Read Uzbek Muqaddas Kitob Filippiliklar 3 Bible Online

Filippiliklar 3 - Uzbek Muqaddas Kitob bible

Filippiliklar 3

¹Endi esa, ey birodarlarim, Rabbimiz Iso tufayli shodlaning! Sizlarga bir xil narsalarni yozaversam ham zerikmayman, yozganlarim sizlarni har xil balolardan asraydi.

²Itday boʻlganlardan, yovuzlik qiladiganlardan, tanasini kesadiganlardan[7] ehtiyot boʻlinglar!

³Axir, ular emas, biz haqiqiy sunnat qilinganmiz, chunki biz Xudoning Ruhi yordamida sajda qilamiz. Biz Iso Masih bilan maqtanamiz, insoniy xususiyatlarimizga ishonmaymiz.

⁴Vaholanki, men oʻz xususiyatlarimga ishonsam boʻladi. Axir, bunday qilishga menda hammanikidan ham koʻra, koʻproq sabab bor.

⁵Men sakkiz kunligimda sunnat qilinganman[8], Isroil avlodidan, Benyamin qabilasidanman. Men haqiqiy ibroniyman. Farziy[9] boʻlib, Xudoning qonuniga soʻzsiz rioya qilardim.

⁶Jon — jahdim bilan jamoatni quvgʻin qilardim. Qonunlarga rioya qilishga asoslangan solihlikka kelganda, aybsiz edim.

⁷Ammo men uchun foyda boʻlgan bularning hammasini endi Masih tufayli zarar deb hisoblayman.

⁸Ha, hamma narsa qadrsizdir, chunki Rabbim Iso Masihni tanib — bilishdan afzalroq hech narsa yoʻq deb hisoblayman. Uni deb, men hamma narsadan voz kechdim. Masihga sazovor boʻlish, butunlay Unga tegishli boʻlish uchun hamma narsani axlat deb bildim. Endi qonunga rioya qilish orqali solihlikka erishishga umid qilmayman, aksincha, Masihga boʻlgan imonim bilan solihlikka erishishga intilaman. Ha, bu solihlikni Xudo imon tufayli beradi.

¹⁰Maqsadim shuki, Iso Masihni bilay, Uni tiriltirgan qudrat mening hayotimda ham oʻz kuchini koʻrsatsin, Masihning azoblariga sherik boʻlay. Uning oʻlim paytidagi fikr — zikri mening hayot tarzim namunasi boʻlsin.

¹¹Bir kun kelib, men oʻlikdan tirilishga erishaman, deb umid qilaman.

¹²Men maqsadimga yetdim yoki kamolotga erishdim, deb aytolmayman. Ammo men unga yetishay, deb intilaman, chunki Iso Masih aynan shu maqsad uchun meni Oʻziniki qilib olgan.

¹³Birodarlar, men oʻzimni oʻsha maqsadga yetishganman deb hisoblamayman. Ortda qolganlarni unutib, oldinga intilaman. Faqatgina

¹⁴oʻsha maqsadni koʻzlayman — da, Xudo meni Iso Masih orqali chaqirib, menga ato qiladigan samoviy yutuq tomon intilmoqdaman.

¹⁵Biz hammamiz, imon jihatidan yetuklikka erishganlar, shunday oʻylashimiz kerak. Agar sizlar biror narsa haqida boshqacha fikrda boʻlsangiz, Xudo sizlarga nohaq ekanligingizni ayon qiladi.

¹⁶Nima boʻlishidan qat’iy nazar, qay darajaga erishgan boʻlsak, endi shu boʻyicha yashashda davom etaveraylik[10].

¹⁷Birodarlarim, mendan oʻrnak olayotganlarga qoʻshilinglar. Bizning namunamiz boʻyicha yashayotganlarga e’tibor berib, ulardan oʻrganinglar.

¹⁸Axir, men sizlarga oldin koʻp marta aytganman, hozir ham koʻzlarimga yosh toʻlib, qaytaryapman: Masih xochining dushmani boʻlib yashayotganlar koʻp.

¹⁹Ularning oxiri — halokat, ularning xudosi nafsdir. Uyatsiz qiliqlaridan faxrlanadilar. Ularning oʻy — xayollari foniy dunyodagi narsalarga berilgan.

²⁰Bizning vatanimiz esa samodadir. Bizlar najotkorimiz boʻlgan Rabbimiz Iso Masihning oʻsha yerdan kelishini intizorlik bilan kutyapmiz.

²¹Rabbimiz butun borliqni Oʻziga boʻysundirish kuchiga egadir. Mana shu kuch bilan U bizning ojiz, foniy tanamizni Oʻzining ulugʻvor tanasiga oʻxshatib oʻzgartiradi.