Read Uzbek Muqaddas Kitob 1 Salonikaliklar 1 Bible Online

1 Salonikaliklar 1 - Uzbek Muqaddas Kitob bible

1 Salonikaliklar 1

¹Otamiz Xudo va Rabbimiz Iso Masihning Salonika shahridagi imonlilar jamoatiga Pavlus, Silas[1] va Timoʻtiydan[2] salom! Xudoning[3] inoyati va tinchligi sizlarga yor boʻlsin.

²Biz doim sizlar uchun ibodat qilib, hammangiz uchun Xudoga shukurlar aytamiz.

³Imon va sevgi bilan qilgan ishlaringiz uchun, Rabbimiz Iso Masihga bogʻlagan sobit umidingiz uchun doimo Otamiz Xudoga minnatdorchiligimizni bildiramiz.

⁴Ey Xudo sevgan birodarlarimiz, Xudo sizlarni tanlab olganini bilamiz.

⁵Axir, biz Xushxabarni sizlarga quruq soʻzlar bilan emas, balki toʻliq ishonch va Muqaddas Ruhning qudrati bilan keltirdik. Orangizda boʻlganimizda, sizlarning manfaatingizni koʻzlab, qanday yashaganimizni bilasiz.

⁶Sizlar bizdan va Rabbimiz Isodan oʻrnak oldingiz. Axir, koʻp azob — uqubat chekkaningizga qaramay, Muqaddas Ruh beradigan quvonch bilan Xudoning soʻzini qabul qildingiz.

⁷Shunday qilib, Makedoniya va Axaya viloyatlaridagi[4] barcha imonlilarga oʻrnak boʻldingiz.

⁸Rabbimizning kalomi sizlardan faqatgina Makedoniya va Axayaga yoyilib qolmadi, balki sizlarning Xudoga boʻlgan imoningiz hamma joyda ma’lum boʻldi. Shuning uchun endi bizning biror narsa gapirishimizga hojat qolmadi.

⁹Bizni yaxshi qabul qilganingiz haqida, barhayot va haqiqiy Xudoga xizmat qilaylik, deya butlardan yuz oʻgirib, Xudoga yuz burganingiz haqida hamma gapiryapti.

¹⁰Xudoning Oʻgʻli Isoning samodan tushishini kutayotganingiz haqida ham gapiryaptilar. Xudo Oʻz Oʻgʻli Isoni tiriltirgan, Iso bizni kelajakda Xudoning gʻazabidan qutqaradi.