Read Uzbek Muqaddas Kitob Efesliklar 2 Bible Online

Efesliklar 2 - Uzbek Muqaddas Kitob bible

Efesliklar 2

¹Sizlar bir vaqtlar gunohlaru ayblaringiz tufayli ruhan oʻlik edingizlar.

²Sizlar bu dunyoning odatlari boʻyicha, yovuz ruhiy kuchlarning hokimi boʻlgan shaytonga boʻysunib, gunohga botib yashardingiz. Xudoga itoat qilmay yashayotganlarning yuraklarida amal qilayotgan shaytondir.

³Biz ham bir vaqtlar xudbin istaklarimizni qondirib yashar edik. Tana ehtiroslariga va bema’ni oʻy — xayollarga berilib yashaydigan, barcha odamzod kabi, tabiatan Xudoning qahr — gʻazabiga loyiq boʻlgan itoatsiz insonlar edik.

⁴Ammo mehr — shafqatga boy Xudo Oʻzining bizga boʻlgan buyuk muhabbatini quyidagicha koʻrsatdi:

⁵garchi biz gunohlarimiz tufayli ruhan oʻlik boʻlsak ham, Xudo bizni Masih bilan birga tiriltirdi. Biz Xudoning inoyati tufayli qutqarilganmiz.

⁶Xudo bizni Masih bilan birga tiriltirdi va bizga samoda U bilan birga joy berdi. Bular Iso Masih tufayli amalga oshdi.

⁷Xudoning inoyati behad moʻl ekanligi to abad namoyon boʻlishi uchun, U bizga Iso Masih orqali mehr — shafqat koʻrsatdi.

⁸Axir, sizlar Xudodan inoyat topib, imon orqali najot topgansiz. Bu Xudoning in’omidir, sizning yutugʻingiz emas.

⁹Yana hech kim: “Men savob ishlarim tufayli qutulganman”, deb maqtanmasin.

¹⁰Axir, biz Xudoning ijodimiz. Xudo bizni xayrli ishlar qilishimiz uchun Iso Masih orqali yaratdi, bu ishlarni biz uchun azaldanoq tayyorlab qoʻygan edi.

¹¹Esingizda boʻlsin, sunnat qilingan yahudiylar[9] bir vaqtlar siz — gʻayriyahudiy boʻlganlarni “sunnatsiz”[10] deb atardilar. Vaholanki, yahudiylarning sunnati faqatgina jismoniy sunnat edi.

¹²Oʻsha paytda sizlar Masihni bilmas edingizlar, Isroil xalqiga tegishli emasdingiz. Xudoning Isroil xalqi bilan tuzgan ahdlariga[11] va bergan va’dalariga begona boʻlib, bu dunyoda umidsiz va Xudosiz yashar edingiz.

¹³Sizlar oldin Xudodan uzoq edingiz, endi esa Iso Masih orqali, Uning toʻkilgan qoni tufayli Xudoga yaqinlashdingiz.

¹⁴Masihning Oʻzi bizning tinchlik manbaimizdir. U Oʻz tanasini fido qilib, yahudiylar va gʻayriyahudiylarni birlashtirdi, ularning orasidagi adovat devorini qulatdi. Iso Masih yahudiylarga berilgan qonunni va uning amrlariyu qoidalarini bekor qildi. Masih tufayli gʻayriyahudiylar bilan yahudiylar birlashib, yangi bir xalq boʻldilar, shunday qilib Masih tinchlik oʻrnatdi.

¹⁶Xochdagi oʻlimi orqali Masih gʻayriyahudiylarni ham, yahudiylarni ham Xudo bilan yarashtirdi — da, ularning orasidagi adovatni yoʻq qildi.

¹⁷Masih kelib, sizlarga — oldin Xudodan uzoq boʻlganlarga ham, Xudoga yaqin boʻlganlarga ham tinchlik Xushxabarini e’lon qildi.

¹⁸Masih tufayli endi hammamiz bir Ruh orqali Otamiz Xudoning huzuriga kira olamiz.

¹⁹Demak, sizlar endi begona ham, kelgindi ham emassizlar, balki Xudoning aziz xalqi qatoridasiz, Uning xonadoni a’zosi boʻldingizlar.

²⁰Sizlar xuddi bir binodaysizlar. Bu binoning asosi havoriylaru paygʻambarlardir[12]. Binoning tamal toshi[13] esa Iso Masihning Oʻzidir.

²¹Bu imorat Rabbimiz Iso Masih orqali bir boʻlib, yuksalib boradi va Unga bagʻishlangan muqaddas ma’bad boʻladi.

²²Iso Masihga tegishli boʻlganingiz uchun sizlar ham bu imoratning bir qismisiz. Bu imoratni Xudoning Ruhi Oʻziga maskan qilib oladi.