Read Uzbek Muqaddas Kitob Filippiliklar 1 Bible Online

Filippiliklar 1 - Uzbek Muqaddas Kitob bible

Filippiliklar 1

¹Iso Masihning qullari Pavlus va Timoʻtiydan[2] Filippi shahridagi Iso Masihning barcha azizlariga hamda jamoat yetakchilari va xizmatchilariga salom!

²Otamiz Xudo va Rabbimiz Iso Masih sizlarga inoyat va tinchlik ato qilsin.

³Har safar sizlar haqingizda oʻylaganimda Xudoyimga shukurlar aytaman.

⁴Hammangiz uchun ibodat qilganimda, har doim shodlik bilan ibodat qilaman,

⁵chunki sizlar Xushxabarga ishonganingizdan boshlab, to hozirga qadar oʻsha Xushxabarni yoyishda men bilan birga ishtirok etib kelmoqdasizlar.

⁶Xudo sizlarning hayotingizda boshlagan ezgu ishini Iso Masih keladigan kungacha bitirishiga aminman.

⁷Sizlarni yaxshi koʻrganim uchun hammangiz haqingizda shunday fikr qilishim oʻrinlidir. Axir, qamoqdaligimda ham, Xushxabar haqiqat ekanligini himoya qilish va ta’kidlashimda ham Xudo bergan inoyatda sizlar menga sheriksizlar.

⁸Mana, Xudo shohid: men sizlarni rosa sogʻinganman, chunki sizlarni Iso Masihnikiday boʻlgan mehr — muhabbat bilan yaxshi koʻraman.

⁹Sizlarning muhabbatingiz yanada oshib, bilim va aql — idrok bilan boyisin, deb ibodat qilyapman,

¹⁰chunki men sizlarning a’lo narsalarni tanlashingizni, Masih keladigan kunda pok va aybsiz boʻlishingizni istayman.

¹¹Toki sizlarning hayotingiz Iso Masih kuchi orqali solihlik samarasiga toʻlib, Xudoga sharaf va maqtov keltirsin.

¹²Ey birodarlar, shuni bilishingizni istaymanki, boshimga tushganlarning hammasi Xushxabarning yanada koʻproq yoyilishiga turtki boʻldi.

¹³Masih tufayli qamalganim butun saroy qoʻriqchilariga[3] va bu yerdagilarning hammasiga ma’lum boʻldi.

¹⁴Mening qamoqdagi vaziyatim koʻp birodarlarning Rabbimiz Isoga boʻlgan ishonchini oshirdi, shuning uchun ular qoʻrqmasdan, katta jasorat bilan Masih haqidagi xabarni targʻib qilmoqdalar.

¹⁵Toʻgʻri, Masih haqidagi Xushxabarni ba’zilar baxillik va hasadgoʻylik bilan, ba’zilar esa yaxshi niyat bilan targʻib qilyaptilar.

¹⁶Yaxshi niyat bilan targʻib qilayotganlar meni yaxshi koʻrganlari uchun va men Xushxabarni himoya qilishga tayinlanganimni bilib shunday qilyaptilar.

¹⁷Qolganlar esa Xushxabarni raqobat ruhi bilan targʻib qilyaptilar. Ular pok niyatda emas, balki mening qamoqda tortayotgan azoblarim koʻpaysin deb, shunday qilyaptilar[4].

¹⁸Ammo nima farqi bor? Yomon niyatdami, yaxshi niyatdami, muhimi, Masih haqidagi Xushxabar targʻib qilinmoqda. Mana shu meni xursand qiladi. Men xursand boʻlishda davom etaveraman,

¹⁹chunki bilaman, sizlarning ibodatlaringiz orqali va Iso Masih Ruhining yordami bilan mana shularning hammasi mening ozod boʻlishimga olib keladi.

²⁰Ishonch bilan umid qilaman: isnodga qolmayman, aksincha, jasorat koʻrsataman. Ha, umidim shuki, hozir ham oldingiday, oʻlsam ham, yashasam ham mening tanam orqali Masih ulugʻlanadi.

²¹Zotan, men uchun hayot Masihdir, oʻlim esa yutuqdir.

²²Axir, tirik qoladigan boʻlsam, samarali ishlar qilaveraman, shunday ekan, nimani tanlashni ham bilmayman.

²³Ikki yoʻlning qay birini tanlashni bilmay, boshim qotib qoldi. Mening istagim bu dunyodan ketib, Masih bilan birga boʻlishdir. Shunday boʻlsa juda yaxshi boʻlardi.

²⁴Ammo tirik qolishim sizlar uchun zarurroqdir.

²⁵Bunga ishonchim komil, shuning uchun tirik qolishimni bilaman. Sizlarning imoningiz mustahkamlanib, quvonchingiz oshib boraverishi uchun men sizlar bilan birga qolaman.

²⁶Shunday qilib, men yana sizlarning oldingizga kelganimda, men tufayli Iso Masihdan yanada koʻproq faxrlanasiz.

²⁷Nima boʻlishidan qat’iy nazar, Masih Xushxabariga loyiq tarzda hayot kechirishingiz kerak. Shunday yashanglarki, men sizlarni koʻrishga borganimda, Xushxabarning samarasi boʻlgan imon uchun yakdillik bilan kurashib, bir ruhda mustahkam turganingizni koʻray! Ammo sizlarni koʻrishga borolmasam, shunday xabar eshitay.

²⁸Sizlarga qarshilik koʻrsatayotganlardan hech hayiqmanglar. Sizlarning qat’iyatingiz ularning halok boʻlishidan, sizlarning esa najot topishingizdan dalolat beradi. Bu Xudoning ishidir.

²⁹Zotan, Xudo sizlarga nafaqat Masihga ishonish, balki Uning uchun azob — uqubat tortish sharafini ato qilgan.

³⁰Axir, sizlar azob — uqubatlarimni koʻrdingiz, hozir ham aziyat chekayotganim haqida eshityapsiz. Endi mana shu kurashda sizlar mening sheriklarimsiz.