Read Uzbek Muqaddas Kitob Kolosaliklar 1 Bible Online

Kolosaliklar 1 - Uzbek Muqaddas Kitob bible

Kolosaliklar 1

¹Xudoning irodasi bilan Iso Masihning havoriysi boʻlgan men — Pavlus hamda birodarim Timoʻtiydan[2]

²Kolosa shahridagi Xudoning azizlari, Masihga tegishli boʻlgan sodiq birodarlarimizga salom!

³Otamiz Xudo[3] sizlarga inoyat va tinchlik ato qilsin! Sizlar uchun ibodat qilganimizda biz har doim Xudoga, Rabbimiz Iso Masihning Otasiga shukur aytamiz.

⁴Chunki Iso Masihga boʻlgan imoningiz va Xudoning barcha azizlariga koʻrsatayotgan sevgingiz haqida biz eshitdik.

⁵Xudo sizlar uchun jannatda shodlik tayyorlab qoʻyganiga umid bogʻladingiz. Xushxabar, ya’ni haqiqat soʻzi sizlarga yetib kelganda mana shu umid haqida eshitdingiz. Imoningiz va sevgingiz bu umidingizga asoslangan. Xushxabar butun dunyo boʻylab samara keltirib, yoyilmoqda. Xushxabarni eshitib, Xudo inoyatining haqiqiy ma’nosini tushunib yetgan kuningizdan beri sizlarning orangizda ham Xushxabar samara bermoqda.

⁷Sizlar bu Xushxabarni bizning aziz hamkorimiz Epafrasdan[4] eshitdingiz. U sizlar uchun sadoqat bilan Masihga xizmat qilyapti.

⁸Muqaddas Ruh sizlarga ato qilgan mehr — muhabbat haqida u bizga aytib berdi.

⁹Shu sababdan sizlar haqingizda eshitgan kunimizdan beri sizlar uchun ibodat qilishni kanda qilmayapmiz. Xudoning Ruhi beradigan donolik va aql — idrok orqali Uning irodasini toʻliq anglab yeting, deb ibodat qilyapmiz.

¹⁰Shunda sizlar Rabbimiz Isoga munosib hayot kechirib, har jihatdan Uni xursand qilasizlar. Qilgan har bir yaxshiligingiz samara keltiradi va sizlar Xudoni yanada chuqurroq tushunib bilasizlar.

¹¹Xudo Oʻzining buyuk qudrati bilan sizlarni kuch — quvvatga toʻldirib, har qanday vaziyatda sizlarga sabr — toqat va bardosh bersin. Xudo Oʻzining aziz xalqiga va’da qilgan nurdan[5] bahramand boʻlishni sizlarga loyiq koʻrgani uchun quvonch bilan osmondagi Otamizga shukrona ayting.

¹³U bizni zulmat hukmronligidan qutqarib, sevikli Oʻgʻlining Shohligiga qabul qildi.

¹⁴Oʻz Oʻgʻli orqali[6] bizni kechirib, gunohlarimizdan ozod qildi.

¹⁵Koʻrinmas Xudoning surati Masihdir, U butun borliqning toʻngʻichidir[7].

¹⁶Xudo butun borliqni Masih orqali yaratgan. Yeru koʻkdagi bor mavjudot, Koʻrinadigan va koʻrinmaydigan har bir narsa, Gʻayritabiiy kuchlar, taxtu saltanatlar, Bularning hammasi Masih orqali, Uning Oʻzi uchun yaratilgandir.

¹⁷Masih butun borliqdan oldin mavjud edi, Butun borliq U tufayli mustahkam turibdi.

¹⁸Masih jamoatning boshidir, Jamoat Masihning tanasidir. Hamma narsaning ibtidosi Masihdir, U hammadan ustun boʻlishi uchun Birinchi boʻlib oʻlikdan tiriltirilgan.

¹⁹Xudo Oʻz komilligini Isoda jo qilishni ma’qul koʻrdi.

²⁰Yeru koʻkdagi borliq mavjudotni Masih orqali Xudo Oʻzi bilan yarashtirib, Masihning xochda toʻkilgan qoni orqali Ular bilan tinchlik oʻrnatdi.

²¹Sizlar ham bir vaqtlar Xudoga dushman edingizlar. Fikru zikringiz Xudodan uzoq boʻlib, yomon ishlar qilardingizlar.

²²Masihning jismoniy tanadagi oʻlimi orqali Xudo sizlarni Oʻzi bilan yarashtirdi. Endi sizlar Xudoning oldida muqaddas, benuqson va aybsiz turasizlar.

²³Shunday ekan, hech ikkilanmay, imoningizda mahkam turishingiz kerak. Sizlar Xushxabarni eshitib, umidga ega boʻldingiz. Oʻsha umidingizni yoʻqotmang. Bu Xushxabar yer yuzidagi butun jonzotga e’lon qilindi. Men — Pavlus oʻsha Xushxabarning xizmatchisiman.

²⁴Men sizlar uchun azob chekayotganimdan xursandman. Axir, men Masih tanasi, ya’ni jamoat uchun azob chekyapman. Shunday qilib, mening azoblarim Masih chekkan azoblarga qoʻshiladi.

²⁵Xudoning xabarini sizlarga toʻliq e’lon qilishim uchun U meni jamoatning xizmatchisi qilib tayinladi.

²⁶Bu Xushxabar asrlaru nasllar davomida sir tutilgan edi, endi esa u Xudoning azizlariga oshkor qilindi.

²⁷Xudo barcha xalqlar ham Masih orqali boy ulugʻvorlikka yetishishlarini hammamizga koʻrsatishni istadi. Bu sirning mohiyati shudir: Masih, ya’ni ulugʻvorlikka yetishish umidi sizlarning orangizdadir.

²⁸Har biringiz Masih tanasining yetuk a’zosi sifatida Xudoning oldida turishingizni istaymiz. Shuning uchun biz hammani ogohlantirib, donolik bilan ta’lim berib, Masih haqida oʻrgatyapmiz.

²⁹Men ham ana shu maqsadda jon — jahdim bilan xizmat qilar ekanman, menga kuchli ta’sir qilayotgan Masihning qudratiga suyanaman.