Read Uzbek Muqaddas Kitob Kolosaliklar 2 Bible Online

Kolosaliklar 2 - Uzbek Muqaddas Kitob bible

Kolosaliklar 2

¹Men sizlar uchun, shuningdek, Laodikiya shahridagilar[8] hamda meni shaxsan koʻrmagan imonlilarning hammasi uchun naqadar zoʻr gʻayrat bilan mehnat qilayotganimni bilishingizni istayman.

²Maqsadim shuki, sizlar dadil boʻling, muhabbat rishtalari sizlarni birlashtirsin, Xudoning siri — Masih[9] haqida chuqur va boy tushunchaga ega boʻling.

³Chunki donolik va ilmu ma’rifatning hamma xazinalari Masihda pinhondir.

⁴Hech kim sizlarni tilyogʻlamalik bilan yoʻldan ozdirmasin deb, men sizlarga shularni aytyapman.

⁵Garchi men jisman sizlarning orangizda boʻlmasam ham, xayolan siz bilan birgaman. Sizlarning tartib — intizomingiz va Masihga boʻlgan sogʻlom imoningizni koʻrib sevinyapman.

⁶Sizlar Iso Masihni Rabbimiz deb qabul qilgan ekansizlar, doimo U koʻrsatgan yoʻldan yuravering.

⁷Olgan ta’limotingizga muvofiq, Masihda tomir yoyib, qaror toping. Imoningizda qattiq turing, Xudoga shukronalar tilingizdan tushmasin.

⁸Ehtiyot boʻlinglar, hech kim falsafa va quruq safsatalar bilan sizlarni avramasin. Bunday gaplar Masihga emas, balki insonlarning an’anasiga, dunyoning xurofiy kuchlariga[10] asoslanadi.

⁹Xudo Oʻzining butun borligʻi bilan toʻla — toʻkis Masihning vujudida mavjuddir.

¹⁰Masihga tegishli boʻlganingiz uchun hayotingiz toʻla — toʻkis, chunki U har qanday kuch va hokimiyatdan ustundir.

¹¹Masih orqali sizlar sunnat qilindingiz, bu jismoniy sunnat[11] emas, balki Masih orqali qilinadigan sunnat, ya’ni gunohkor tabiatning kesib tashlanishidir.

¹²Suvga choʻmdirilish orqali Masih bilan birga koʻmildingiz. Masihni oʻlikdan tiriltirgan Xudoning qudratiga boʻlgan imoningiz tufayli Masih bilan birga tirildingiz.

¹³Ilgari sizlar sunnatsiz[12], gunohga botgan boʻlib, ruhan oʻlik edingizlar. Endi esa Xudo barcha gunohlaringizni kechirib, sizlarni Masih bilan birga tiriltirdi.

¹⁴Bizga qarshi yozilgan ayblov hukmini Xudo bekor qildi, ya’ni oʻsha hukmni xochga mixlab, kuchdan qoldirdi.

¹⁵Oʻsha xoch orqali koinotdagi kuchlaru hukmronliklar ustidan gʻalaba qozonib, ularni qurolsizlantirdi. Oʻzining gʻolibona yurishida[13] ularning tutqun ekanligini namoyish etib, sharmanda qildi.

¹⁶Shuning uchun yegulik — ichgulik, diniy bayramlar, yangi oy shodiyonalari yoki Shabbat kuni xususida hech kim sizlarga qonun — qoida chiqarmasin.

¹⁷Oʻsha urf — odatlar kelajakning sharpasigina, xolos, ammo haqiqiy hayot Masihdadir.

¹⁸Shunday ekan, dindorlikka berilib, oʻzini moʻminlikka soladiganlar, farishtalarga sigʻinadiganlar sizlarni kamsitsa, e’tibor bermanglar. Ular koʻrgan vahiylari bilan maqtanadigan, aql — zakovati bilan magʻrurlanadigan odamlardir.

¹⁹Bunday kishilar Masihdan ajralgan. Masih — Oʻz tanasi, ya’ni jamoatning Boshidir. Mana shu Boshdan butun badan hayotbaxsh kuch olib, payu boʻgʻinlar orqali oʻzaro ulanib, Xudoning xohishi boʻyicha oʻsadi.

²⁰Agar sizlar Masih bilan birga oʻlgan boʻlsangizlar, dunyoning xurofiy kuchlari uchun ham oʻlgan boʻlasizlar. Unday boʻlsa yana nimaga bu dunyoga qul boʻlib,

²¹“tegma”, “yema”, “ushlama” degan qonun — qoidalarga boʻysunasizlar?!

²²Bu insoniy ta’limotlar va qoidalar ishlatilgan sari yoʻq boʻlib ketadigan narsalar haqida — ku!

²³Garchi bu qoidalar keltirib chiqargan dindorlik, oʻzini moʻmin qilib koʻrsatish, badanni qiynash odamlarga hikmatday tuyulsa — da, aslida ular shahvatu nafsga boʻlgan ishtiyoqni koʻpaytiradi.