Read Uzbek Muqaddas Kitob Efesliklar 6 Bible Online

Efesliklar 6 - Uzbek Muqaddas Kitob bible

Efesliklar 6

¹Ey farzandlar, Rabbimiz Isoga tegishli boʻlganingiz uchun ota — onangizga itoat qilinglar, chunki shunday qilish toʻgʻridir.

²Axir, Xudo shunday amr qilgan: “Ota — onangizni hurmat qiling. Oʻshanda yer yuzida umringiz uzoq boʻlib, baxtiyor yashaysiz.”[31] Va’da qoʻshib berilgan birinchi amr oʻsha amrdir.

⁴Ey otalar, farzandlaringizning gʻashiga tegmang. Ularni Rabbimizning ta’lim — tarbiyasi bilan oʻstiring.

⁵Ey qullar, Masihga chuqur izzat — ehtirom bilan, chin yurakdan itoat qilganingiz kabi, xoʻjayinlaringizga ham shunday itoat qilinglar.

⁶Faqatgina insonlarni mamnun qilib, xoʻja koʻrsinga xizmat qiladigan odamlarga oʻxshamasdan, Masihning qullari kabi, chin koʻngildan Xudoning irodasini bajaringlar.

⁷Insonlarga emas, balki Rabbimiz Isoga xizmat qilayotgandek, bajonu dil xizmat qilinglar.

⁸Esingizda tuting: xoh qul, xoh erkin boʻlsin, har bir kishi qilgan yaxshiligiga yarasha mukofotni Rabbimizdan oladi.

⁹Ey xoʻjayinlar, sizlar ham qullaringizga yaxshi muomalada boʻlinglar. Ularga doʻq — poʻpisa qilishni bas qilinglar, chunki bilasizlar — ku, ularning ham, sizlarning ham Xoʻjayiningiz samoda, U tarafkashlik qilmaydi.

¹⁰Va nihoyat, Rabbimiz Iso sizning qudrat manbaingiz boʻlsin, Uning buyuk qudrati sizlarni baquvvat qilsin.

¹¹Iblisning hiylalariga qarshi tura olishingiz uchun Xudo bergan barcha qurol — aslahalar bilan qurollaning.

¹²Axir, bizning kurashimiz insonlarga qarshi emas, balki samoviy olamdagi yovuz ruhiy kuchlarga, ruhiy hokimiyat va hukmronlikka hamda bu qorongʻi dunyoni boshqarayotgan ruhiy hukmronlarga qarshidir.

¹³Shu sababdan, Xudoning qurol — aslahalari bilan qurollaning, deb aytyapman. Shunda yovuzlikka toʻla kunlarda mahkam tura olasiz, qurollanib tayyor turgan boʻlasiz.

¹⁴Hushyor turinglar! Belingizga haqiqat kamarini taqinglar, koʻksingizga solihlik sovutini kiyinglar,

¹⁵tinchlik Xushxabarini yoyish uchun oyogʻingizga ildamlik poyabzalini kiyinglar.

¹⁶Bularga qoʻshib, imon qalqonini qoʻlga olinglar. Shu qalqon bilan yovuz shaytonning hamma alangali oʻqlarini kuchdan qoldirasizlar.

¹⁷Shuningdek, boshingizga najot dubulgʻasini kiyinglar, Ruh beradigan, Xudoning kalomi boʻlgan qilichni koʻtaringlar.

¹⁸Har qanday sharoitda Muqaddas Ruhga tayanib duo — ibodat qilinglar. Ibodatda hushyor va sabotli boʻlib, Xudoning barcha azizlari uchun iltijo qilinglar.

¹⁹Men uchun ham ibodat qilinglar. Men ogʻzimni ochganimda, zarur boʻlgan soʻz menga berilsin, toki qoʻrqmasdan Xushxabar sirini[32] bayon eta olayin.

²⁰Shu Xushxabarning elchisi boʻlganim uchun hibsdaman[33]. Elchiga loyiq ravishda men Xushxabarni jasurlik bilan e’lon qilishim uchun ibodat qilinglar.

²¹Tixikus sizlarga mening hol — ahvolimni, nimalar qilayotganimni aytib beradi. U suyukli birodarimiz, Rabbimiz Isoning sodiq xizmatkoridir.

²²Mana shu maqsadda, bizning ahvolimizni sizlarga bildirsin, sizlarga dalda bersin deb, uni sizlarning oldingizga yuboryapman.

²³Birodarlarim, Otamiz Xudo va Rabbimiz Iso Masih sizlarga tinchlik, mehr — muhabbat va imon ato qilsin.

²⁴Rabbimiz Iso Masihni yaxshi koʻrganlarning hammasiga to abad Xudoning inoyati yor boʻlsin[34].