi.

¹³Ularga hamda boshqalarga koʻrsatgan saxiyligingiz va Masihning Xushxabariga ishonib, itoatkorona yashayotganingiz tufayli koʻpchilik Xudoni ulugʻlaydi. Axir, hadyangiz bularning dalolati — ku!

¹⁴Xudoning sizlarga koʻrsatgan cheksiz inoyati sababli ular mehr — muhabbat bilan sizlar uchun ibodat qiladilar.

¹⁵Ta’rifiga til ojiz boʻlgan ajoyib hadyasi uchun Xudoga shukur!