Read Uzbek Muqaddas Kitob Efesliklar 5 Bible Online

Efesliklar 5 - Uzbek Muqaddas Kitob bible

Efesliklar 5

¹Xudoning sevikli farzandlari ekansiz, endi Xudodan oʻrnak olinglar.

²Masih bizni yaxshi koʻrib, biz uchun Oʻzini fido qildi va shu yoʻsin Xudoga ma’qul keladigan qurbonlik boʻldi. Sizlar ham Iso Masihga oʻxshab, xuddi shunday mehr — muhabbat bilan yashanglar.

³Sizlarning orangizda fahsh, zinokorlik, ifloslik yoki xasisligu ochkoʻzlik hatto tilga ham olinmasin. Bular Xudoning azizlariga munosib emas.

⁴Shuningdek, orangizda beadablik, nojoʻya soʻzlaru qoʻpol hazillar ham boʻlmasin, chunki bunday qiliqlar sizlarga toʻgʻri kelmaydi. Yaxshisi, Xudoga shukur qilinglar.

⁵Shuni bilib qoʻyinglarki, hech bir fahshboz, iflos yoki xasisu ochkoʻz inson Masihning va Xudoning Shohligidan bahramand boʻlmaydi, chunki aytib oʻtilganlarning hammasi butparastlik bilan tengdir.

⁶Oʻshanday gunohlarni qilishga bahona izlaganlar sizlarni quruq gaplar bilan aldamasin, chunki Xudoning qahr — gʻazabi Unga itoatsiz bandalarning boshiga tushadi.

⁷Shuning uchun ularga sherik boʻlmanglar.

⁸Bir vaqtlar sizlar zulmatga toʻla edingiz, endi esa Rabbimiz Isoga tegishli boʻlganingiz uchun nurga toʻldingiz. Shunday ekan, nurga toʻla insonlar kabi yashanglar.

⁹Axir, har qanday ezgulik, solihlik va haqiqat nurning[24] samarasidir.

¹⁰Rabbimizga nima maqbul ekanligini bilishga tirishinglar.

¹¹Zulmatning besamara ishlarida ishtirok etmanglar, aksincha, ularni fosh etinglar.

¹²Maxfiy ravishda qilinadigan oʻsha ishlar haqida gapirish ham uyatdir.

¹³Ammo nur porlaganda hamma narsa fosh boʻlib, ochiq — oshkor koʻrinadi. Axir, nur hamma narsani ochiq — oydin namoyon qiladi — ku!

¹⁴Mana shu sababdan shunday deymiz: “Ey uxlayotgan, tur! Oʻlikdan tiril! Masih senga nur sochar[25].”

¹⁵Shunday qilib, qay tarzda yashayotganingizga diqqat qilinglar. Nodonlar kabi emas, balki donolarday hayot kechiringlar.

¹⁶Fursatni gʻanimat bilinglar, chunki biz yashayotgan bu kunlar yomonlikka toʻla.

¹⁷Shuning uchun beaql boʻlmanglar, balki Rabbimiz Isoning irodasi nima ekanligini anglashga harakat qilinglar.

¹⁸Sharob ichib mast boʻlmanglar, chunki bu buzuqlikka olib boradi. Aksincha, Muqaddas Ruhga toʻlib — toshinglar.

¹⁹Birga yigʻilganingizda sanolar, ruhiy madhiyalaru qoʻshiqlar kuylanglar. Musiqa asboblariyu xonishlaringiz bilan chin yurakdan Rabbimizga hamdlar aytinglar.

²⁰Har doim, har bir narsa uchun Rabbimiz Iso Masih nomi bilan Otamiz Xudoga shukur qilinglar.

²¹Iso Masihni[26] izzat — hurmat qilganingiz uchun bir — biringizga boʻysuninglar.

²²Ey xotinlar, siz Rabbimiz Isoga qanday boʻysunsangiz, erlaringizga ham shunday boʻysuning.

²³Masih imonlilar jamoatining boshi boʻlgani kabi, er ham xotinning boshidir. Masih Oʻz tanasi boʻlgan jamoatning Najotkoridir.

²⁴Jamoat Masihga qanday tobe boʻlsa, xotinlar ham har jihatdan oʻz erlariga shunday tobe boʻlishlari kerak.

²⁵Ey erlar, Masih jamoatni yaxshi koʻrib, Oʻzini jamoat uchun fido qilganiday, sizlar ham xotinlaringizni shunday yaxshi koʻringlar.

²⁶Masih jamoatni suv[27] va Xudoning kalomi orqali poklab[28], muqaddas qilish niyatida Oʻzini fido qildi.

²⁷Jamoatni Oʻz huzuriga keltirganda, jamoat har qanday gʻubor, ajin va dogʻdan xoli boʻlib, ulugʻvor, muqaddas va benuqson boʻlishi uchun Masih Oʻz jonini ayamadi.

²⁸Erlar ham oʻz xotinlarini oʻz tanalarini sevganday sevishlari kerak. Oʻz xotinini sevgan erkak oʻzini sevgan boʻladi.

²⁹Hech kim hech qachon oʻz tanasini yomon koʻrmaydi. Aksincha, uni oziqlantirib, parvarish qiladi. Masih ham Oʻz jamoatini xuddi shunday oziqlantirib, parvarish qiladi.

³⁰Biz Masih tanasining a’zolarimiz[29].

³¹Muqaddas bitiklarda shunday yozilgan: “Shuning uchun erkak kishi ota — onasidan boʻlak boʻlib, xotiniga bogʻlanib qoladi, ikkalasi bir tan boʻladilar.”[30]

³²Bu buyuk sirdir, endi bu sir Masih hamda jamoatga ham taalluqlidir.

³³Xullasi kalom, har bir er oʻz xotinini oʻzini sevganday sevsin. Xotin ham erini hurmat qilsin.