Read Uzbek Muqaddas Kitob Galatiyaliklar 3 Bible Online

Galatiyaliklar 3 - Uzbek Muqaddas Kitob bible

Galatiyaliklar 3

¹Ey befahm Galatiyaliklar! Kim sizlarni sehrlab qoʻydi?[19] Axir, Iso Masihning xochga mixlangani koʻz oʻngingizda aniq tasvir etilmaganmidi?!

²Sizlardan faqatgina bir narsani soʻrab bilmoqchiman! Xoʻsh, sizlar Ruhni qanday qilib oldingizlar: qonunga[20] amal qilish orqalimi yoki eshitganlaringizga ishonish orqalimi?

³Sizlar shunchalik befahmmisizlar? Ruh qudrati bilan yangi hayot boshlagan ekansiz, endi uni oʻz insoniy kuchingiz bilan kamolga yetkazmoqchimisiz?

⁴Tatib koʻrganlaringizning hammasi behuda ketdimi? Nahotki rostdan ham behuda ketgan boʻlsa?!

⁵Xudo sizlarga Oʻz Ruhini ato etib, orangizda moʻjizalar yaratmoqda. Nima deb oʻylaysiz: U buni qonunga amal qilganingiz uchun qilyaptimi yoki eshitganlaringizga ishonganingiz uchunmi?!

⁶Muqaddas bitiklarda Ibrohim haqida shunday yozilgan: “U Xudoga ishondi, mana shu ishonchi uchun Xudo uni solih deb bildi.”[21]

⁷Shundan bilinglarki, kim imonli boʻlsa, oʻsha inson Ibrohimning avlodi deb hisoblanadi.

⁸Xudo dastavval Ibrohimga: “Barcha xalqlar sen orqali baraka topadilar”[22], deb Xushxabar keltirgan. Muqaddas bitiklardagi bu soʻzlar shuni koʻrsatadiki, Xudo gʻayriyahudiylarni imon orqali oqlaydi.

⁹Shuning uchun kim imonli boʻlsa, Xudoga ishongan Ibrohim qatori Xudoning barakasidan bahramand boʻladi.

¹⁰Qonunga amal qilish orqali Xudoni mamnun qilmoqchi boʻlganlarning hammasi la’nat ostidadir. Axir, Muqaddas bitiklarda: “Qonun kitobidagi amrlarning hammasini toʻliq bajarmaganlar la’nat ostidadir!”[23] deb yozilgan — ku!

¹¹Shunday ekan, koʻrinib turibdiki, qonunga amal qilish bilan hech kim oʻzini Xudo oldida oqlay olmaydi, zotan, solih inson imon tufayli hayotga ega boʻladi[24].

¹²Qonunni bajarish imonga asoslanmagan, qonunda faqatgina amrlarning hammasini bajarganlarga hayot va’da qilingan[25].

¹³Masih esa bizni qonun la’natidan xalos qildi. U xochga mixlanganda bizning oʻrnimizga la’natlandi. Axir, Muqaddas bitiklarda: “Yogʻochga qoqilgan har bir kishi la’natidir”[26], deb yozilgan — ku!

¹⁴Shu yoʻsin gʻayriyahudiylar ham Iso Masih orqali Xudoning Ibrohimga va’da qilgan barakalaridan bahramand boʻladilar, biz ham imon orqali Xudo va’da qilgan Ruhni olamiz.

¹⁵Birodarlar! Hayotdan bir misol keltiray: odamning vasiyati tasdiqlangandan keyin uni hech kim bekor qilolmaydi va unga hech narsa qoʻsholmaydi.

¹⁶Endi esa Xudoning Ibrohimga va uning zurriyotiga bergan va’dalariga qaraylik. Muqaddas bitiklarda Ibrohimga: “Sening zurriyotlaringga[27]”, deb aytilmagan, aksincha, “Sening zurriyotingga”[28], deb aytilgan. Bundan koʻrinib turibdiki, va’dada koʻpchilik emas, balki bir Kishi, ya’ni Masih nazarda tutilgan.

¹⁷Shuni aytmoqchimanki, Xudo Ibrohim bilan ahd tuzgandan soʻng 430 yil[29] oʻtgach, qonun berildi. Ammo tasdiqlangan ahdni qonun kuchdan qoldirmadi, demak, Xudoning va’dasini bekor qilmadi.

¹⁸Agar Xudoning in’omi insonlarning qonunga amal qilishiga koʻra, beriladigan boʻlsa, demak, va’daga koʻra, berilmaydi. Ibrohimga esa Xudo Oʻz in’omini va’da boʻyicha berdi.

¹⁹Unday holda qonun nima uchun berilgan? Qonun gunohkorligimizni koʻrsatish uchun berilgan. Ibrohimning va’da qilingan Zurriyoti[30] kelmaguncha, bu qonun joriy boʻlishi kerak edi. Qonun farishtalar tomonidan[31], bir vositachi[32] orqali xalqqa berildi.

²⁰Vaholanki, odam bir oʻzi ish qilganda, vositachi kerak boʻlmaydi. Tanho boʻlgan Xudo esa va’da berganda hech bir vositachisiz beradi.

²¹Xoʻsh, qonun Xudoning va’dalariga zidmi? Aslo! Agar abadiy hayot ato qilishga qodir bir qonun berilgan boʻlsa edi, unda shubhasiz qonunga amal qilish bilan oqlansa boʻlar edi.

²²Ammo Muqaddas bitiklarga koʻra, butun borliq gunohning tutqunidir[33]. Shuning uchun va’da faqat Iso Masihga ishonish orqali roʻyobga chiqadi va imonlilarga nasib boʻladi.

²³Imon yoʻli ayon boʻlishidan avval, biz qonun nazorati ostidagi tutqunlar edik. Oʻsha imon ayon boʻlishini kutayotgan edik.

²⁴Boshqacha aytganda, qonun Masihga boshlovchi murabbiyimiz edi. Endi esa biz Masihga boʻlgan imon orqali oqlanamiz.

²⁵Imon yoʻli ayon boʻlgan ekan, biz endi murabbiyning tarbiyasida emasmiz.

²⁶Endi sizlar Iso Masihga boʻlgan imoningiz orqali Xudoning farzandisizlar.

²⁷Sizlar suvda choʻmdirilib, Masih bilan birlashdingiz. Har biringiz Masihga burkanib oldingiz.

²⁸Endi na yahudiy, na yunon[34] bor, na qul, na ozod bor, na erkak, na ayol bor. Sizlar Iso Masihga tegishli boʻlganingiz uchun hammangiz birsizlar.

²⁹Sizlar Masihniki ekansizlar, demak Ibrohimning ham zurriyotisizlar, berilgan va’daning barakalaridan bahramand boʻlasizlar.