Read Uzbek Muqaddas Kitob Efesliklar 4 Bible Online

Efesliklar 4 - Uzbek Muqaddas Kitob bible

Efesliklar 4

¹Rabbimiz Iso haqi mahbus[19] boʻlgan men — Pavlus sizlardan oʻtinib soʻrayman: Xudo sizlarni Oʻziga da’vat qilganini yoddan chiqarmay, shu da’vatga munosib tarzda yashanglar.

²Doimo kamtar va muloyim boʻlinglar, mehr — muhabbat bilan bir — biringizga nisbatan sabr — toqatli boʻlinglar.

³Oʻzaro tinch — totuv yashab, Muqaddas Ruh ato qilgan birdamlikni saqlashga jon kuydiringlar.

⁴Hammamiz bir tananing a’zolarimiz[20], qalbimizdagi Muqaddas Ruh ham birdir. Shuningdek, Xudo bizni da’vat qilib, hammamizga bergan umid ham birdir.

⁵Rabbimiz bir, imonimiz ham birdir, bir maqsadda suvga choʻmdirilganmiz.

⁶Barchamizning Otamiz Xudo birdir. U hammamizdan ustun boʻlib, hammamiz orqali Oʻz irodasini bajo qiladi. U hammamizning oramizdadir.

⁷Masih Oʻz inoyatiga koʻra, har birimizga turli xil in’omlar bergan.

⁸Mana, Muqaddas bitiklarda quyidagicha yozilgan: “Yuksaklarga chiqdi U, Asirlarni ortidan ergashtirdi. Insonlarga hadyalar berdi.”[21]

⁹U yuksaklarga chiqdi degan soʻzlar nimani bildiradi? U oldin pastga — yer yuziga tushgandan boshqa nimani bildirishi mumkin?!

¹⁰Pastga tushgan Zot, koinotni har jihatdan butun qilay deb, falak toqidan ham yuqoriroqqa chiqdi.

¹¹Masih ba’zilarni havoriy, ba’zilarni esa paygʻambar, ba’zilarni Xushxabar voizi, yana boshqalarni jamoatlarning choʻponlariyu ustozlari qilib tayinladi,

¹²toki ular Xudoning aziz xalqini xizmat qilishga tayyorlasinlar. Shunda Masihning tanasi, ya’ni jamoat imonda mustahkam turadi.

¹³Buning natijasida hammamiz imonda yakdil, Xudoning Oʻgʻli Masihni tanib — biladigan, Uning kamoliga erishgan yetuk odamlar boʻlamiz.

¹⁴Shunda biz norasida goʻdaklarga oʻxshamaymiz, shamol esgan tomonga egiladigan novdaday boʻlmaymiz. Har xil ta’limotlar va quv odamlarning hiylayu ayyorliklariga laqqa tushavermaymiz.

¹⁵Kelinglar, mehr — muhabbat bilan haqiqatni aytib, jamoatning boshi boʻlgan Masihga oʻxshab har jihatdan yetuk insonlar boʻlaylik.

¹⁶Uning boshchiligida butun badan payu boʻgʻinlar yordamida oʻzaro ulanadi va birikadi. Har bir a’zo oʻz vazifasini bajarar ekan, butun badan oʻsib boradi va mehr — muhabbat tufayli baquvvat boʻladi.

¹⁷Shunday ekan, Rabbimiz Isoning nomidan qat’iy tayinlab, sizlarga aytaman: endi xudosiz odamlarday yashamanglar, ular singari behuda oʻy — xayollarga berilmanglar.

¹⁸Ularning onglarini zulmat qoplagan, ular Xudo beradigan yangi hayotga begonadirlar, chunki ular bagʻri tosh boʻlib, jaholatda qolganlar.

¹⁹Ular har qanday or — nomus tuygʻusini yoʻqotib, fisqu fujurga berilganlar, har xil iflos ishlarni ishtiyoq bilan qiladilar.

²⁰Ammo sizlar Masihdan bunday ishlarni oʻrganmagansiz.

²¹Sizlar Masihning soʻzlarini eshitib, Uning ta’limotini olgansizlar, chunki haqiqat Masihda jamdir.

²²Oldingi yashash tarzingizga tobe boʻlmang, eski oʻzligingizdan voz keching, chunki u aldovchi ehtiroslar tufayli buzilib ketgan.

²³Yangichasiga fikr — zikr qiladigan boʻlinglar.

²⁴Xudoning suratida yaratilgan, haqiqiy solihlik va muqaddaslikdan iborat boʻlgan yangi tabiatga burkaninglar.

²⁵Endi yolgʻon gapirishni bas qilib, har biringiz oʻz yaqiningizga haqiqatni aytinglar, axir, hammamiz bir tananing a’zolarimiz — ku.

²⁶Hatto gʻazablanganingizda ham gunoh qilmanglar[22]. Quyosh botguncha jahldan tushinglar.

²⁷Iblisga fursat bermanglar.

²⁸Oldin oʻgʻri boʻlgan endi oʻgʻrilik qilmasin, balki ishlasin, oʻz qoʻllari bilan mehnat qilsin. Shunda muhtojlarga ham topgan — tutganidan yordam bera oladi.

²⁹Ogʻzingizdan hech qanday yaramas soʻz chiqmasin. Lekin tinglovchilarning ehtiyojiga koʻra, kerakli gaplarni aytib, ularga dalda bering, shunda soʻzlaringiz ularga foyda keltiradi.

³⁰Xudoning Muqaddas Ruhini xafa qilmanglar, chunki Muqaddas Ruh sizlarning Xudoga tegishli ekaningizning hamda bir kun kelib[23], butunlay ozod boʻlishingizning dalilidir.

³¹Har qanday gina — kudurat, qahru gʻazab, janjalkashlik, gʻiybatchilikni hamda boshqa har xil yomonliklarni oʻzingizdan soqit qilinglar.

³²Bir — biringizga nisbatan koʻngilchan va mehr — shafqatli boʻlinglar. Xudo sizlarni Masih orqali kechirganday, sizlar ham bir — biringizni kechiringlar.