Read Uzbek Muqaddas Kitob Kolosaliklar 4 Bible Online

Kolosaliklar 4 - Uzbek Muqaddas Kitob bible

Kolosaliklar 4

¹Ey xoʻjayinlar, sizning ham samoda Xoʻjayiningiz borligini bilib, qullaringizga odil va toʻgʻri muomala qiling.

²Doim ibodat qiling. Ibodatda hushyor boʻlib, shukronalar keltiring.

³Shuningdek, bizlar uchun ham ibodat qilinglar: biz Xudoning kalomini e’lon qilishimiz va Masih sirini[21] bayon etishimiz uchun Uning Oʻzi bizga yoʻl ochib bersin. Men ana shu sir tufayli qamoqdaman.

⁴Bu sirni munosib ravishda izhor eta olishimni Xudodan soʻranglar.

⁵Fursatni gʻanimat bilib, imonlilar qatoriga qoʻshilmaganlarga nisbatan oqilona yoʻl tutinglar.

⁶Ular bilan qanday gaplashishni sizlarga oʻrgatay: ular bilan gaplashganingizda soʻzingiz hamisha yoqimli va mazmunli boʻlsin.

⁷Men haqimdagi barcha yangiliklarni Rabbimiz Isoning sodiq xizmatkori, hamkorim va suyukli birodarim Tixikus sizlarga aytib beradi.

⁸Sizlarga dalda berib, hol — ahvolimizni sizlarga bildirsin[22] deb, men uni sizlarning oldingizga joʻnatyapman[23].

⁹Tixikus bilan birga oldingizga sodiq va sevimli birodarimiz, hamshaharingiz Oʻnisimus[24] ham boradi. Ular bu yerda boʻlib oʻtgan hamma narsani sizlarga aytib berishadi.

¹⁰Men bilan birga qamalgan[25] Aristarxus[26] va Barnaboning jiyani Mark[27] ham sizlarga salom yoʻllayaptilar. Mark haqida yoʻl — yoʻriq olgansizlar: agar oldingizga borsa, uni yaxshi qabul qilinglar.

¹¹Yoshua, ya’ni Yustus ham sizlarga salom yoʻllayapti. Xudoning Shohligi yoʻlida mehnat qilayotgan bulardan boshqa yahudiy[28] hamkorlarim yoʻq. Ular menga tasalli boʻlib kelmoqdalar.

¹²Iso Masihning quli, hamshaharingiz Epafras[29] sizlarga salom yoʻllayapti. Xudoning irodasini toʻliq bajaradigan, imoni komil insonlar boʻlinglar deb, Epafras zoʻr gʻayrat bilan, tinmay sizlar uchun ibodat qilmoqda.

¹³U sizlar uchun hamda Laodikiya va Heyrapolis shaharlaridagi[30] imonlilar uchun ne — ne zahmatlar chekkaniga oʻzim shohidman.

¹⁴Sevimli tabib Luqo[31] va Dimas sizlarga salom yoʻllashyapti.

¹⁵Laodikiya shahridagi birodarlarga, ayniqsa, Nimfaga va uning[32] uyida yigʻiladigan jamoatga salom aytinglar.

¹⁶Sizlarga yozgan bu maktubimni oʻqiganingizdan keyin, uni Laodikiyadagi jamoat ham oʻqisin. Sizlar esa Laodikiya jamoatiga yozgan maktubimni[33] oʻqinglar.

¹⁷Arxippusga: “Rabbimiz Iso zimmangga yuklagan xizmatni oxiriga yetkazgin”, — deb aytib qoʻyinglar.

¹⁸Men, Pavlus, mana shu maktubning yakunini oʻz qoʻlim bilan yozyapman[34]. Qamoqda ekanligimni esdan chiqarmanglar. Xudoning inoyati sizlarga yor boʻlsin[35].