Read Uzbek Muqaddas Kitob Galatiyaliklar 4 Bible Online

Galatiyaliklar 4 - Uzbek Muqaddas Kitob bible

Galatiyaliklar 4

¹Men bunday demoqchiman: merosxoʻr hali yosh bola ekan, garchi u butun mulkning egasi boʻlsa ham, quldan hech farq qilmaydi.

²U otasi belgilagan fursatgacha vasiyga va uy — roʻzgʻorni boshqaruvchi xizmatkorga boʻysunadi.

³Xuddi shu singari, bizlar ham oldin bolalarday boʻlib, xurofot kuchlariga[35] qul edik.

⁴Muddat bitgandan keyin, Xudo Oʻz Oʻgʻlini yubordi. Uning Oʻgʻli qonun[36] ostidagi hayot uchun ayoldan tugʻildi.

⁵Xudoning Oʻz Oʻgʻlini yuborishdan maqsadi bizni qonun ostidagi hayotdan xalos etib, Oʻziga farzand qilib olish edi.

⁶Biz Xudoning farzandlari ekanligimizni koʻrsatish uchun U yuragimizga Oʻz Oʻgʻlining Ruhini yubordi. Bu Ruh orqali biz Xudoni “Otajon”[37] deb chaqiramiz.

⁷Demak, endi siz qul emas, balki farzandsiz. Farzand ekansiz, Xudoning sharofati bilan U Oʻz farzandlariga atagan qut — barakalarga ega boʻlasiz.

⁸Oldin sizlar Xudoni bilmagan paytingizda, asli xudolar boʻlmagan kuchlarga qul edingiz.

⁹Endi esa Xudoni bilasizlar, toʻgʻrirogʻi, Xudo sizlarni biladi. Shunday ekan, qanday qilib yana oʻsha kuchsiz, qadrsiz xurofotlarga qaytyapsiz?! Qanday qilib yana oʻshalarga qul boʻlishni xohlayapsiz?!

¹⁰Sizlar belgilangan alohida kunlar, oylar, yillarga rioya qilib, diniy marosimlar oʻtkazyapsiz!

¹¹Sizlar uchun qaygʻuryapman! Nahotki sizlarni deb chekkan zahmatlarim bekor ketgan boʻlsa?!

¹²Ey birodarlar, sizlardan iltimos qilaman, menga oʻxshagan boʻlinglar, chunki men ham sizlarga oʻxshab qonun ostidagi hayotdan ozodman. Sizlar menga hech ham ozor bermagansiz.

¹³Oʻzingiz bilasiz, men sizlarga birinchi marta Xushxabar aytganimda, jisman ojiz edim.

¹⁴Ojizligim tufayli sizlarga ogʻirligim tushgan boʻlsa ham, mendan nafratlanmadingiz, meni rad etmadingiz. Aksincha, meni Xudoning farishtasiday, xuddi Iso Masihning Oʻzini qabul qilganday qabul qildingiz.

¹⁵Qani endi oʻsha xayrixohligingiz?! Axir, oʻzim shohidman: agar iloji boʻlganda, hatto koʻzlaringizni ham sugʻurib olib, menga bergan boʻlardingiz!

¹⁶Nahotki endi sizlarga haqiqatni aytganim uchun dushmaningiz boʻlib qolgan boʻlsam?!

¹⁷Ba’zi birovlar sizlarni oʻzlariga ogʻdirib olishga tirishmoqdalar[38]. Lekin ular sizlarning foydangizni koʻzlamayaptilar. Sizlar ularning atrofida girdikapalak boʻlishingiz uchun ular bizni bir — birimizdan ajratib tashlamoqchi.

¹⁸Yaxshi gʻoyaga bagʻishlanish yaxshidir. Lekin bu faqat men sizlarning oldingizdaligimda emas, balki doim shunday boʻlishi kerak.

¹⁹Bolalarim, men sizlarni yangidan tugʻayotganday, toʻlgʻoq azobidaman. Maqsadim shuki, sizlarda Masihning tabiati namoyon boʻlsin.

²⁰Sizlar meni taajjubga solib qoʻydingiz! Qani, endi sizlarning oldingizda boʻlsam — u, boshqa ohangda gapira olsam!

²¹Ey sizlar, qonun ostidagi hayotni afzal koʻrganlar, menga aytinglar — chi, nahot sizlar Tavrotdagi qonunlarni tushunmasangizlar?!

²²Axir, unda yozilganlardan bilamizki, Ibrohimning ikki oʻgʻli boʻlgan. Oʻgʻillarining biri choʻridan[39], ikkinchisi esa ozod ayoldan[40] tugʻilgan.

²³Choʻrisiniki inson tashabbusi bilan, ozod xotininiki esa Xudoning va’dasiga binoan tugʻilgan edi.

²⁴Bunda ramziy ma’no bor. Ikki ona Xudoning ikki ahdini[41] bildiradi: birinchisi — qullarni tugʻadigan Hojar bibi Sinay togʻida qilingan ahdning ramzidir.

²⁵Hojar Arabistondagi Sinay togʻini[42] bildirsa — da, u yahudiy dinining markazi boʻlmish hozirgi Quddusning ramzidir. Axir, Quddus va uning bolalari qullikdalar — ku.

²⁶Samoviy Quddus esa ozoddir: u bizlarning onamizdir!

²⁷Muqaddas bitiklarda shunday yozilgan: “Ey bola koʻrmagan bepusht ayol! Shod boʻlgin! Ey toʻlgʻoq ogʻrigʻini bilmagan ayol! Xitob qil, hayqirgin! Axir, tashlab ketilgan ayolning bolalari Eri bor xotinnikidan ham koʻproq boʻladi!”[43]

²⁸Sizlar esa, ey birodarlar, Is’hoqqa oʻxshab va’daga binoan tugʻilgan farzandlarsiz.

²⁹Oʻsha zamonda tabiiy yoʻl bilan tugʻilgan oʻgʻil[44] Ruhning kuchi bilan tugʻilgan oʻgʻilni[45] quvgʻin qildi. Hozir ham xuddi shunday.

³⁰Ammo bu haqda Muqaddas bitiklarda nima deyilgan? “Choʻrini va uning oʻgʻlini haydab yuboring, chunki choʻrining oʻgʻli ozod ayolning oʻgʻli bilan birga merosxoʻr boʻlmaydi”[46], — deb yozilgan — ku!

³¹Shunday qilib, ey birodarlar, biz choʻrining emas, balki ozod ayolning farzandlarimiz.