Read Uzbek Muqaddas Kitob 1 Salonikaliklar 3 Bible Online

1 Salonikaliklar 3 - Uzbek Muqaddas Kitob bible

1 Salonikaliklar 3

¹Oxiri chiday olmay, ukamiz Timoʻtiyni oldingizga yuborishga qaror qildik. Oʻzimiz esa Afina shahrida qoldik[7]. Masih haqidagi Xushxabarni targʻib etishdagi Xudoning xizmatida Timoʻtiy bizning hamkorimizdir. Azob — uqubatlar tufayli yoʻldan toymasligingiz uchun Timoʻtiy sizlarni imonda mustahkamlab, dalda bersin, dedik. Qiyinchiliklarga uchrashimiz peshanamizga yozilganini oʻzingiz bilasiz — ku!

⁴Axir, azob — uqubatlarga uchraymiz, deb oldingizda boʻlganimizda sizlarni ogohlantirgandik. Mana, biz aytganimizdek boʻldi.

⁵Shuning uchun ortiqcha sabr qila olmay, imoningiz haqida bilib kelsin deb, Timoʻtiyni yubordim. Shayton sizlarni vasvasaga solib, ishimizni bekor qilgan boʻlsa kerak, deb qoʻrqqan edim.

⁶Mana, Timoʻtiy sizlarning oldingizdan qaytib keldi[8]. Bizga sizlarning imoningiz va sevgingiz haqida yaxshi xabar olib keldi. Biz sizlarni sogʻinganimizdek, sizlar ham bizni sogʻinib qolibsiz. Bizni yaxshi soʻzlar bilan eslar ekansiz. Timoʻtiy bularni bizga aytib berdi.

⁷Shunday qilib, birodarlar, qiyinchiliklar va azob — uqubatlarda boʻlsak ham, sizlarning imoningiz haqida eshitib, ancha tasalli topdik.

⁸Rabbimiz Isoga boʻlgan imoningiz qat’iy ekan, endi biz yengil nafas olib yashaymiz.

⁹Sizlar tufayli biz Xudo oldida quvonchga toʻlib yuribmiz. Shunday ekan, qanday qilib Xudoga oʻz minnatdorchiligimizni bildirmay tura olamiz?!

¹⁰Sizlar bilan yana diydor koʻrishaylik, imoningizga imon qoʻshaylik deb, kechayu kunduz jon — jahdimiz bilan ibodat qilyapmiz.

¹¹Otamiz Xudoning Oʻzi va Rabbimiz Iso sizlarning oldingizga borishimiz uchun yoʻl ochsin.

¹²Sizga boʻlgan mehrimiz toʻlib — toshgani kabi, Rabbimiz sizlarning ham bir — biringizga va boshqa hammaga boʻlgan mehr — muhabbatingizga qalbingizni toʻldirib — toshirsin.

¹³Shunda qalblaringiz sobit boʻladi, Rabbimiz Iso Oʻz farishtalari[9] bilan kelganda, sizlar Otamiz Xudo oldida aybsiz va pok tura olasizlar.