Read Uzbek Muqaddas Kitob Efesliklar 3 Bible Online

Efesliklar 3 - Uzbek Muqaddas Kitob bible

Efesliklar 3

¹Mana, Iso Masih haqi siz — gʻayriyahudiylarga qilgan xizmatim sababli mahbus[14] boʻlganman.

²Xudo Oʻz inoyatini sizlarga yetkazish vazifasini menga topshirdi. Sizlar albatta bu haqda eshitgansizlar.

³Yuqorida qisqacha yozganimday, Xudo bu sirni menga vahiy orqali ma’lum qildi.

⁴Sizlar yozganlarimni oʻqib, Masih haqidagi sirni qanday fahmlaganimni tushunib olasizlar.

⁵Bu sir oldingi nasllarga ayon qilinmagan edi. Endi esa Muqaddas Ruh orqali Xudoning muqaddas havoriylari va paygʻambarlariga[15] ayon qilindi.

⁶Bu sirning mohiyati quyidagichadir: gʻayriyahudiylar ham Xushxabarga ishonib, Iso Masih orqali Xudo Oʻz xalqiga ato qiladigan barakalarga sherik boʻladilar. Ular bilan birga bir tana a’zolari[16] boʻlib, Xudoning Oʻz xalqiga bergan va’dasidan bahramand boʻladilar.

⁷Xushxabarni tarqatish xizmati menga Xudoning inoyati boʻyicha topshirildi. Bu inoyatni Xudo menga Oʻzining kuch — qudrati orqali berdi.

⁸Men Xudoning azizlari orasida eng arzimagani edim. Masihning aql bovar qilmas boyligi haqidagi Xushxabarni gʻayriyahudiylarga yetkazishim uchun menga Xudoning inoyati berildi.

⁹Xudoning sirli rejasini endi hammaga oshkor qilish vazifasi menga yuklandi. Butun borliqni[17] yaratgan Xudo bu sirni asrlar davomida pinhon tutgan edi.

¹⁰Oʻzining koʻp qirrali donoligi imonlilar jamoati orqali samoviy kuchlaru saltanatlarga ma’lum boʻlishi uchun Xudo shunday qildi.

¹¹Xudoning Rabbimiz Iso Masih orqali roʻyobga chiqargan azaliy maqsadi shu edi.

¹²Biz Iso Masih tufayli va Unga boʻlgan imonimiz tufayli Xudoning huzuriga dadillik va toʻla jasorat bilan yaqinlashish imkoniga egamiz.

¹³Shunday ekan, sizlardan oʻtinaman, mening azob — uqubatlarimni deb, ruhingiz hech tushmasin. Aksincha, sizlar uchun chekkan azob — uqubatlarim bilan faxrlaninglar.

¹⁴Yuqorida aytib oʻtganlarim haqida oʻylaganimda, samoviy Otamiz[18] oldida tiz choʻkib, ibodat qilaman.

¹⁵Yer yuzidagi va osmonu falakdagi har bir jonzotning hayot manbayi samoviy Otadir.

¹⁶Mening toat — ibodatlarim quyidagichadir: Xudo Oʻzining ulugʻvor boyligi bilan sizlarga kuch — qudrat berib, Oʻz Ruhi bilan ichki borligʻingizni baquvvat qilsin.

¹⁷Imoningiz orqali Masih yuragingizdan joy olsin.

¹⁸Sizlar ildizi chuqur daraxtday boʻling, Xudoning sevgisi sizlarni barqaror qilsin. Xudoning barcha azizlari bilan birga, Masihning aql bovar qilmas sevgisi qanchalik keng, qanchalik cheksiz, qanchalik yuksak va teran ekanligini toʻla anglab, bilib olinglar. Shunda hayotingiz Xudoning kamolotiga toʻlib — toshadi.

²⁰Xudo hayotimizda amal qilayotgan qudrati bilan biz soʻragan yoki tasavvur qilganlarimizni va hatto xayolimizga kelmaganlarni ham bajarishga qodirdir.

²¹Imonlilar jamoati va Iso Masih orqali Xudoga nasllar osha to abad shon — sharaflar boʻlsin! Omin.